Forvarnarstarf gengur þvert á öll svið bæjarins og snýst um að skapa aðstæður sem styðja við heilbrigði, öryggi og vellíðan fólks á öllum aldri.
Forvarnir eru mikilvægur hluti af því að byggja upp sterkt samfélag þar sem börn, ungmenni og fjölskyldur fá tækifæri til að blómstra.
Markmið forvarnarstarfs
Meginmarkmið forvarnarstarfs í Reykjanesbæ eru að:
- stuðla að auknu heilbrigði og hamingju barna, ungmenna og fullorðinna
- skapa aðstæður sem hafa jákvæð áhrif á íbúa
- efla sjálfstraust og sjálfsmat barna og ungmenna
- stuðla að betri menntun
- auka öryggi á heimilum og bæta umhverfi barna og ungmenna
Ábendingar um forvarnarmál
Ábendingar og álit varðandi forvarnarmál má senda á netfangið forvarnir@reykjanesbaer.is
SAMTAKA-hópurinn
SAMTAKA-hópurinn í Reykjanesbæ er þverfaglegur samstarfshópur um forvarnir. Í hópnum sitja fulltrúar Reykjanesbæjar ásamt fulltrúum foreldra, grunn- og framhaldsskóla, lögreglu og heilbrigðisþjónustu.
Markmið hópsins er að samræma forvarnarstarf, efla samstarf og tryggja heildstæða nálgun í forvörnum í bæjarfélaginu.
Nánar má lesa um hlutverk og markmið hópsins í erindisbréfi SAMTAKA-hópsins.
Helstu verkefni forvarnarstarfs í Reykjanesbæ eru að móta áætlanir, halda utan um verkefni og fylgjast með árangri þeirra. Reglulega er metið hvað gengur vel, hvar megi bæta og hvar þörf er á nýjum verkefnum.
Reykjanesbær tekur meðal annars þátt í eftirfarandi forvarnarverkefnum:
- Heilsueflandi samfélag, á vegum embættis landlæknis, sem styður samfélög í að skapa umhverfi og aðstæður sem stuðla að heilbrigðum lifnaðarháttum og vellíðan allra íbúa. Nánari upplýsingar má finna á vefnum Heilsueflandi samfélag á Ísland.is.
- Forvarnardagur ungra ökumanna, fyrir nemendur í Fjölbrautaskóla Suðurnesja, með áherslu á öryggi í umferðinni.
- Forvarnardagurinn, þar sem sjónum er beint að nemendum í 9. bekk og á fyrsta ári í framhaldsskóla og þau hvött til að miðla reynslu sinni og upplifun.
- Heilsu- og forvarnarvika Reykjanesbæjar, þar sem lögð er áhersla á að draga úr áhættuþáttum og styrkja verndandi þætti með þátttöku bæjarbúa.
- Samvinna við Rannsóknir og Greiningu og Íslensku æskulýðsrannsóknina, til að fylgjast náið með líðan barna og ungmenna í Reykjanesbæ.
- Fræðsla í grunn- og framhaldsskólum, sem hefur verið stóraukin að beiðni Ungmennaráðs Reykjanesbæjar.
- Allir með forvarnarverkefni, sem miðar að því að auka þátttöku barna í skipulögðu íþrótta- og tómstundastarfi og styrkja leiðtoga og þjálfara í markvissri vinnu með börnum og ungmennum.