Reglur þessar eru settar með stoð í lögum nr. 40/1991 um félagsþjónustu sveitarfélaga og reglugerð nr. 198/1992 um daggæslu barna í heimahúsum.

Reglur þessar voru samþykktar af Barnaverndarnefnd Reykjanesbæjar 03.10.1995.

1. kafli.
Veiting leyfa
1. gr.
Barnaverndarnefnd Reykjanesbæjar veitir leyfi til daggæslu barna í heimahúsum skv. reglugerð nr. 198 frá árinu 1992. Eingöngu leyfishöfum er heimilt að taka greiðslu fyrir gæslu barna í heimahúsum. Fjölskyldu- og félagsþjónusta Reykjanesbæjar sér um undirbúning leyfisveitingar að undangenginni athugun á hæfni og aðstæðum umsækjanda.
Leyfi eru eingöngu veitt á haustin.

2. gr.
Skilyrði fyrir leyfisveitingum eru eftirfarandi:

1. Umsækjandi hafi náð 20 ára aldri.
2. Umsækjandi sæki námskeið fyrir dagmæður sem haldin eru af Fjölskyldu- og félagsþjónustu, undanþágu má veita ef umsækjandi hefur uppeldismenntun sem bvn. metur gilda.
3. Læknisvottorð fyrir umsækjanda og fjölskyldu hans sem staðfesti heilbrigði fjölskyldunnar.
4. Sakavottorð fyrir umsækjanda og aðra fjölskyldumeðlimi sem eru 18 ára og eldri.
5. Umsögn fyrri vinnuveitanda eða tveggja ábyrgra aðila þar sem fram komi hæfni umsækjanda til að annast börn.
6. Umsögn eldvarnareftirlits um brunavarnir, ástand rafmagns og útgönguleiðir. Skylt er að hafa reykskynjara í íbúðinni.
7. Umsækjandi fari í viðtal hjá sérfræðingi Fjölskyldu- og félagsþjónustu, sem meti viðhorf og hæfni hans til umönnunar barna.
8. Lágmarksleikrými fyrir hvert barn skal vera a.m.k. 3.5 fm innanhúss, auk þess skal aðstaða til útivistar vera afgirt og hættulaus.
9. Heimilt er að leita umsagnar heilbrigðisfulltrúa ef ástæða þykir til.
10. Skriflegt samþykki leigusala til starfseminnar ef um leiguhúsnæði er að ræða.
11. Skriflegt samþykki annarra íbúa hússins ef um sambýlishús er að ræða.
12. Heimilt er að veita tveimur einstaklingum leyfi í sama húsnæði ef annar er með
uppeldismenntun og öllum skilyrðum er fullnægt.

Umsækjanda er skylt að virða lög um tóbaksvarnir, og því eru tóbaksreykingar óheimilar í návist þeirra barna sem í daggæslu eru.

3.gr.
Daggæslufulltrúi og starfsmaður bvn. heimsækja umsækjendur og kanna aðstæður innanhúss og utan og kynna sér hæfni umsækjenda.

4.gr.
Leyfi er veitt fyrir allt að fjórum börnum samtímis og eru þá þau börn sem fyrir eru á heimilinu undir sex ára aldri meðtalin. Ekki skulu vera fleiri en tvö börn undir eins árs aldri samtímis. Leyfi er fyrst veitt til eins árs og telst það ár reynslutími. Daggæslufulltrúi heimsækir dagmóður þrisvar - fjórum sinnum fyrsta árið og síðan minnst einu sinni á ári eftir það.

5.gr.
Eftir a.m.k. eins árs starfstíma getur umsækjandi sótt um endurnýjun á leyfinu og er þá veitt leyfi fyrir fimm börnum undir 6 ára aldri, ef aðstæður eru góðar og daggæslufulltrtúi telur dagmóður rækja starf sitt fullnægjandi. Hið endurnýjaða leyfi gildir síðan í þrjú ár og fyrir hverja endurnýjun þarf umsækjandi að skila inn læknis- og sakavottorðum og fara á námskeið í skyndihjálp og brunavörnum.

6.gr.
Synjun leyfis skal vera skrifleg og rökstudd.

7.gr.
Uppfylli heimili dagmóður ekki lengur þau skilyrði sem sett eru eða ef gæslunni er á einhvern hátt ábótavant, ber að tilkynna dagmóður það skriflega og veita ákveðinn frest til úrbóta. Leyfið er afturkallanlegt ef tilskildar kröfur eru ekki uppfylltar eða ef daggæslufulltrúi telur að leyfishafi hafi brotið alvarlega af sér.

2. kafli.
Skyldur dagmæðra
8.gr.
Dagmóðir er ávallt ábyrg fyrir andlegri og líkamlegri velferð barns meðan það dvelur hjá henni og skal hún hlúa að heilsu þess í sem víðtækustum skilningi. Á þetta við um fæðuval, hreyfingu, leiki jafnt úti sem inni, tilfinningalíf og félagslega líðan barns.
Dagmóðir má ekki undir neinum kringumstæðum beita barn andlegri eða líkamlegri hirtingu.
9.gr.
Dagmóður ber að fara með allar upplýsingar sem hún fær um hag barns og forráðamanna þess sem trúnaðarmál. Dagmæður undirriti þagnarheiti við leyfisveitingu.

10.gr.
Ef dagmóðir verður þess áskynja að barn sé vanrækt eða uppeldi þess, atlæti, eða aðbúnaði sé ábótavant, ber henni að tilkynna slíkt til bvn. sbr. lög um vernd barna og ungmenna. Æskilegt er að dagmóðir hafi samráð við daggæslufulltrúa um slík mál.

11.gr.
Dagmóður ber að veita daggæslufulltrúa upplýsingar um þau börn sem hefja og ljúka gæslu hverju sinni.

12.gr.
Dagmóður er skylt að kaupa slysatryggingu fyrir börnin. Samtök dagmæðra kaupa sameiginlega tryggingu fyrir dagmæðurnar í samtökunum.

13.gr.
Áður en vistun barns hefst skal dagmóðir og forráðamaður fara yfir gildandi reglur og gjaldskrá dagmóður. Þau skulu ákveða dvalartíma og aðlögun barnsins og allar nauðsynlegar upplýsingar sem varða barnið skulu liggja fyrir. Dagmóðir skal sýna forráðamanni heimilið og aðstæður úti sem inni og upplýsa hann um hvernig hennar starf fer fram s.s. skipulag dagsins, matartímar, útivist o.þ.h. Dagmóður ber að gera forráðamanni grein fyrir aðstæðum sem geta haft áhrif á líðan barns. Einnig skal dagmóðir láta forráðamann vita ef gæludýr eru á heimilinu.

14.gr.
Dagmóðir skal gefa kvittun fyrir því gjaldi sem forráðamenn greiða. Reykjanesbær niðurgreiðir gjöld vegna vistunar barna hjá dagmæðrum.

15.gr.
Dagmóðir skal upplýsa forráðamenn um gagnkvæman uppsagnarfrest sem er einn mánuður og miðast uppsögn við 1. og 15. hvers mánaðar.

16.gr.
Ef dagmóðir lætur af störfum ber henni að tilkynna það með 2ja mánaða fyrirvara til daggæslufulltrúa og skila inn leyfi sínu þegar hún hættir störfum.

17.gr.
Dagmóðir skal tilkynna foreldrum og daggæslufulltrúa fyrir 1. apríl ár hvert, hvenær hún hyggst taka sumarfrí.

3. kafli.
Skyldur forráðamanna.

18.gr.
Forráðamenn skulu kynna sér lög og reglur dagmæðra og allar þær aðstæður sem haft geta áhrif á líðan barnsins hjá dagmóður. Forráðamenn eru ávallt ábyrgir fyrir ákvörðun um gæslu barna sinna. Mikilvægt er að forráðamenn dvelji með barni sínu fyrstu dagana í samráði við dagmóður.

19.gr.
Mjög mikilvægt er að forráðamaður og dagmóðir ræði saman af og til um hvernig barninu líður, þroska þess og þarfir.

20.gr.
Börnin skulu mæta hrein og hlýlega klædd og með viðeigandi útifatnað ásamt fötum til skiptanna. Forráðamaður klæði barnið úr og í við komu og brottför.

21.gr.
Forráðamaður þarf að sjá til þess að dagmóðir hafi ávallt upplýsingar um hvar hægt er að ná í hann ef nauðsyn ber til eða annan aðila sem komið getur í hans stað.

22.gr.
Forráðamanni ber að ræða það við dagmóður ef aðstæður barna breytast, eins skal láta vita hver sækir barnið þegar daggæslu lýkur.

23.gr.
Forráðamaður hefur ekki heimild til að breyta umsömdum gæslutíma nema dagmóðir samþykki breytinguna.

24.gr.
Forráðamaður skal ekki koma með veikt barn í gæslu til dagmóður. Tilkynna skal veikindi svo fljótt sem auðið er.

25.gr.
Forráðamaður tilkynni forföll eða breyttan komutíma barna sinna. Ef barn er ekki mætt 30 mín. eftir að gæsla á að hefjast má dagmóðir yfirgefa heimili sitt.

26.gr.
Forráðamanni ber að greiða umsamið gjald fyrirfram fyrsta virkan dag hvers mánaðar.
Þó skal í upphafi vistunar greiða fyrir hálfan mánuð og telst sá tími reynslutími.

27.gr.
Forráðamaður skal tilkynna daggæslufulltrúa ef hann telur daggæslunni ábótavant.

Lokaorð
Með þessum reglum vill Fjölskyldu- og félagsþjónusta og Barnaverndarnefnd Reykjanesbæjar stuðla að sem bestum samskiptum dagmæðra og forráðamanna og tryggja þannig að líðan barnanna verði sem best.
Daggæslufulltrúi starfar hjá Fjölskyldu- og félagsþjónustu Reykjanesbæjar og hefur hann umsjón og eftirlit með daggæslu í heimahúsum og veitir ráðgjöf og upplýsingar varðandi reglur þessar.

Umsóknum um leyfi til daggæslu í heimahúsum skal skilað á þar til gerðu eyðublaði til daggæslufulltrúa.