„Gamalt verður nýtt.“ Smiðja fyrir alla aldurshópa og leiðsögn sýningarstjóra

Í tengslum við sýninguna Endalaust bjóða HANDVERK OG HÖNNUN og Listasafn Reykjanesbæjar upp á smiðju fyrir alla aldurshópa og leiðsögn sýningarstjóra. Sýningin inniheldur einungis verk úr endurunnum efnivið, þar sem hlutum sem annars yrði mögulega hent, er gefið nýtt og betra líf. Um er að ræða fjölbreytt og ólík viðfangsefni og alls 20 hönnuðir taka þátt í sýningunni. 

Leiðsögnin hefst kl. 14 á sama tíma og smiðjan og eru allir velkomnir óháð því hvort þeir taka þátt í smiðjunni eða ekki. Aðgangur er ókeypis á þessa viðburði.

Gamalt verður nýtt
Textílhópurinn Þráðlausar bjóða uppá verksmiðju fyrir alla aldurshópa þar sem vefnaður og endurvinnsla koma saman til að gefa gömlum og gleymdum hlutum nýtt líf.

Þátttakendur fá tækifæri til að endurbæta eða breyta einum hlut sem þeir finna heima hjá sér. Stóll eða myndarammi eru tilvaldir hlutir en einnig má nota hugmyndarflugið og koma með alls konar hluti sem er hægt að vefa inní. Garn og efni verður til staðar sem notað verður til að vefa með. 

Leiðbeinendur í smiðjunni eru þær Margrét Katrín Guttormsdóttir og Ragnheiður Stefánsdóttir sem saman mynda textílhópinn Þráðlausar. 

Þær eru báðar útskrifaðar úr textíldeild Myndlistaskólans í Reykjavík og stunda nám við Listaháskólann á Íslandi í hönnunardeildinni. 

Þráðlausar vinna að því að búa til textílverk og endurbæta gömul húsgögn með vefnaði úr endurnýttum textíl.