- Þjónusta
- Velferð og stuðningur
- Menntun og fræðsla
- Skipulags-, bygginga- og umhverfismál
- Íþróttir og tómstundir
- Stjórnsýsla
- Mannlíf
- Mitt Reykjanes
Barnavernd
Ef þú hefur grun eða vitneskju um að barn verði fyrir vanrækslu eða ofbeldi, eða hefur áhyggjur af áhættuhegðun barns er skylda að láta barnavernd vita. Börn geta líka haft samband sjálf. Hægt er að tilkynna hér á vefnum eða í síma 421 6700 á skrifstofutíma. Ef málið er áríðandi, hringdu í 112.
Tilkynning til barnaverndar er ekki kæra heldur beiðni um aðstoð fyrir barn eða fjölskyldu sem þú telur að þurfi á hjálp að halda. Börn eiga rétt samkvæmt lögum að njóta vafans ef einhver vafi er. Því á að tilkynna grun en ekki bara eitthvað sem er staðfest.
Um barnavernd
Markmið barnaverndar er að tryggja börnum viðunandi uppeldisskilyrði með því að styrkja fjölskyldur og beita úrræðum til verndar einstaka börnum þegar það á við. Allir undir 18 ára teljast börn, einnig ófædd börn.
Börn eiga rétt á að alast upp í friði, öryggi, við góðar aðstæður og vernduð gegn ofbeldi og vanrækslu. Börn fá tækifæri til að tjá skoðanir sínar miðað við aldur þeirra og þroska og taka þátt í ákvarðanatöku varðandi þeirra líf. Barnaverndarþjónusta tekur mið af stefnu Reykjanesbæjar, barnaverndarlögum og Barnasáttmála Sameinuðu þjóðanna.
Ferli
Ferli
Tilkynning
Samkvæmt barnaverndarlög er fólki skylt að tilkynna til barnaverndar ef það telur að barn búi við óviðunandi uppeldisaðstæður, verði fyrir áreitni eða ofbeldi eða stefni heilsu sinni og þroska í alvarlega hættu. Það sama á við ef grunur er um að heilsu eða lífi ófædds barns sé stofnað í hættu.
Hægt er að óska eftir nafnleynd gagnvart þeim sem tilkynnt er um nema sérstakar ástæður mæli gegn því.
Ef málið þolir ekki bið og barnið er í bráðri hættu, hafðu samband við 112. Bakvakt Barnaverndar Reykjanesbæjar sinnir neyðartilvikum utan skrifstofutíma.
Könnun máls
Starfsfólk barnaverndar taka ákvörðun innan 7 daga frá því að tilkynning berst hvort hefja eigi könnun máls eða ekki. Mál er ekki kannað nema rökstuddur grunur um efni tilkynningarinnar liggi fyrir.
Mál telst barnaverndarmál þegar ákveðið hefur verið að hefja könnun. Foreldrar eru alltaf látnir vita að tilkynning hafi borist ásamt niðurstöðu móttöku- og greiningarfundar.
Við könnun máls eru foreldrar boðnir í viðtal til að fara yfir tilkynninguna. Undantekning á þessu er þegar barn er talið í hættu í umsjá foreldra og það séu hagsmunir barns að foreldrar viti ekki af könnuninni tímabundið.
Í könnunarferlinu er lögð áhersla á að ræða við börn til að tryggja að sjónarmið og líðan þeirra komi skýrt fram. Að lokinni könnun er gerð greinargerð um hvaða stuðning á að veita fjölskyldunni á vegum barnaverndar. Ef ekki er talin þörf á að veita stuðning er málinu lokað.
Áfrýjun
Samkvæmt 6. gr. barnaverndarlaga nr. 80/2002 er hægt að skjóta úrskurðum og einstökum ákvörðunum barnaverndarnefnda til úrskurðarnefndar velferðarmála. Kærufrestur er 4 vikur frá því að aðila máls var tilkynnt um úrskurð eða ákvörðun.
Ef aðilar eru ósáttir við meðferð einstakra mála er hægt að leggja fram kvörtun til Gæða- og eftirlitsstofnun velferðarmála (GEV).
