Íþróttabandalag Reykjanesbæjar (ÍRB) fagnar 30 ára afmæli á þessu ári, en bandalagið var stofnað 29. maí 1996. Reykjanesbær óskar bandalaginu, aðildarfélögum þess og öllum þeim fjölmörgu sjálfboðaliðum sem komið hafa að starfinu í gegnum árin innilega til hamingju með þennan merka áfanga.
Í dag eru 16 aðildarfélög innan bandalagsins sem standa fyrir fjölbreyttu íþróttastarfi fyrir börn, ungmenni og fullorðna. Meginhlutverk ÍRB er að efla og skipuleggja íþróttastarfsemi í sveitarfélaginu, gæta sameiginlegra hagsmuna aðildarfélaganna og vera málsvari íþróttahreyfingarinnar gagnvart Reykjanesbæ og öðrum opinberum aðilum.
Sérstakur formannafundur var haldinn 14.október í golfskálanum við Hólmsvöll þar sem boðið var upp á afmæliskvöldverð í tilefni af þessum merku tímamótum. Á fundinum tóku til máls Rúnar Vífill Arnarson, formaður ÍRB, Willum Þór Þórsson forseti ÍSÍ, Vilhjálmur Árnason, bæjarstjóri Reykjanesbæjar, og Jóhann Steinar Ingimundarson, formaður Ungmennafélags Íslands (UMFÍ).
Mikilvæg tímamót urðu í sögu bandalagsins í mars 2026 þegar Guðni Erlendsson tók við sem fyrsti framkvæmdastjóri ÍRB. Ráðningin markaði nýjan kafla í starfsemi bandalagsins og styrkti enn frekar umgjörð íþróttastarfsins í Reykjanesbæ.
Reykjanesbær þakkar öllum þeim sem hafa lagt sitt af mörkum til uppbyggingar íþróttastarfs í bæjarfélaginu undanfarna þrjá áratugi. Starf íþróttahreyfingarinnar er ómetanlegur þáttur í samfélaginu og stuðlar að heilbrigði, samveru og auknum lífsgæðum íbúa á öllum aldri.
Reykjanesbær óskar Íþróttabandalagi Reykjanesbæjar innilega til hamingju með 30 ára afmælið og farsældar í áframhaldandi starfi.