Atvinna í Keflvík, Njarðvík og Höfnum byggðist að mestu leyti á sjósókn og fiskvinnslu og hélst það langt fram á 20. öldina. 
 

Sjávarútvegur

Keflvíkingar voru mjög framarlega í saltfiskvinnslu og í byrjun 9. áratugarins var Keflavíkurhöfn önnur mesta útflutningshöfn sjávarafurða landsins. En í kjölfar kvótakerfisins fór að síga á ógæfuhliðina í þessari undirstöðuatvinnugrein á svæðinu og hefur bátum fækkað og flest fiskvinnslu- og frystihús hætt störfum. Vægi fiskvinnslu og útgerðar er ekki mikið í atvinnulífi Reykjanesbæjar í dag.
 

Verslun og þjónusta

Flest dagsverk eru í verslun og þjónustu og er  Keflavíkurflugvöllur mikilvægur þáttur í atvinnulífinu.  Mikil  aukningin hefur orðið í störfum tengdri ferðaþjónustu og þá hefur störfum í iðnaði fjölgað á ný svo og störfum sem tengjast fullvinnslu sjávarfangs.
 

Orkuiðnaður

Orkufrekur iðnaður hefur einnig verið að aukast jafnt og þétt, enda svæðið þeim kostum búið að geta boðið ódýrustu orku á landinu. Þetta hefur mikla þýðingu þegar fyrirtæki, sem eru miklir orkunotendur, velja sér staðsetningu. Margir möguleikar í þessu sambandi eru tengdir uppbyggingu iðnaðarsvæðis í Helguvík. Samdráttur í sjávarútvegi hefur gert það að verkum að fjölbreytni í atvinnulífinu er mun meiri nú en áður og mikill kraftur hlaupinn í hinar ýmsu greinar.