Drekadalur 2, Reykjanesbær 260
drekadalur@drekadalur.is
420 5600 / 852 3964
Opnunartími 07:45-16:15

Um leikskólann

Leikskólinn Drekadalur er nýr leikskóli hjá Reykjanesbæ sem hóf starfsemi í ágúst 2024. Nafnið á leikskólanum okkar Drekadalur er til þess fallið að ýta undir ímyndunarafl og sköpunargleði barnanna og hjálpa starfsfólki, börnum og foreldrum að skapa sannkallaðan ævintýraheim í hjarta Dalshverfi þrjú í Innri Njarðvík.

Heimastofur Drekadals heita Drekakot, Móakot, Hákot, Stapakot og Tjarnakot. Mjög skemmtileg nöfn sem tengjast staðháttum í hverfinu okkar. Hreyfisalurinn ber nafnið Njarðvík sem undirstrikar tengsl við samfélagið.

Leikskólastjóri er María Petrína Berg

Aðstoðarleikskólastjóri er Rósa Íris Ólafsdóttir

Hugmyndafræði

Aðalnámskrá

Leikskólinn Drekadalur starfað samkvæmt Aðalnámskrá leikskóla sem Menntamálaráðuneytið gefur út (2011,2023). Þar má lesa um þann ramma og aðbúnað fyrir nám og kennslu sem mótast hefur í anda gildandi laga, reglugerða og alþjóðasamninga.

Í aðalnámskránni eru skilgreindir sex grunnþættir menntunar sem mynda kjarna aðalnámskrár. Þeir varða starfshætti, inntak og umhverfi náms á öllum skólastigum og skapa mikilvæga samfellu í íslensku skólakerfi. Grunnþættir eru læsi, sjálfbærni, heilbrigði og velferð, lýðræði og mannréttindi, jafnrétti og sköpun.

Leikurinn

Leikurinn er hornsteinn leikskólastarfsins í Drekadal. Hinn sjálfssprottni leikur barnsins er hið eðlilega tjáningarform þess og um leið einn mikilvægast þáttur í námi og þroska barnsins. Þar lærir barnið margt sem enginn annar getur kennt því. Barnið þroskast hraðast á leikskólaaldri og sá þroski hefur áhrif á allan seinni lífsferil þess. Leikurinn speglar reynsluheim barnanna, menningu og það samfélag sem þau búa í.

Handbók um leikinn

Kenningara John Dewey í leikskólastarfi

John Dewey (1859–1952) lagði áherslu á að börn læri best með því að framkvæma og kanna heiminn í gegnum eigin reynslu. Hugmyndin „Learning by doing“er grunnstoð í hans menntunarhugmyndum. Dewey taldi leikinn vera náttúrulega hvöt barnsins og mikilvægan þátt í þroska og námi. Hann lagði einnig áherslu á virðingu fyrir barni sem einstaklingi og nauðsyn þess að börn fái að spyrja, skoða og vinna sjálfstætt.

Flæði

Leikskólinn Drekadalur hefur hafið innleiðingu á flæðisnálgun í daglegu starf með innblæstri frá kenningum sálfræðingsins Mihaly Csikszentmihalyi og heimspekingsins John Dewey.

• Markmiðið er að skapa umhverfi þar sem börn upplifa djúpa einbeitingu, gleði og virka þátttöku í námi í gegnum leik, sköpun og eigin reynslu.
  • Flæði samkvæmt Csikszentmihalyi er ástand þar sem einstaklingur gleymir sér í verkefni sem er í jafnvægi milli áskorunar og færni. Í leikskólastarfi birtist flæði þegar börn fá að vinna að verkefnum sem vekja áhuga þeirra, eru krefjandi en framkvæmanleg, og leyfa þeim að dýpka einbeitingu og upplifa innri gleði. Flæði stuðlar að aukinni sjálfstjórn, sköpun, vellíðan og dýpri námi.

Útinám – útikennsla

Áhersla með útinámi er að kynna fyrir börnunum nær samfélagið og náttúruna í umhverfinu okkar. Börnin fara í gönguferðir með kennurum þar sem lögð er áhersla á að fræðast um náttúruna og umhverfið, Fylgjast er með breytingum sem verða á gróðri og dýralífi eftir árstíðum, ásamt því að nýta þann efnivið sem á vegi okkar verður. Með útikennslu fá börnin aukna hreyfingu, meira þol og betri hreyfifærni ásamt því að auka einbeitingu og styrkja félagslega færni

Markviss málörvun

Við vinnum með markvissa málörvun þar sem börn fá tækifæri til að tjá sig og segja frá sínum upplifunum. Lögð er rík áhersla á íslenskt mál. Leikskólinn Drekadalur er að vinna að þróunarverkefni sem ber heitið Málþroski og hljóðkerfisvitund leikskólabarna í Drekadal – sögupokar sem kennsluaðferð. Í þróunarverkefninu er lögð áhersla á að efla orðaforða, lesskilning og tjáningu barna, bæði munnlega og í gegnum leik. Börn fá að endursegja sögur, búa til eigin frásagnir og nýta ímyndunaraflið, sem styrkir bæði málskilning og tjáningarhæfni þeirra.

Menntastefnu Reykjanesbæjar

Meginmarkmið menntastefnu Reykjanesbæjar er að skapa öllum börnum og ungmennum í sveitarfélaginu öruggt og hvetjandi umhverfi þannig að þeim líði vel og þau hafi tækifæri til að rækta hæfileika sína og blómstra með opnum hug og gleði í hjarta.

Einkunnarorð Drekadals eru GLEÐI – LEIKUR – VIRÐING – VINÁTTA