Fjölskyldumynstur. Opnun nýrrar sýningar í Listasafni Reykjanesbæjar

Verið velkomin á opnun sýningar á verkum Erlu S. Haraldsdóttur, „Fjölskyldumynstur“, í Listasafni Reykjanesbæjar, Duus Safnahúsum, föstudaginn 31. maí klukkan 18:00.  

Erla S. ólst upp í Svíþjóð en hefur verið búsett í Berlín í á annan áratug.

Í Listasafni Reykjanesbæjar sýnir hún ný málverk og lithographíur byggðar á fjölskyldusögu og endurminningum. Hún finnur tengingar við myndefnið í abstrakt mynstrum Ndbele ættbálksins sem hún kynnti sér í vinnustofudvöl í Suður Afríku.

Auk hefðbundinna málverka Erlu S. eru á sýningunni mynstur unnin beint á veggi og hafa nokkrir nemendur úr málaradeild Myndlistaskólans í Reykjavík aðstoðað við gerð þeirra. Myndirnar sem Erla S. sýnir eru meðal annars tilkomnar vegna áhuga hennar á að kynnast uppruna sínum; formæðrum og ættkonum. Samtímis því að Erla S.  kynnir sér menningararf kvenna í annarri heimsálfu, minnir listakonan á að í dag lifum við í heimsþorpi þar sem ólíkir menningarheimar þurfa að vinna saman í sátt og samlyndi.

Sýningarstjóri er Inga Þórey Jóhannsdóttir. Erla og Inga Þórey bjóða upp á leiðsögn um sýninguna laugardaginn 15. júní kl. 14. Sýningin stendur til 18. ágúst og safnið er  opið alla daga frá 12-17.