Skólaþjónusta menntasviðs Reykjanesbæjar vinnur með grunnskólum, foreldrum og öðru fagfólki að því að styðja við nám, þroska, vellíðan og þátttöku barna og ungmenna.
Áhersla er lögð á snemmtækan stuðning, ráðgjöf í daglegu skólaumhverfi og samfellu í þjónustu. Jafnframt er markmiðið að styrkja faglegt starf grunnskóla og getu þeirra til að mæta fjölbreyttum þörfum nemenda.
Aðgangur að skólaþjónustu fer almennt í gegnum grunnskóla barnsins. Þannig er leitast við að veita stuðning á réttum tíma, í réttu samhengi og með hagsmuni barnsins að leiðarljósi.
Þjónustan byggir meðal annars á reglugerð um skólaþjónustu sveitarfélaga nr. 444/2019.
Ráðgjöf og stuðningur skólaþjónustu
Í skólaþjónustu starfar þverfaglegt teymi sérfræðinga sem vinnur í nánu samstarfi við grunnskóla, foreldra og annað fagfólk.
Skólaþjónustan:
- veitir ráðgjöf um nám, þroska, líðan, hegðun, samskipti, skólasókn og þátttöku nemenda,
- styður skóla við að skapa öruggt, hvetjandi og inngildandi námsumhverfi,
- aðstoðar við að greina stuðningsþarfir og finna leiðir sem henta nemandanum og aðstæðum hans,
- styður kennara og stjórnendur við að mæta fjölbreyttum þörfum nemenda,
- tekur þátt í teymisvinnu, lausnaleit og eftirfylgd þegar þörf er á,
- framkvæmir eftir atvikum nánari athuganir og mat á námi, þroska, máli eða öðrum þáttum sem tengjast stöðu nemandans,
- veitir ráðgjöf um viðeigandi úrræði og vísar áfram í sérhæfðari þjónustu þegar þörf er á,
- styður við þróunarstarf skóla og eflingu snemmtæks og heildræns stuðnings,
- vinnur með öðrum þjónustuaðilum þegar þörf er á samhæfðum stuðningi.
Snemmtækur og heildrænn stuðningur
Áhersla er lögð á að brugðist sé snemma við þegar vísbendingar koma fram um að nemandi þurfi aukinn stuðning og að stuðningur fari eins og kostur er fram í daglegu skólaumhverfi hans.
Unnið er í anda Heillaspora (Nurture), þar sem áhersla er lögð á örugg tengsl, vellíðan, inngildingu og virka þátttöku nemenda í skóla- og frístundastarfi.
Markmiðið er að byggja á styrkleikum nemandans og skapa aðstæður þar sem hann fær tækifæri til að læra, þroskast og taka virkan þátt í skólasamfélaginu.
Samvinna og samstarf
Góð samvinna foreldra, skóla og fagfólks er mikilvægur grunnur að farsælum stuðningi.
Þegar þörf er á vinnur skólaþjónustan með öðrum þjónustuaðilum, svo sem velferðar- og heilbrigðisþjónustu. Markmiðið er að tryggja samræmdan og markvissan stuðning, samfellu í þjónustu og skýra verkaskiptingu.
Áhersla er jafnframt lögð á að hlustað sé á rödd og sjónarmið barnsins og tekið tillit til þeirra í samræmi við aldur og þroska.
Nemendaverndarráð
Nemendaverndarráð er samráðsvettvangur innan grunnskólans þar sem fulltrúar skólans, skólaþjónustu, skólahjúkrunar og barna- og fjölskylduteymis vinna saman að málefnum nemenda.
Þar eru málefni nemenda rædd þegar þörf er á frekari stuðningi, ráðgjöf eða samhæfingu. Áhersla er lögð á snemmtækan stuðning, lausnaleit og að mál fari í skýran og viðeigandi farveg.
Í nemendaverndarráði er meðal annars:
- farið yfir stöðu og þarfir nemandans,
- rætt um leiðir til að styðja við nám, líðan og þátttöku,
- ákveðið hvernig stuðningi og eftirfylgd skuli háttað,
- metið hvort þörf sé á aðkomu annarra þjónustuaðila.