305. fundur atvinnu- og hafnarráðs Reykjanesbæjar var haldinn á skrifstofu Reykjaneshafnar að Víkurbraut 11 fimmtudaginn 26. febrúar 2026 kl. 16:00

Viðstaddir: Hjörtur Magnús Guðbjartsson formaður, Alexander Ragnarsson, Kristján Jóhannsson, Sigurður Guðjónsson og Jón Már Sverrisson.

Að auki sat fundinn Halldór Karl Hermannsson, sviðsstjóri atvinnu- og hafnarsviðs.

1. Ársreikningur Reykjaneshafnar 2025 (2026010368)

Farið var yfir stöðuna á endurskoðun ársreiknings Reykjaneshafnar vegna ársins 2025.

2. Reykjaneshöfn – framtíðarsýn 2035 (2025080301)

Lögð er fram í þriðja sinn framtíðarsýn fyrir starfsemi Reykjaneshafnar til komandi tíu ára sem unnin er af stjórn og stjórnendum Reykjaneshafnar, en fyrri skýrslur voru lagðar fram 2022 og 2018. Í skýrslunum er horft fram um tíu ár í starfsemi hafnarinnar og dregnar upp sviðsmyndir sem gætu raungerst gangi áætlaður rekstur og uppbygging hennar eftir. Skýrslunni er ætlað að vera upplýsingagefandi fyrir nýja stjórn Reykjaneshafnar sem tekur við að afloknum komandi sveitarstjórnarkosningum.

Atvinnu- og hafnarráð leggur hér fram skýrsluna „Reykjaneshöfn - framtíðarsýn 2035“ með von um að lesendur hennar fái sem besta innsýn inn í þá möguleika sem falist geta í starfsemi Reykjaneshafnar á komandi árum.

Fylgigögn:

Reykjaneshöfn - framtíðarsýn 2035

3. Njarðvíkurhöfn – brimvarnargarður (2023080391)

Lagðar fram verkfundargerðir 1 og 2 frá 28. janúar og 11. febrúar ásamt verkstöðuyfirlitum.

4. Njarðvíkurhöfn - skipulag (2025110300)

Farið yfir stöðu mála við vinnslu á aðal- og deiliskipulagi í og upp af Njarðvíkurhöfn.

Fylgigögn:

Njarðvíkurhöfn - skipulags- og matslýsing aðalskipulags og deiliskipulags

Njarðvíkurhöfn - vinnslutillaga að breytingu aðalskipulags

Njarðvíkurhöfn - tillaga að deiliskipulagi

5. Helguvíkurhöfn - Suðurbakki (2024040273)

Farið yfir stöðu mála við vinnslu á aðal- og deiliskipulagi á Suðurbakka Helguvíkurhafnar.

Fylgigögn:

Suðurbakki Helguvíkurhafnar - bókun umhverfis- og skipulagsráðs

6. Samstarfsnefnd atvinnu- og hafnarráðs og umhverfis- og skipulagsráðs (2026020457)

Fundargerð 25. fundar samráðsnefndar um þróun hafnarsvæða frá 27. janúar lögð fram.

7. Samgönguáætlun 2026-2040 (2025120114)

Hjörtur Magnús Guðbjartsson, formaður atvinnu- og hafnarráðs, fór sem fulltrúi Reykjaneshafnar á fund umhverfis- og samgöngunefndar Alþingis þann 19. febrúar sl. til að fylgja eftir óskum hafnarinnar um stuðning úr Hafnabótasjóði vegna fyrirhugaðra framkvæmda á komandi árum. Fór hann yfir það sem þar kom fram.

8. Hafnasamband Íslands – fundargerðir stjórnar (2026020458)

Fundargerð 479. fundar stjórnar Hafnasambands Íslands frá 19. janúar 2026 lögð fram.

Fylgigögn:

Fundargerð 479. fundar stjórnar Hafnasambands Íslands 19. janúar 2026

9. Skemmtiferðaskip (2026020459)

Farið var yfir ýmis mál sem snúa að markaðssetningu og móttöku skemmtiferðaskipa hjá Reykjaneshöfn. Þrjú skip hafa bókað komu sína í sumar og er jafnvel von á fleirum. Stefnt er að vinnustofu með hagaðilum á svæðinu miðvikudaginn 11. mars n.k. þar sem þessi mál verða yfirfarin. Þann 12. mars verður aðalfundur Cruise Iceland haldinn í Reykjavík og mun fulltrúi Reykjaneshafnar mæta á fundinn.

10. Fitjar – breyting á deiliskipulagi – umsögn (2026020463)

Laugar ehf. sem stefna að uppbyggingu hótels og heilsuaðstöðu á lóðinni Fitjabakka 8, hafa óskað eftir heimild til breytingar á deiliskipulagi svæðisins þar sem lóðin verði stækkuð um rúma 6 þúsund fermetra og nýtingarhlutfall hennar verði aukið úr 0,66 í 1,46. Bæjarstjórn Reykjanesbæjar samþykkti á fundi sínum þann 7. janúar að auglýsa viðkomandi breytingu á deiliskipulagi og óskaði jafnframt eftir umsögnum eða athugasemdum varðandi þá breytingu.

Atvinnu- og hafnarráð Reykjanesbæjar leggur fram eftirfarandi umsögn: „Reykjaneshöfn hefur í samráði við umhverfis- og skipulagsráð Reykjanesbæjar verið að útfæra nýtt deiliskipulag sem nær yfir svæðið upp af Njarðvíkurhöfn, þar á meðal skipulagið við Fitjabakka. Ofangreind tillaga um breytingu er ekki í samræmi við þær hugmyndir og kemur því á óvart. Sú uppbygging sem fyrirhuguð hefur verið á Fitjabakka 8 er metnaðarfull og jákvæð fyrir samfélagið en það vekur spurningar um hvort óskir um aukið landrými og aukið byggingarmagn séu réttlætanlegar meðan það liggur ekki fyrir hvort innviðir svæðisins geti þjónustað þá stækkun, jafnvel ekki núverandi samþykkt byggingarmagn. Atvinnu- og hafnarráð Reykjanesbæjar telur rétt að heimila ekki viðkomandi breytingu meðan farið verður í heildstætt mat á svæðinu miðað við þá atvinnuuppbyggingu sem æskileg er þar í framtíðinni og að fyrir liggi að þeir innviðir séu til staðar sem til þarf.“

Fylgigögn:

Umsagnarbeiðni frá Skipulagsgátt - Fitjar breyting á deiliskipulagi

Fitjar - tillaga að deiliskipulagsbreytingu

Iceland World Class Wellness Hotel - kynning

11. Carbfix – umsókn um könnunarleyfi í Helguvík – umsögn (2026020464)

Tölvupóstur, dags. 9. febrúar 2026, frá Umhverfis- og orkustofnun þar sem óskað er umsagnar um umsókn Carbfix hf. til stofnunarinnar um könnunarleyfi vegna geymslu CO2 í jörðu í Helguvík.

Carbfix hf. hefur haft leyfi til tilraunavinnslu með geymslu CO2 á iðnaðarsvæðinu í Helguvík undanfarin ár þar sem unnið hefur verið með jarðsjó í stað vatns til framkvæmdarinnar. Eftir því sem best er vitað munu áframhaldandi tilraunir litlu skila umfram þá þekkingu sem þegar er til staðar. Þessi tilraunavinnsla er ekki án ágreinings í samfélaginu og þreifingar um mögulega starfsstöð Carbfix á þessu svæði í framtíðinni hafa ekki notið mikils hljómgrunns. Atvinnu- og hafnarráð leggst gegn því að viðkomandi könnunarleyfi verði veitt nema fyrir liggi samþykki sveitarfélagsins fyrir því að heimilt verði að byggja aðstöðu fyrir þessa vinnslu á svæðinu í framtíðinni.

Fylgigögn:

Beiðni um umsögn vegna umsóknar um könnunarleyfi

Umsókn um könnunarleyfi vegna geymslu CO2

12. Særós GK 235, skipaskránúmer 1927 (2026020467)

Reykjaneshöfn eignaðist farþegabátinn Særósu GK 235, skipaskránúmer 1927, á uppboði í desember sl. Báturinn var auglýstur til sölu í lok janúar og hafa borist nokkur tilboð í bátinn.

Atvinnu- og hafnarráð samþykkir að taka tilboði Arctic Whales ehf. og felur Halldóri Karli Hermannssyni, sviðsstjóra atvinnu- og hafnarsviðs, að vinna málið áfram.

13. Upplýsingagjöf sviðsstjóra (2026010379)

Halldór K. Hermannsson, sviðsstjóri atvinnu- og hafnarsviðs, fór yfir stöðu ýmissa mála er varða starfsemi sviðsins.

Fleira ekki gert og fundi slitið kl. 18:15. Fundargerðin fer til afgreiðslu bæjarstjórnar 3. mars 2026.