Öll laus störf hjá Reykjanesbæ eru auglýst til umsóknar, nema þegar um tímabundnar ráðningar eða tilfærslur á milli sambærilegra starfa er að ræða.

Jafnræði er tryggt í ráðningarferlinu og ráðningar byggjast á hæfni umsækjenda til að sinna starfinu í samræmi við þær kröfur sem settar eru fram í auglýsingu. Við ráðningar er ávallt höfð hliðsjón af jafnréttisáætlun Reykjanesbæjar.

Reykjanesbær er jafnlaunavottað sveitarfélag og öll kyn eru hvött til að sækja um störf hjá sveitarfélaginu.

Þar sem Reykjanesbær er afhendingarskyldur aðili samkvæmt lögum nr. 77/2014 um opinber skjalasöfn er sveitarfélaginu óheimilt að ónýta eða farga skjölum sem falla undir gildissvið laganna, nema með heimild þjóðskjalavarðar. Almennt eru persónuupplýsingar, sem sveitarfélagið vinnur með, afhentar Þjóðskjalasafni að þrjátíu árum liðnum.

Upplýsingar um meðferð umsókna

Vakin er athygli á því að Reykjanesbær er leiðbeiningarskylt sveitarfélag og veitir umsækjendum upplýsingar um stöðu mála og réttindi sín samkvæmt stjórnsýslulögum nr. 37/1993. Þegar umsóknarfrestur er liðinn er skylt, sé þess óskað, að veita almenningi aðgang að upplýsingum um nöfn og starfsheiti umsækjenda. Þetta byggir meðal annars á 7. gr. starfsmannalaga og 4. gr. upplýsingalaga nr. 50/1996. Af þessum sökum er ekki mögulegt að óska nafnleyndar þegar sótt er um störf hjá sveitarfélaginu. Þá er athygli vakin á því að umsækjendur geta óskað eftir aðgangi að gögnum sem varða eigið mál.