Árlegir viðburðir

Ljósanótt er stærsta hátíð Reykjanesbæjar og er haldin ár hvert í byrjun september. Hátíðin er menningar- og fjölskylduhátíð þar sem bæjarbúar, félagasamtök, listafólk og fyrirtæki taka virkan þátt og bærinn iðar af lífi í nokkra daga. 

Fjölbreytt dagskrá fyrir alla aldurshópa setur svip sinn á bæinn og nær hátíðin hámarki á laugardagskvöldi með lýsingu Bergsins og flugeldasýningu.

BAUN er barna- og ungmennahátíð Reykjanesbæjar og er haldin ár hvert að vori. Hátíðin stendur yfir í rúma viku og býður upp á fjölbreytta dagskrá fyrir börn, ungmenni og fjölskyldur. 

Sköpun, gleði og þátttaka eru í fyrirrúmi og fá börn og ungmenni fjölbreytt tækifæri til að njóta, skapa og láta ljós sitt skína.  

Aðventugarðurinn í Skrúðgarðinum í Keflavík er opinn um helgar á aðventunni og hefur fest sig í sessi sem hluti af jólahaldi Reykjanesbæjar. 

Þar ríkir notaleg jólastemning fyrir alla fjölskylduna, með jólakofum, Aðventusvelli og fjölbreyttri dagskrá sem lífgar upp á skammdegið. 

Safnahelgi er árleg menningarhátíð á Suðurnesjum sem haldin er að hausti. Þá opna söfn, setur og sýningar á svæðinu dyr sínar og bjóða gesti velkomna. 

Menningarstofnanir Reykjanesbæjar taka virkan þátt í Safnahelgi og bjóða upp á dagskrá og viðburði fyrir fólk á öllum aldri.