Mikill hugur var í fólki á Atvinnu- og framkvæmdaþingi Reykjanesbæjar sem fram fór í Stapa á miðvikudag. Um 200 manns frá um 100 fyrirtækjum og stofnunum sóttu þingið þar sem sjónum var beint að atvinnulífi, uppbyggingu og þeim fjölmörgu verkefnum sem eru fram undan í Reykjanesbæ.

Stemningin var rafmögnuð og sameiginlegur tónn fundarins skýr: Mikil uppbygging er fram undan í Reykjanesbæ og á Suðurnesjum og tækifærin fjölmörg.

Áhugasamir geta horft á þingið í heild sinni á YouTube: https://www.youtube.com/live/TT0_AFCQ0CE?si=aIdA7T0jxrPXTGGX

Vilhjálmur Árnason, bæjarstjóri Reykjanesbæjar, setti þingið og fór yfir þá miklu grósku sem nú ríkir á svæðinu. Hann lagði áherslu á að sveitarfélagið vilji greiða götu þeirra sem vilja byggja upp og fjárfesta í Reykjanesbæ, meðal annars með auknu lóðaframboði og niðurfellingu innviðagjalda.

Fjölmörg verkefni í farvatninu

Halldór Karl Hermannsson, sviðsstjóri atvinnu- og hafnarsviðs, og Guðlaugur H. Sigurjónsson, sviðsstjóri umhverfis- og framkvæmdasviðs, drógu upp heildarmynd af stöðu og tækifærum Reykjanesbæjar.

Reykjanesbær er nú fjórða stærsta sveitarfélag landsins með um 24 þúsund íbúa og tæplega 16 þúsund manns á vinnumarkaðsaldri. Meðal helstu styrkleika sveitarfélagsins eru nálægðin við Keflavíkurflugvöll, stórskipahöfnina í Helguvík, öflugt vinnuafl, gott framboð lands og að innviðagjöld eru nú 0 krónur á fermetra.

Mikil áhersla er lögð á að auka lóðaframboð. Nú eru 36 atvinnuhúsalóðir lausar til úthlutunar og 20 til viðbótar í undirbúningi. Þá eru 41 sérbýlislóð til úthlutunar á þessu ári, 32 til viðbótar fyrirhugaðar árið 2027 – auk Keflavíkurborga – og mögulegt er að yfir 250 sérbýlislóðir verði tilbúnar árið 2028.

Á þinginu var jafnframt kynnt nýtt hverfi, Keflavíkurborgir, þar sem undirbúningur stendur yfir að fyrsta áfanga með fjórum til fimm götum og 40–60 sérbýlishúsalóðum. Þegar hverfið verður fullbyggt er gert ráð fyrir nokkur hundruð íbúðum. Stefnt er að því að bjóða út fyrstu lóðir á næsta ári.

Milljarðafjárfestingar atvinnulífsins

Stjórnendur fjölmargra fyrirtækja stigu á svið og kynntu umfangsmikil uppbyggingaráform á svæðinu. Þar á meðal voru Samherji, HS Veitur, Hótel Keflavík, atNorth og Isavia, auk þess sem stjórnendur Aðaltorgs, Festi, Algalífs, Verne, BLUE, Fagkaupa og Reykjanes Investment tóku þátt í pallborðsumræðum.

Þar komu fram áform um milljarðafjárfestingar á næstu árum. Samherji kynnti fyrsta áfanga Eldisgarðs sem áætlað er að kosti um 40 milljarða króna, HS Veitur hyggjast tvöfalda árlegar fjárfestingar sínar úr tveimur milljörðum í fjóra milljarða næstu fimm árin og Isavia gerir ráð fyrir að verja að meðaltali tæpum 15 milljörðum króna á ári í framkvæmdir við Keflavíkurflugvöll. Þá kynnti Verne áform um rúmlega 20 þúsund fermetra stækkun gagnaversins á Ásbrú og Algalíf fór yfir um fimm milljarða króna fjárfestingu fyrirtækisins síðustu ár.

Á sama tíma eru umfangsmiklar opinberar framkvæmdir fram undan. Meðal verkefna eru uppbygging og endurbætur grunnskóla og leikskóla, framkvæmdir við íþróttamannvirki, stækkun Fjölbrautaskóla Suðurnesja og umfangsmiklar framkvæmdir í fráveitumálum, þar á meðal ný hreinsistöð í Helguvík.

Viljayfirlýsing um uppbyggingu á Ásbrú

Einn af hápunktum þingsins var undirritun viljayfirlýsingar Reykjanesbæjar, ríkisins og Kadeco um að hraða uppbyggingu sérbýlis á Ásbrú. Vilhjálmur Árnason bæjarstjóri, Daði Már Kristófersson fjármála- og efnahagsráðherra og Pálmi Freyr Randversson, framkvæmdastjóri Kadeco, undirrituðu yfirlýsinguna á þinginu.

Guðjón Skúlason, formaður Samtaka atvinnurekenda á Reykjanesi, fór einnig yfir stöðu atvinnumála og mikilvægi öflugra samgangna fyrir áframhaldandi vöxt svæðisins. Meðal þess sem hann lagði áherslu á var áframhaldandi uppbygging Reykjanesbrautar.

Samtalið heldur áfram

Atvinnu- og framkvæmdaþingið sýndi með skýrum hætti þann mikla hug sem er í atvinnulífinu og hversu umfangsmikil verkefni eru í undirbúningi eða framkvæmd í Reykjanesbæ.

Markmið þingsins var jafnframt að leiða saman sveitarfélagið, fyrirtæki, fjárfesta og aðra hagaðila og skapa vettvang fyrir samtal um næstu skref. Miðað við þátttökuna og þær fjölmörgu hugmyndir og áætlanir sem kynntar voru er ljóst að það er bjart fram undan í bæ tækifæranna.