Í dag er flaggað í hálfa stöng við stofnanir Reykjanesbæjar í minningu Gunnars Þórðarsonar tónlistarmanns og tónskálds, sem lést 29. júlí síðastliðinn, 81 árs að aldri.
Gunnar skipar einstakan sess í íslenskri tónlistarsögu og tengsl hans við Keflavík voru sterk. Hann fluttist ungur til bæjarins og var í fararbroddi þeirrar miklu tónlistarvakningar sem þar varð á sjöunda áratugnum með Hljómum. Á löngum og farsælum ferli samdi hann fjölda laga sem hafa orðið órjúfanlegur hluti af íslenskri tónlistarsögu.
Gunnar var útnefndur bæjarlistamaður Keflavíkur árið 1992 og skipar þannig einnig sérstakan sess í menningarsögu Reykjanesbæjar.
Útför Gunnars fer fram frá Hallgrímskirkju í dag. Reykjanesbær vottar fjölskyldu hans og aðstandendum innilega samúð og þakkar Gunnari fyrir ómetanlegt framlag hans til íslenskrar tónlistar og menningarlífs.
Blessuð sé minning Gunnars Þórðarsonar.