Reykjanesbær er hluti af Reykjanes jarðvangi (Reykjanes Geopark), sem hefur hlotið alþjóðlega viðurkenningu UNESCO sem Global Geopark. Svæðið er einstakt á heimsvísu þar sem Atlantshafshryggurinn gengur á land og flekaskil Norður-Ameríku og Evrasíu eru sýnileg.
Jarðvangurinn er virkur hluti gosbeltis Íslands. Þar má sjá opnar sprungur og gjár, gígaraðir, hraunbreiður og jarðhitasvæði sem minna á þá krafta sem móta landið. Eldgosið í Geldingadölum árið 2021 vakti heimsathygli og undirstrikaði að Reykjanes er lifandi og virkt eldfjallasvæði.
Á svæðinu má upplifa fjölbreytt og stórbrotið landslag á skömmum tíma – frá hverasvæðum og heitum laugum til hraunmyndana, hella og brimstranda. Aðgengi er gott og stutt er frá bæði höfuðborgarsvæðinu og alþjóðaflugvellinum.
Reykjanes jarðvangur sameinar jarðfræði, náttúru, sögu og mannlíf og býður upp á fjölbreytta möguleika til útivistar, fræðslu og upplifunar.