1574. fundur bæjarráðs Reykjanesbæjar, haldinn að Grænásbraut 910, 13. ágúst 2026, kl. 08:00

Viðstaddir: Gunnlaugur Kárason formaður, Guðný Birna Guðmundsdóttir, Halldóra Fríða Þorvaldsdóttir, Kristján Pétur Kristjánsson og Margrét Þórarinsdóttir.

Að auki sátu fundinn Vilhjálmur Árnason bæjarstjóri og Hrefna Gunnarsdóttir ritari.

1. Vatnsnesvegur 8 - veðsetning KEF ehf. á 49% hlut sínum (2026080004)

Unnar Steinn Bjarndal bæjarlögmaður situr fundinn undir þessum dagskrárlið.
Lögð fram beiðni um heimild til veðsetningar á eignahlut KEF ehf. á eigninni Vatnsnesvegi 8 (F2091091), 230 Reykjanesbæ.

Bókun minnihluta bæjarráðs:

„Bæjarfulltrúar Framsóknar og Samfylkingar geta ekki samþykkt beiðni um heimild til veðsetningar á Vatnsnesvegi 8.

Í dánargjafabréfi Bjarnfríðar Sigurðardóttur dagsettu 25. febrúar 1969 kemur fram að óheimilt er að veðsetja eignina að Vatnsnesvegi 8. Í samstarfssamningi Reykjanesbæjar og KEF ehf. sem undirritaður var 11. október 2022 stendur einnig orðrétt „Í niðurlagi dánargjafar Bjarnfríðar kemur fram að óheimilt sé að selja, gefa eða veðsetja eignina.“ Hér liggur fyrir að sérstaklega hefur verið kveðið á um bann við veðsetningu og að samstarfssamningurinn frá 2022 staðfestir þá túlkun.

Þó meginreglan sé almennt sú að eigandi eignarhlutar geti ráðstafað honum að vild þá verður ekki séð að heimilt sé að samþykkja veðsetningu 49% eignarhlutar KEF ehf. í Vatnsneshúsinu þar sem hún samræmist ekki þeim kvöðum og takmörkunum sem hvíla á eigninni samkvæmt dánargjafabréfi og samstarfssamningi.

Það er því mat okkar að ekki verði hægt að fallast á að veðsetning í Vatnsneshúsinu sé heimil. Áður en slík ráðstöfun yrði samþykkt þyrfti a.m.k. að liggja fyrir skýr lagaleg heimild fyrir því að víkja frá þeim kvöðum sem leiða af dánargjafabréfinu og samstarfssamningnum.“

Halldóra Fríða Þorvaldsdóttir Framsóknarflokki og Guðný Birna Guðmundsdóttir Samfylkingu.

Fundarhlé sett kl. 8:35
Fundur aftur settur kl. 9:02

Bókun meirihluta bæjarráðs:

„Fyrir liggur þinglýst eignarheimild minnihlutaeiganda og á grundvelli hennar er honum heimilt að veðsetja sinn hluta og nær sú veðsetningarheimild ekki til eignarhluta sveitarfélagsins. Engar kvaðir hvíla á eigninni um að óheimilt sé að veðsetja fasteignina.

Enn á ný byggir því minnihlutinn bókanir sínar á röngum forsendum og misskilningi á málum.

Minnihlutinn leggur nú til að hafna beiðni minnihlutaeigenda fasteignarinnar um veðsetningarheimild með vísan til gjafabréfs fasteignarinnar til Reykjanesbæjar, þar sem kveðið var á um að gefanda væri óheimilt að selja, veðsetja eða gefa fasteignina eftir afhendingu hennar til sveitarfélagsins.

Í dánargjafabréfinu segir orðrétt:

„Óheimilt er mér að selja, gefa eða veðsetja eign þessa svo að í bága komi við gerning þennan“

Það fer því ekki á milli mála af orðalagi dánargjafabréfsins að Bjarnfríði Sigurðardóttur var óheimilt að veðsetja eignina. Sú takmörkun gildir einfaldlega ekki í dag, enda er Bjarnfríður ekki eigandinn.

Þrátt fyrir að núverandi minnihluti vísi til þessa sama skjals tóku fulltrúar hans, þegar þeir sátu í meirihluta, ákvörðun um að selja 49% eignarhlut í fasteigninni. Sú ráðstöfun gekk mun lengra en sú veðsetningarheimild sem nú er til umfjöllunar.“

Gunnlaugur Kárason Miðflokki og Margrét Þórarinsdóttir og Kristján Pétur Kristjánsson Sjálfstæðisflokki.

Fundarhlé sett kl. 9:04
Fundur aftur settur kl. 9:13

Bókun minnihluta bæjarráðs:

„Í máli er varðar veðsetningu á hluta Vatnsnesshússins er alveg rétt að minnihluta eiganda er heimilt að veðsetja sinn hluta eignarinnar, um það deilum við ekki.

Þó er til grundavallar málsins dánargjafabréf fyrrum eiganda og samstarfssamningur Reykjanesbæjar við KEF ehf. Þar kemur fram að óheimilt sé að selja, gefa eða veðsetja eignina. Sú fullyrðing er tvíþætt, þ.e. það flækir samþykki sveitarfélagsins að heimila minnihluta eiganda veðsetninguna en einnig sölu hússins til hans á sínum tíma. Að því liggja þó fyrir rök sveitarfélagsins sem byggja á samkomulagi við landeigendur, Vatnsnesbúið landeigendafélag sf. frá árinu 2021 auk ákvörðun bæjarstjórnar á þeim tíma að fara umrædda leið til að stuðla að uppbyggingu og viðhaldi hússins. Sala hússins var gerð í samráði við landeigendur, bæjarlögmann og lögfræðistofuna Lögmenn Suðurlands. Þar er ekki tekið sérstaklega á veðsetningu hússins og á því byggjum við okkar afstöðu í málinu.“

Guðný Birna Guðmundsdóttir Samfylkingu og Halldóra Fríða Þorvaldsdóttir Framsókn.

Fundarhlé sett kl. 9:38
Fundur aftur settur kl. 9:42

Beiðnin samþykkt 3-2. Meirihluti bæjarráðs Gunnlaugur Kárason Miðflokki, Margrét Þórarinsdóttir og Kristján Pétur Kristjánsson Sjálfstæðisflokki samþykkja beiðnina. Halldóra Fríða Þorvaldsdóttir Framsóknarflokki og Guðný Birna Guðmundsdóttir Samfylkingu greiða atkvæði á móti.

2. Undirkjörstjórn - breyting á útreikningi launa (2026080014)

Iðunn Kristín Grétarsdóttir, forstöðumaður launa- og kjaradeildar, situr fundinn undir þessum dagskrárlið.

Lagðar til breytingar á útreikningi launa fyrir vinnu undirkjörstjórnar við kosningar sem munu þá taka kjarasamningsbundna hækkun launa 1. apríl ár hvert.

Bæjarráð samþykkir 5-0.

3. Launað námsleyfi - verklagsregla (2026060125)

Iðunn Kristín Grétarsdóttir, forstöðumaður launa- og kjaradeildar, situr fundinn undir þessum dagskrárlið.

Lögð fram drög að verklagsreglu um launað námsleyfi starfsfólks Reykjanesbæjar.

Bæjarráð samþykkir 5-0 framlögð drög.

4. Starf sviðsstjóra velferðarsviðs (2026080010)

Kristín Þórdís Þorgilsdóttir mannauðsstjóri situr fundinn undir þessum dagskrárlið

Lögð fram uppfærð drög að áætlun um ráðningarferli í starf sviðsstjóra velferðarsviðs Reykjanesbæjar ásamt matsramma.

Bæjarráð samþykkir 5-0 framlögð drög og matsramma.

5. Fjárhagsáætlun 2027 - tekjuáætlun (2026070036)

Lagt fram minnisblað um áætlaðar skatttekjur Reykjanesbæjar 2027.

Bæjarráð mun vinna nánar með tillögur og upplýsingar um skatttekjur í fjárhagsáætlunargerð sveitarfélagsins fyrir árið
2027.

Fylgigögn:

Forsendur fjárhagsáætlana sveitarfélaga 2027-2031

6. Kosningar í nefndir/stjórnir sbr. 58. gr. samþykktar um stjórn Reykjanesbæjar (2026060015)

Uppbyggingarsjóður Suðurnesja:

Tilnefnt er sem aðalmaður Hólmfríður Jennýjar Árnadóttir (B) og sem varamaður Eva Stefánsdóttir (B). Samþykkt 5-0.

Menntaráð:

Hólmfríður Jennýjar Árnadóttir (B) fer út sem varamaður, Ásta María Guðmundsdóttir (B) kemur inn sem varamaður.

Atvinnu- og hafnarráð:

Ásta María Guðmundsdóttir (B) fer út sem varamaður, Hólmfríður Jennýjar Árnadóttir (B) kemur inn sem varamaður.

7. Viðauki við fjárhagsáætlun - flutningur á milli deilda (2025060320)

Málinu frestað.

8. Úttektir á fjármálum og stjórnsýslu Reykjanesbæjar (2026070070)

Málinu frestað.

9. Lóðaframboð fyrir leiguhúsnæði (2026060438)

Málinu frestað.

10. Umsögn vegna rekstrarleyfis gististaðar - Antycyponek ehf., Hafnargata 76 (2026070292)

Erindi Sýslumannsins á Suðurnesjum vegna umsóknar um rekstur gististaðar í flokki II – Minna gistiheimili. Lögð fram umsögn byggingarfulltrúa Reykjanesbæjar. Bæjarráð hafnar umsókninni með vísan til fyrirliggjandi umsagnar.

11. Umsagnarmál í samráðsgátt (2026010453)

Áform um skipulagsbreytingar lögreglunnar
Með því að smella hér opnast umsagnarmál í samráðsgátt

Á 1574. fundi bæjarráðs Reykjanesbæjar sem haldinn var þann 13. ágúst 2026 var fjallað um mál nr. S-138/2026 í samráðsgátt stjórnvalda, skipulagsbreytingar lögreglunnar.

Bæjarráð Reykjanesbæjar tekur heilshugar undir bókun stjórnar Sambands sveitarfélaga á Suðurnesjum er varðar mögulegar breytingar á skipan lögregluembætta.

Bókun SSS var svohljóðandi:

„Umsögn þessi var samþykkt á 825. fundi stjórnar Sambands sveitarfélaga á Suðurnesjum, dags. 12. ágúst 2026.

Samband sveitarfélaga á Suðurnesjum (S.S.S.) leggst eindregið gegn því að embætti lögreglustjórans á Suðurnesjum verði sameinað öðru lögregluembætti og að sjálfstæð stjórnun þess verði lögð niður.

S.S.S. tekur undir að mikilvægt sé að starfsemi lögreglu þróist í takt við breyttar aðstæður, að samstarf lögregluembætta sé eflt og sameiginlegir innviðir nýttir þar sem slíkt leiðir sannanlega til betri þjónustu, aukins öryggis og skilvirkari nýtingar fjármuna. Slík markmið réttlæta hins vegar ekki að litið sé fram hjá þeirri sérstöðu sem starfsemi lögreglunnar á Suðurnesjum hefur og því mikilvæga hlutverki sem embættið gegnir fyrir öryggi landsins alls.

Sérstaða Suðurnesja

Suðurnes gegna einstöku hlutverki í landamæragæslu, löggæslu og öryggismálum Íslands. Á svæðinu er Keflavíkurflugvöllur, langstærsta alþjóðlega samgöngugátt landsins, auk mikilvægra innviða sem tengjast öryggis- og varnarmálum þjóðarinnar.

Verkefni lögreglunnar á Suðurnesjum eru því bæði að umfangi og eðli frábrugðin verkefnum flestra annarra lögregluembætta. Samhliða almennri löggæslu í ört vaxandi samfélagi sinnir embættið umfangsmiklum verkefnum tengdum landamæraeftirliti, Keflavíkurflugvelli, alþjóðlegu samstarfi, almannavörnum og viðbrögðum við náttúruvá.

Að mati S.S.S. verður skipulag lögreglu að taka mið af þessari sérstöðu. Ekki er nægjanlegt að leggja sama skipulagslíkan að jöfnu yfir landið án þess að lagt sé sérstakt mat á þær þjóðaröryggislegu og samfélagslegu aðstæður sem eru fyrir hendi á Suðurnesjum.

Stjórn og ákvarðanataka verði áfram á svæðinu

S.S.S. leggur ríka áherslu á að stjórn, ábyrgð og ákvarðanataka vegna þessara mikilvægu verkefna verði áfram staðsett á Suðurnesjum, þar sem þekking, reynsla og samstarfstengsl hafa byggst upp til margra ára.

Í fyrirliggjandi áformum er gert ráð fyrir að þar sem embætti verði sameinuð geti aðstoðarlögreglustjóri tryggt nálægð við ákvarðanatöku. S.S.S. telur að slíkt fyrirkomulag geti ekki án frekari rökstuðnings talist jafngilt því að á svæðinu starfi sjálfstæður lögreglustjóri með fullt stjórnunarumboð, ábyrgð og beina aðkomu að stefnumótandi ákvörðunum.

Því fjær sem yfirstjórn og endanlegt ákvörðunarvald færist frá Suðurnesjum, þeim mun meiri verður hættan á að sérþekking svæðisins fái minna vægi við ákvarðanatöku og að viðbragðsgeta og sveigjanleiki skerðist.

Það væri að mati S.S.S. sérstaklega varhugavert við núverandi aðstæður. Alþjóðlegt öryggisumhverfi hefur orðið flóknara, umfang starfsemi á Keflavíkurflugvelli er mikið og mikilvægi Íslands í öryggis- og varnarmálum hefur aukist.

Reynslan af almannavarnaverkefnum á Reykjanesskaga

Atburðir síðustu ára á Reykjanesskaga sýna með afgerandi hætti hversu mikilvægt er að öflug stjórnun og viðbragðsgeta sé til staðar á svæðinu sjálfu.

Lögreglan á Suðurnesjum hefur gegnt lykilhlutverki í einhverju umfangsmesta og langvinnasta almannavarnaverkefni síðari ára vegna jarðhræringa og eldsumbrota á Reykjanesskaga. Við þær aðstæður hefur reynt á staðbundna þekkingu, skjót viðbrögð, samfellu í stjórnun og náið samstarf við sveitarfélög og aðra viðbragðsaðila.

Embættið hefur jafnframt byggt upp umfangsmikið samstarf við sveitarfélögin á Suðurnesjum, Isavia, almannavarnir, Landhelgisgæsluna og aðra lykilaðila. Slíkt samstarf verður ekki metið eingöngu út frá fjölda stjórnenda eða stærð stjórnsýslueininga. Það byggir á trausti, þekkingu á staðbundnum aðstæðum og reynslu sem hefur skapast yfir langan tíma.

Á sama tíma hefur embættið þurft að starfa við ófullnægjandi húsnæðisaðstöðu og lengi hefur verið fyrirhuguð uppbygging nýrrar lögreglustöðvar í Reykjanesbæ. Að mati S.S.S. ætti forgangsverkefni stjórnvalda nú að vera að tryggja lögreglunni á Suðurnesjum viðunandi starfsaðstöðu, nægjanlegt bolmagn og stöðugleika til framtíðar fremur en að skapa frekari óvissu um yfirstjórn og skipulag embættisins.

Krafa um sérstakt áhrifamat

Áður en ákvörðun verður tekin um framtíð embættis lögreglustjórans á Suðurnesjum telur S.S.S. því nauðsynlegt að lagt verði sérstakt mat á áhrif mögulegrar sameiningar á:

• öryggi og viðbragðsgetu á Suðurnesjum,
• landamæraeftirlit og starfsemi á Keflavíkurflugvelli,
• almannavarnir og viðbrögð við náttúruvá á Reykjanesskaga,
• þjónustu við íbúa og fyrirtæki á svæðinu,
• samstarf lögreglu við sveitarfélög og aðra viðbragðsaðila,
• varðveislu sérþekkingar og mannauðs innan embættisins,
• stjórnun, boðleiðir og hraða ákvarðanatöku við neyðaraðstæður,
• áhrif breytinganna á þjóðaröryggi.

Niðurstaða

S.S.S. telur að sameining embættis lögreglustjórans á Suðurnesjum við annað embætti muni ekki bæta þjónustu, auka öryggi eða styrkja viðbragðsgetu á svæðinu. Ekki er heldur nægjanlegt að gera ráð fyrir að aukin stærð stjórnsýslueiningar leiði sjálfkrafa til aukinnar skilvirkni þegar verkefni embættisins eru jafn sérhæfð og raun ber vitni.

Með vísan til framangreinds leggst Samband sveitarfélaga á Suðurnesjum eindregið gegn því að embætti lögreglustjórans á Suðurnesjum verði lagt niður sem sjálfstætt lögregluembætti eða sameinað öðru embætti.

S.S.S. telur þvert á móti brýnt að áfram verði byggt upp öflugt og sjálfstætt lögregluembætti á Suðurnesjum með þá stjórn, heimildir, mannafla, sérþekkingu og starfsaðstöðu sem nauðsynleg er til að sinna einu mikilvægasta landamæra-, almannavarna- og öryggissvæði Íslands.

S.S.S. leggur jafnframt áherslu á að sveitarfélögin á Suðurnesjum og Samband sveitarfélaga á Suðurnesjum verði höfð með í virku og raunverulegu samráði áður en frekari ákvarðanir verða teknar um skipulag lögreglu á svæðinu.

Samband sveitarfélaga á Suðurnesjum áskilur sér rétt til að koma frekari sjónarmiðum á framfæri eftir því sem útfærsla fyrirhugaðra breytinga skýrist og að skila ítarlegri umsögn verði frumvarp þess efnis lagt fram.“

12. Aðalfundur Samtaka orkusveitarfélaga 21. ágúst 2026 (2026080050)

Aðalfundarboð Samtaka orkusveitarfélaga lagt fram. Bæjarráð felur Gunnlaugi Kárasyni formanni bæjarráðs að fara með atkvæði Reykjanesbæjar á fundinn.

Kjörnefnd óskar eftir framboðum til formanns stjórnar og til stjórnar- og varastjórnar samtakanna sbr. meðfylgjandi erindi frá kjörnefnd. Framboð skulu berast eigi síðar en 13. ágúst nk.

Fleira ekki gert og fundi slitið kl. 10:50. Fundargerðin fer til afgreiðslu bæjarstjórnar 18. júní 2026.