1575. fundur bæjarráðs Reykjanesbæjar, haldinn að Grænásbraut 910 - Seltjörn, 20. ágúst 2026, kl. 08:00

Viðstaddir: Gunnlaugur Kárason formaður, Alexander Ragnarsson, Guðný Birna Guðmundsdóttir, Halldóra Fríða Þorvaldsdóttir og Kristján Pétur Kristjánsson.

Að auki sátu fundinn Vilhjálmur Árnason bæjarstjóri og Hrefna Gunnarsdóttir ritari.

Margrét Þórarinsdóttir boðaði forföll, Alexander Ragnarsson sat fyrir hana.

1. Viðauki við fjárhagsáætlun - skammtímavistun fatlaðra barna (2025060320)

Hera Ósk Einarsdóttir sviðsstjóri velferðarsviðs situr fundinn undir þessum dagskrárlið.

Lögð fram beiðni um viðauka samkvæmt bókun frá fundi velferðarráðs þann 13. ágúst sl.

Bókun minnihluta bæjarráðs:

„Við þökkum sviðsstjóra fyrir nánari upplýsingar um málið og fögnum því að sviðsstjóri velferðarsviðs hafi unnið áfram að þessu mikilvæga máli og styðjum fyrirhugað aukið samstarf Reykjanesbæjar, Suðurnesjabæjar og Voga um tímabundna fjölgun plássa í skammtímavistun barna í Heiðarholti.

Hér er um mikilvægt fjölskyldumál að ræða enda samþykktum við fyrr á árinu 25% auka stöðugildi á Heiðarholti til að fjölga plássum. Um 20 börn eru á biðlista eftir skammtímavistun og um helmingur þeirra kemur frá Reykjanesbæ. Með þessari tímabundnu lausn skapast tækifæri til að mæta fleiri börnum og auka þjónustu við þau sem nú þegar njóta hennar. Þetta er mikilvægt skref í þeirri vinnu sem hófst á síðasta kjörtímabili með það að markmiði að draga úr því mikla álagi sem skortur á þjónustu getur lagt á fjölskyldur fatlaðra barna.

Við viljum ítreka mikilvægi þess að áhersla verði lögð á að vinna áfram að framtíðarsýn í málaflokknum og að byggt verði á þeirri vinnu sem unnin hefur verið um varanlegt fyrirkomulag og uppbyggingu fjölbreyttrar þjónustu við fjölskyldur í Reykjanesbæ.

Til að fjármagna hlut Reykjanesbæjar, 8.325.005,- kr. á árinu 2026, leggja fulltrúar Framsóknar og Samfylkingar til að fallið verði frá launahækkunum kjörinna fulltrúa sem tóku gildi um síðustu mánaðamót og að fjármagnið verði nýtt þess í stað í þessa mikilvægu þjónustu við börn og fjölskyldur.

Þetta er í samræmi við áherslur okkar, bæði á síðasta kjörtímabili og því sem nú er hafið, um fjölskylduvænt samfélag með eflingu lögskyldrar grunnþjónustu til að bregðast við raunverulegum þörfum íbúa.“

Halldóra Fríða Þorvaldsdóttir Framsókn og Guðný Birna Guðmundsdóttir Samfylkingu.

Fundarhlé sett kl. 8:23
Fundur aftur settur kl. 8:28

Bókun meirihluta bæjarráðs:

„Meirihlutinn tekur undir bókun minnihlutans, að undanskildu því hvernig lagt er til að viðaukinn verði fjármagnaður.
Unnið er að þarfagreiningu vegna þessarar mikilvægu starfsemi sveitarfélagsins sem mun leggja grunn að framtíðarstefnumörkun í málaflokknum.“

Gunnlaugur Kárason Miðflokki og Kristján Pétur Kristjánsson og Alexander Ragnarsson Sjálfstæðisflokki.

Beiðni velferðarráðs um viðauka vegna skammtímavistun fatlaðra barna er samþykkt 5-0.

Í bókun minnihluta er lögð til önnur leið um fjármögnun. Minnihluti lagði til að viðaukinn yrði fjármagnaður af launalykli nefnda og ráða. Meirihlutinn hafnar þeirri tillögu 3-2.

Meirihluti samþykkir 3-2 að kostnaði að fjárhæð 8.325.005,- kr. verður mætt með viðauka við fjárhagsáætlun 2026 og fjárheimild færð á 02591-4510 á móti útsvarstekjum umfram fjárhagsáætlun á 00010-0020.

2. Viðauki við fjárhagsáætlun - flutningur á milli deilda (2025060320)

Svar við spurningu fulltrúa Framsóknarflokks og Samfylkingar frá fundi bæjarráðs nr. 1572 þann 23. júlí, 2026.

Fyrirspurn sem minnihluti bæjarráðs lagði fram á fundi bæjarráðs 23. júlí 2026:

Fulltrúar Framsóknar og Samfylkingar óska svara þar sem stjórn eignasjóðs var ekki inni í skjalinu hjá fjármálastjóra, þarf að kanna hvort það séu ónýttar fjárheimildir þar fyrir 2026 og einnig varðandi fjölda funda hjá umhverfis og framkvæmdaráði, hvort ráðið muni funda einu sinni eða tvisvar sinnum í mánuði.

Svar meirihluta bæjarráðs við fyrirspurn:

Ónýttar fjárheimildir í eignasjóði vegna nefndastarfa námu 2.644.018,- kr. en voru ekki færðar yfir á umhverfis- og framkvæmdaráð þar sem ekki var talin þörf á því að svo stöddu. Flutningur fjárheimilda milli annarra nefnda og ráða dekka nefndarlaun og launatengd gjöld sbr. töflu hér að neðan. Reiknað er með því að umhverfis- og framkvæmdaráð fundi einu sinni í mánuði en í fjárhagsáætlunargerðinni gætu orðið aukafundir og þá eru ónýttar fjárheimildir í eignasjóði til að hlaupa upp á.

3. Úttektir á fjármálum og stjórnsýslu Reykjanesbæjar (2026070070)

Svör við fyrirspurn sem minnihluti bæjarráðs lagði fram á fundi bæjarráðs 23. júlí 2026:

1. Getur meirihlutinn upplýst á hvaða fundi eða með hvaða formlega hætti pólitísk ákvörðun var tekin um að aflétta frystingu launa kjörinna fulltrúa sem gilt hefur frá 2023?

Þrátt fyrir að þessari fyrirspurn hafi verið svarað á síðasta fundi er meirihlutanum ljúft og skylt að leiðrétta misskilning minnihlutans enn og aftur.

Spurt er hvenær ákvörðun hafi verið tekin um hækkun launa kjörinna fulltrúa en slíkt byggir á röngum forsendum. Launakjör kjörinna fulltrúa fylgja gildandi samþykktum sem tengja þau við þingfararkaup og stjórnsýslan framkvæmir þær reglur þegar breytingar verða. Engin sérstök ákvörðun var því tekin af hálfu meirihlutans. Hefði hins vegar átt að víkja frá gildandi reglum og frysta launin hefði þurft sérstaka ákvörðun þar að lútandi.

2. Telur meirihlutinn að rétt sé, við núverandi fjárhagsaðstæður og á sama tíma og stöðugt er kallað eftir aðhaldi í rekstri sveitarfélagsins, að fyrsta stóra ákvörðunin um kjör kjörinna fulltrúa sé hækkun á eigin launum þar sem engin hækkun hefur átt sér stað og umrædd hækkun er gerð á miðju ári og ekki gert ráð fyrir hækkuninni innan fjárhagsáætlunar ársins?

Ein af forsendum fyrir fjárhagsáætlunargerð ársins 2026 var að öll laun voru hækkuð um 4% og þar með talið nefndarlaun. Ef reiknuð eru nefndarlaun fyrir bæjarstjórn og öll ráðin fyrir 1.7. til 31.12 2026 miðað við hækkun 1. júlí gera það 80.231.254,- kr. með launatengdum gjöldum, á móti eru ónýttar fjárheimildir bæjarstjórnar og ráða sem þann 1. júlí námu 86.476.706,- krónum. Hækkunin er því innan fjárheimilda.

Bókun minnihluta bæjarráðs:

„Á síðasta kjörtímabili var gert heiðursmannasamkomulag í bæjarráði eins og áður hafði verið gert um að frysta laun kjörinna fulltrúa um óákveðinn tíma og taka ekki inn árlega hækkun sem tengist hlutfalli af þingfararkaupi. Sú ákvörðun var tekin af bæjarráði í heild sinni með það að markmiði að sýna hófsemi og ábyrgð. Þrátt fyrir að þingfararkaup taki breytingum árlega var ekki talið sjálfgefið að laun kjörinna fulltrúa sveitarfélagsins ættu að hækka í samræmi við það. Pólitísk ákvörðun meiri- og minnihluta var því tekin árið 2023 og hefur staðið síðan.

Þar sem virðist vera misskilningur um að þetta samkomulag hafi verið gert og að bæjarráð hafi þurft að taka sérstaka ákvörðun um slíkt þá má benda á að fyrrum bæjarráðsmaður Umbótar sem er núverandi bæjarráðsmaður Sjálfstæðisflokksins lagði sérstaka áherslu á þessa ákvörðun í bókun hennar undir máli um hagræðingu innan stjórnsýslu Reykjanesbæjar á 1522. fundi bæjarráðs þann 3. júlí 2025 en þar segir: "Kjörnir fulltrúar hafa ekki hækkað laun sín frá 2023 og hafa ekki fengið lögbundna hækkun þingfararkaups fyrir 2024 og 2025, en hafa þannig lagt sitt af mörkum til að bæta reksturinn."

Mikilvægt er að taka fram að launahækkun er ekki óhjákvæmileg afleiðing þess að þingfararkaup hækkar. Það getur einnig verið pólitísk ákvörðun að láta slíka breytingu ekki ganga yfir á laun kjörinna fulltrúa þrátt fyrir að nú sé öðru haldið fram. Skýr skilaboð voru gefin launadeild þegar ákvörðunin var tekin og af þeim sökum voru laun kjörinna fulltrúa ekki hækkuð í samræmi við þingfararkaup 1. júlí árin 2024 og 2025. Ekki þurfti að taka nýja ákvörðun um það, enda stóð fyrri ákvörðun samþykkt af bæjarráði. Það hefði því verið eðlilegra að leggja fram tillögu um afléttingu frystingar fyrir bæjarráð til afgreiðslu.

Þrátt fyrir að hafa lagt niður menningar- og þjónusturáð, stjórn eignasjóðs, lýðheilsuráð og sjálfbærniráð býður nýr meirihluti upp á hækkun á launum kjörinna fulltrúa upp á um 15 milljónir króna . Föst laun og nefndarlaun hækka um 21% sem er langt umfram launaþróun á almennum og opinberum vinnumarkaði.

Föst mánaðarlaun formanns bæjarráðs og greiðslur til hans eingöngu vegna bæjarráðsfunda hækka hins vegar um 65% eða um 460 þúsund á mánuði eða um rúmar 5,5 milljónir á ári. Þetta er í algeru ósamræmi við það að ætla að fara betur með almannafé. Í fyrsta skipti í sögu Reykjanesbæjar er búið að gera starf formanns bæjarráðs að fullu starfi.

Það að finna svigrúm innan fjárheimilda sveitarfélagsins þýðir ekki að eyða þurfi öllu fjármagni sem til er og allra síst að nýta það til eigin launahækkana. Ábyrg fjármálastjórn felst í því að forgangsraða, sýna hófsemi og nýta fjármuni þar sem þörfin er mest. Þegar hægt er að velja á milli verulegrar hækkunar eigin launa, að skila jákvæðu og sterku ársuppgjöri bæjarsjóðs eða nýta fjármunina í brýn verkefni með hag íbúa að leiðarljósi teljum við að eigin kjör eigi alltaf að mæta afgangi.

Nýr meirihluti hefur verið duglegur að slá um sig með 10 milljóna króna „hagræðingu“ með því að leggja niður fjórar nefndir og stofna eina nýja. Með þessari ákvörðun um hækkun eigin launa um 15 milljónir er strax kominn 5 milljóna halli og þá er ekki meðtalinn allur sá kostnaður sem búið er að verja í að stækka skrifstofu bæjarstjóra. Ekkert getur breytt því einfalda reikningsdæmi.“

Halldóra Fríða Þorvaldsdóttir Framsókn og Guðný Birna Guðmundsdóttir Samfylkingu.

Bókun meirihluta bæjarráðs:

„Það hefði farið betur á því að minnihlutinn hefði haft sambærilegar áhyggjur af launakostnaði kjörinna fulltrúa á síðasta kjörtímabili, vegna greiðslna einstaka kjörinna fulltrúa og umfangs nefndarlauna. Þá hefði jafnframt verið rétt að ganga frá nauðsynlegum breytingum á reglum um launagreiðslur til kjörinna fulltrúa, hafi ætlunin verið að þær ákvarðanir sem þá voru teknar skyldu gilda til framtíðar.“

Gunnlaugur Kárason Miðflokki, Kristján Pétur Kristjánsson og Alexander Ragnarsson Sjálfstæðisflokki.

4. Lóðaframboð fyrir leiguhúsnæði (2026060438)

Svör við fyrirspurn sem minnihluti bæjarráðs lagði fram á fundi bæjarráðs 23. júlí 2026:

1. Í kosningabaráttunni boðaði meirihlutinn að fólk sem býr í félagslegu húsnæði fengi tækifæri til að kaupa íbúðir sínar. Hvernig hyggst meirihlutinn útfæra það og hvenær mega íbúar eiga von á tillögum þar að lútandi?

Þetta er eitt af þeim málum sem kveðið er á um í málefnasáttmála meirihlutans og fellur vel að þeirri stefnu okkar að fleiri íbúar fái tækifæri til að eignast eigið heimili. Nú þegar fólk fer að skila sér úr sumarleyfum mun hefjast vinna við að skoða hvernig best sé að útfæra fjölbreyttar leiðir til að hjálpa fólki að eignast sitt eigið heimili á skynsaman og ábyrgan hátt.

2. Hyggst meirihlutinn auglýsa sérstaklega lóðir fyrir óhagnaðardrifin leigufélög eða verða þau í samkeppni við almenna verktaka um allar lóðir?

Engin ákvörðun hefur verið tekin um það að svo stöddu.

3. Hefur meirihlutinn sett sér markmið um fjölgun félagslegra íbúða á kjörtímabilinu?

Meirihlutinn er ekki með það að markmiði að fjölga félagslegum íbúðum. Meirihlutinn ítrekar að hann hyggst stórauka lóðaframboð í Reykjanesbæ og við skipulag og úthlutun nýrra lóða verður tekið mið af þörfum félagslegs húsnæðis samhliða annarri uppbyggingu. Með auknu lóðaframboði og afnámi innviðagjalda, þegar að því kemur, vill meirihlutinn stuðla að hagkvæmari húsnæðisuppbyggingu og auðvelda fólki úr öllum stéttum að eignast eigið heimili.

Við þá vinnu verður haft náið samráð við hagaðila til að tryggja sem bestar lausnir. Undirbúningur er þegar hafinn og meirihlutinn hlakkar til að kynna nýjar lóðir og uppbyggingartækifæri á kjörtímabilinu.

4. Er gert ráð fyrir sérstökum lóðum eða verkefnum fyrir íbúðir fatlaðs fólks eða er aðeins verið að vísa til almennrar uppbyggingar?

Meirihlutinn leggur áherslu á öfluga velferðarþjónustu og að styðja við sjálfstæða búsetu. Við skipulag og uppbyggingu verður tekið mið af þörfum fatlaðs fólks, líkt og annarra íbúa sveitarfélagsins.

Samkvæmt upplýsingum frá velferðarsviðinu kemur eftirfarandi fram:

„Reykjanesbær og Brynja leigufélag gerðu með sér viljayfirlýsingu um uppbyggingu á íbúðum fyrir öryrkja í Reykjanesbæ 2022–2026 og var viljayfirlýsingin undirrituð 10. janúar 2023.

Í viljayfirlýsingunni er lögð áhersla á félagslega blöndun og Brynja leigufélag horfir til þess að ríflega tvöfalda eignasafn sitt í Reykjanesbæ, að því gefnu að ríkið og sveitarfélag séu tilbúin að styðja við þá uppbyggingu með stofnframlögum.

Lögð er áhersla á:
• Stakar íbúðir í stærri fjölbýlishúsum
• Minni fjölbýli með góðu aðgengi fyrir fatlaða
• Raðhús (6–8 íbúðir) með góðu aðgengi fyrir fatlaða

Samkomulagið felur í sér að Brynja leigufélag bæti við sig 37 íbúðum á framangreindu tímabili og að íbúðasafn Brynju leigufélags við lok tímabilsins verði samtals 64 íbúðir. Í viljayfirlýsingunni eru eftirfarandi markmið sett fram:

2022: 2 íbúðir í dreifðu eignarhaldi (a+b)
2023: 7 íbúða raðhús fyrir sértæka búsetu við Stapavelli – afhending í júlí 2023 (c) 5 íbúðir í dreifðu eignarhaldi (a+b)
2024: 7 íbúðir í dreifðu eignarhaldi (a+b)
2025: 7 íbúða raðhús fyrir sértæka búsetu (á eftir að útvega lóð) (c)
2026: 7 íbúðir í dreifðu eignarhaldi (a+b)

Breytingar urðu á fyrirhuguðu 7 íbúa raðhúsi fyrir sértæka búsetu sem stefnt var að 2025. Fyrirhugað var að það sértæka búsetuúrræði yrði byggt á Ásbrú sem varð ekki úr og var Brynju leigufélagi í staðinn úthlutað raðhúsalóð í Álfadal í Njarðvík. Skv. viljayfirlýsingunni skal stefnt að því að endurnýja hana fyrir 31. ágúst 2026.

Skv. upplýsingum frá skipulagsfulltrúa Gunnari Kr. Ottóssyni eru önnur óhagnaðardrifin íbúðarfélög/leigufélög ekki með umsóknir um lóðir hjá sveitarfélaginu.“

5. Ef félagslegar íbúðir verða seldar til núverandi leigjenda, hvernig hyggst meirihlutinn tryggja að framboð félagslegs húsnæðis dragist ekki saman og að þeir sem eru á biðlista sitji ekki eftir?

Það er eitt af þeim atriðum sem verður skoðað samhliða vinnu við útfærslu á möguleikanum á að gera íbúum félagslegs húsnæðis kleift að eignast eigið heimili. Markmiðið er að skapa fólki aukin tækifæri til eignamyndunar en sinna á sama tíma lögbundnum skyldum sveitarfélagsins.

Í þeirri vinnu verður meðal annars skoðað hversu margar félagslegar íbúðir eru í Reykjanesbæ í samanburði við sambærileg sveitarfélög.

6. Hver er staðan á biðlista eftir félagslegu húsnæði í Reykjanesbæ fyrir eldri borgara annars vegar og aðra hópa hins vegar?

Eftirfarandi kemur fram í upplýsingum frá velferðarsviði sem teknar voru saman 5. ágúst 2026:

„Hver er staðan á biðlista eftir félagslegu húsnæði í Reykjanesbæ fyrir eldri borgara?

Fjöldi íbúða til félagslegrar úthlutunar eru: samtals 64.

Fjöldi umsókna: 20 umsóknir liggja fyrir um félagslegt húsnæði fyrir eldri borgara.

Hver er staðan á biðlista eftir félagslegu húsnæði í Reykjanesbæ fyrir aðra hópa?

Fjöldi íbúða til félagslegrar úthlutunar eru: samtals 166.

Fjöldi umsókna: 110 umsóknir liggja fyrir um íbúðir í almennu félagslegu húsnæði.

Biðlisti eftir íbúðum í sérhæfðum búsetukjörnum í Reykjanesbæ

Fjöldi íbúða í sértækum búsetukjörnum fyrir fatlað fólk í þörf fyrir sólarhringsþjónustu eru samtals 17.

Umsóknir um íbúðir í búsetukjörnum fatlaðs fólks eru 19 í dag.

Þarfagreining gerir ráð fyrir að á næstu árum berist um 28 nýjar umsóknir um íbúðir í búsetukjörnum.“

Þessar upplýsingar verða notaðar við frekari stefnumörkun í málaflokknum.

7. Sveitarfélagið ber líka lögbundna ábyrgð á að tryggja framboð félagslegs húsnæðis. Ef íbúðir eru seldar þarf að vera skýr áætlun um hvernig þær verða endurnýjaðar. Hvenær megum við eiga von á slíkri áætlun?

Ekki stendur til að selja allar félagslegar íbúðir bæjarins. Við ítrekum að enn á eftir að útfæra þetta stefnumál með fagfólki bæjarins og hagaðilum.

5. Umsögn vegna rekstrarleyfis - Gráklettur ehf., Hafnargata 16 (2026060437)

Erindi Sýslumannsins á Suðurnesjum vegna umsóknar um rekstur gististaðar í flokki II-C. Lagðar fram umsagnir byggingarfulltrúa Reykjanesbæjar, Brunavarna Suðurnesja og Heilbrigðiseftirlits Suðurnesja. Bæjarráð samþykkir umsóknina fyrir sitt leyti með vísan til fyrirliggjandi umsagna.

6. Fundargerð stjórnar Sambands sveitarfélaga á Suðurnesjum 12. ágúst 2026 (2026010317)

Lögð fram til kynningar fundargerð Sambands sveitarfélaga á Suðurnesjum.

Fylgigögn:

825. fundur stjórnar SSS_12082026

7. Landsfundur um jafnréttismál sveitarfélaga 17. september 2026 (2026050347)

Lagt fram fundarboð um landsfund um jafnréttismál sveitarfélaga.

Fleira ekki gert og fundi slitið kl. 9:51. Fundargerðin fer til afgreiðslu bæjarstjórnar 1. september 2026.