Suðurnesjaþema í Bókakonfekti í kvöld

Fimmtudagskvöldið 26.nóvember kl. 19:30 verður hið árlega Bókakonfekt Bókasafnsins í Ráðhúsinu, Tjarnargötu 12.

Rithöfundarnir Jón Kalman Stefánsson,  Árelía Eydís Guðmundsdóttir og Ásmundur Friðriksson lesa upp úr nýjustu bókum sínum. Þau tengjast öll Suðurnesjum á einn eða annan hátt.

Eitthvað á stærð við alheiminn eftir Jón Kalman Stefánsson er framhald ættarsögunnar Fiskarnir hafa enga fætur en sögusvið bókanna teygist frá Norðfirði forðum til Keflavíkur nútímans.

Tapað - fundið er fyrsta skáldsaga Árelíu Eydísar Guðmundsdóttur. Bókin fjallar um lögfræðinginn Höllu Bryndísi sem, á ferð sinni til London, fær ranga ferðatösku við lendingu. Hvað gerir kona með ókunnugan fataskáp þegar mikið liggur við?

Hrekkjalómafélagið: prakkarastrik og púðurkerlingar er 20 ára saga Hrekkjalómafélagsins í Vestmannaeyjum sem Ásmundur Friðriksson rekur. Í bókinni er undirbúningi hrekkjanna lýst, hrekkjunum sjálfum, viðbrögðum og afleiðingum þeirra.

Gestum er boðið upp á jólastemningu með lifandi tónlist frá Tónlistarskóla Reykjanesbæjar. Boðið verður upp á kaffi og konfekt. Aðgangur ókeypis og allir velkomnir.

Dagskráin er styrkt af Menningarráði Suðurnesja.