Á morgun hefst árvekniátakið Plastlaus september og Reykjanesbær hvetur bæjarbúa og fyrirtæki til að taka þátt í þessu mikilvæga verkefni. Plastlaus september snýst um að koma auga á óhóflega notkun á plasti og draga úr neyslu á einnota plastumbúðum. Það er alltaf hægt að gera betur og gott er að hafa í huga að margar litlar breytingar verða að einni stórri breytingu.

Einfaldar breytingar á neysluvenjum:

• Sleppið notkun á plastpokum
• Sleppið notkun á einnota borðbúnaði
• Notið eyrnapinna sem gerðir eru úr pappa eða bambus í stað þeirra sem eru úr plasti
• Notið bambustannbursta í stað þeirra sem eru úr plasti
• Afþakkið rör
• Notið fjölnota kaffimál
• Notið fjölnota matar- og drykkjarílát
• Veljið umbúðalausar vörur þar sem það er hægt. Veljið til dæmis grænmeti í lausu.
• Veljið hreinlætisvörur sem innihalda ekki örplast
• Flokkið allt sem hægt er.

Reykjanesbær hefur styrkt átakið og mun styrkurinn fara í að þýða heimasíðu átaksins yfir á pólsku en hægt er að kynna sér átakið nánar inni á vefsíðunni plastlausseptember.is.