1. grein
Sjóðurinn heitir Menningarsjóður og er í umsjón Menningar- og þjónustusviðs Reykjanesbæjar.
2. grein
Markmið sjóðsins er að styðja með fjárframlögum við fjölbreytt menningarstarf í Reykjanesbæ í samræmi við menningarstefnu Reykjanesbæjar, hvort sem er á vegum lögráða einstaklinga og/eða félagasamtaka.
3. grein
Auglýst skal eftir umsóknum og styrkjum úthlutað að lágmarki einu sinni á ári. Miða skal við að öllu fjármagni sjóðsins sé úthlutað. Styrkumsóknir skulu auglýstar í byrjun árs og skulu svör liggja fyrir ekki síðar en í mars. Heimilt er að auglýsa eftir umsóknum oftar yfir árið ef aðstæða þykir til. Umsóknum er skilað rafrænt í gegnum Mitt Reykjanes.
Menningarsjóður styrkir:
- Menningartengd verkefni sem auðga menningarlíf Reykjanesbæjar
- Verkefni sem hafa skýr markmið, tímasetningu og fjárhagsáætlun
- Verkefni sem samræmast Menningarstefnu Reykjanesbæjar
Menningarsjóður styrkir ekki:
- Verkefni tengd námi
- Ferðakostnað
- Kaup á tækjabúnaði
- Verkefni sem koma ekki til framkvæmda í Reykjanesbæ eða hafa ekki tengingu við bæinn
- Verkefni sem samræmast ekki stefnu Reykjanesbæjar
4. grein
Fjárframlag til sjóðsins er samkvæmt fjárhagsáætlun Reykjanesbæjar ár hvert auk þess sem sjóðurinn tekur við frjálsum framlögum sem ætluð eru til menningarmála í Reykjanesbæ.
5. grein
Menningar- og þjónustusvið, að höfðu samráði við menningarfulltrúa, afgreiðir umsóknir um alla styrki til menningarmála fyrir hönd bæjarstjórnar.
Menningar- og þjónustusvið getur í samráði við menningarfulltrúa haft frumkvæði að styrkveitingum og/eða viðurkenningum til félaga, fyrirtækja eða einstaklinga ef það er álitið að viðkomandi hafi stuðlað með einum eða öðrum hætti að framgangi menningar í Reykjanesbæ.
6. grein
Markmið verkefna og áætlanir um framkvæmd þeirra skulu vera skýr og raunhæf hvað varðar kostnað, tímasetningar og árangur sem stefnt er að og kröfur til ábyrgðarmanna. Listrænt, menningarlegt og/eða fræðilegt gildi verkefnisins þarf að vera ljóst. Sýnt skal fram á að styrkurinn sé líklegur til að efla menningarstarfsemi í Reykjanesbæ. Styrkurinn afhendis að verki loknu gegn framvísun reiknings og skýrslu um framvindu verkefnisins. Verkefni skulu unnin á því fjárhagsári sem úthlutað er, annars fellur styrkurinn niður. Umsækjendur skulu sýna fram á að minnsta kosti 50% mótframlag á móti styrkjum sjóðsins. Gera þarf grein fyrir því hvers eðlis mótframlagið er.
Endurskoðað og samþykkt í Menningar- og atvinnuráði Reykjanesbæjar 16.03.2022.
Uppfært 17.01.2024.