4. fundur leikskólaráðs Reykjanesbæjar

Helgi Arnarson sviðsstjóri menntasviðs fór yfir stöðu fjárhagsáætlunarvinnu sviðsins, stöðumat og næstu skref.

Hreinn Ágúst Kristinsson deildarstjóri eignaumsýslu sat fundinn undir þessum dagskrárlið og fór yfir áætlun um framkvæmdir í leikskólum Reykjanesbæjar á árinu 2027.

Uppfærð drög að erindisbréfi lögð fram.

Leikskólaráð samþykkir drögin með fyrirvara um athugasemdir sem fram komu á fundinum. Leikskólafulltrúa er falið að uppfæra erindisbréfið í samræmi við framkomnar athugasemdir og koma þeim til forsetanefndar. 

Ásdís Ólafsdóttir formaður leikskólaráðs kynnti niðurstöður könnunar sem gerð var meðal forráðamanna og starfsfólks varðandi sumarleyfislokun í leikskólum Reykjanesbæjar.

Niðurstöður könnunarinnar sýna almenna ánægju með núverandi fyrirkomulag sumarleyfa, þó með ólíkum áherslum meðal forráðamanna og starfsfólks. Stuðningur starfsfólks er mjög sterkur en meðal forráðamanna eru sjónarmið fjölbreyttari og þar koma meðal annars fram óskir um aukinn sveigjanleika.

Könnunin er eitt skref í gagnaöflun um upplifun og þarfir þeirra sem nýta og starfa í leikskólum sveitarfélagsins. Leikskólaráð telur mikilvægt að byggja umfjöllun og ákvarðanir á upplýsingum og sjónarmiðum bæði forráðamanna og starfsfólks. Niðurstöður könnunar sem þessarar verða nýttar sem innlegg í áframhaldandi umfjöllun og þróun leikskólastarfs í Reykjanesbæ.

Bergljót Sif Stefánsdóttir leikskólafulltrúi kynnti sameiginlegan skipulagsdag leikskóla Reykjanesbæjar sem verður haldinn í Hljómahöll föstudaginn 22. janúar 2027. Af því tilefni verður efnt til námstefnu undir yfirskriftinni „Leikur sá er mér kær“, þar sem sjónum verður beint að leiknum og mikilvægu hlutverki hans í lífi, námi og þroska barna.

Ásdís Ólafsdóttir formaður leikskólaráðs kynnti tillögu spretthóps leikskólaráðs um 30 stunda gjaldfrjálsa leikskóladvöl í leikskólum Reykjanesbæjar.

Leikskólaráð fagnar tillögum spretthóps um umbætur í leikskólamálum Reykjanesbæjar og þakkar fulltrúum hópsins fyrir mikla og góða vinnu undanfarnar vikur.

Ráðið telur tillögurnar mikilvægt skref í áframhaldandi þróun leikskólaþjónustunnar með hagsmuni barna, foreldra og starfsfólks að leiðarljósi.

Sérstaklega ber að fagna tillögu um að allt að 30 klukkustunda leikskóladvöl á viku verði gjaldfrjáls fyrir öll börn í leikskólum Reykjanesbæjar. Markmiðið er að létta á útgjöldum fjölskyldna og tryggja að fjárhagur standi ekki í vegi fyrir því að börn geti sótt leikskóla. Í Reykjanesbæ er töluverður hópur barna sem ekki nýtir leikskólaþjónustu og mikilvægt er að greiða leið þeirra inn í leikskólastarf. Þar fá börn tækifæri til að taka þátt í samfélagi með jafnöldrum, efla félagsfærni og styrkja íslenskukunnáttu sína. Foreldrar munu áfram geta valið lengri dvalartíma gegn gjaldi.

Spretthópurinn leggur einnig til aukinn sveigjanleika í dvalartíma barna innan ákveðins ramma. Hugmyndin er að fyrirkomulagið taki bæði mið af þörfum fjölskyldna og því svigrúmi sem leikskólarnir hafa til að skipuleggja starf sitt. Lagt er til að breytingarnar verði innleiddar sem tilraunaverkefni og áhrif þeirra metin reglulega, m.a. með tilliti til mönnunar, starfsánægju, veikindafjarvista, líðanar barna og fjárhagslegra áhrifa.

Tillögurnar miða einnig að því að bæta starfsumhverfi í leikskólunum, draga úr álagi og skapa meira svigrúm fyrir faglegt starf, undirbúning og samstarf. Stöðugri mönnun og betra starfsumhverfi skiptir miklu máli til að halda í gott starfsfólk, laða að fleiri fagmenntaða leikskólakennara og skapa forsendur til að lækka inntökualdur barna.

Leikskólaráð vísar tillögu spretthóps um 30 stunda gjaldfrjálsa leikskóladvöl í leikskólum Reykjanesbæjar til afgreiðslu bæjarráðs.