Atvinnuþróunarfélagið Heklan og Eignarhaldsfélag Suðurnesja standa sameiginlega fyrir örráðstefnu um nýsköpun í atvinnulífinu á Park Inn by Radison fimmtudaginn 10. október kl. 17:00. Að sögn Bjarkar Guðjónsdóttur verkefnisstjóra hjá Heklunnu hafa félögin fengið til liðs við sig frábært fólk í nýsköpun, menningu og sprotafyrirtækjum. Frumkvöðla sem eru tilbúnir að deila reynslu sinni og þekkingu. Dagskrá er að finna neðst í frétt. 

„Á örráðstefnunni verður skoðað hvernig vinnuumhverfi frumkvöðla og sprotafyrirtækja á Suðurnesjum er. Er samfélagið á Suðurnesjum að styðja nægjanlega við starfsemi af þessum toga? Þurfum við að gera betur í þeim efnum? Við munum taka stöðuna út frá sjónarhóli frumkvöðuls. Hvar geta frumkvöðlar fengið styrki?,“ segir Björk.  

Þá verður kynning á Uppbyggingasjóði Suðurnesja, en sjóðurinn styrkir menningarverkefni,  atvinnu- og nýsköpunarverkefni. Opnað hefur verið fyrir styrkumsóknir fyrir árið 2020. 

„Eignarhaldsfélag Suðurnesja styður við uppbyggingu atvinnulífs á Suðurnesjum. Stuðningur þess getur verið í formi láns eða hlutafjárkaupa, bæði til nýrra fyrirtækja og fyrirtækja sem nú þegar eru í rekstri á Suðurnesjum. Einnig kynnum við hvaða möguleikar eru fyrir ný fyrirtæki á styrkjum og lánum frá Byggðastofnun,“ segir Björk sem hvetur áhugasama til að fjölmenna á ráðstefnuna á Park Inn. Boðið verður upp á léttar veitingar.

 Örráðstefnan er öllum opin sem áhuga hafa án þátttökugjalds. Áhugasamir eru beðnir um að skrá sig svo hægt sé að sjá þátttöku . Með því að smella á þennan tengil opnast skráningarform á vef Heklunnar 

Dagskrá

• Ragnar Sigurðsson Awarego
• Ásberg Jónsson Nordic Visitor
• Anna Margrét Ólafsdóttir Lubbi Peace (myndband)
• Fida Abu Libdeh GeoSilica
• Björk Guðjónsdóttir, Uppbyggingarsjóður Suðurnesja
• Friðjón Einarsson, Eignarhaldsfélag Suðurnesja
• Þorgeir Daniel Hjaltason, ráðgjafi og frumkvöðull