723. fundur bæjarstjórnar Reykjanesbæjar var haldinn að Grænásbraut 910 þann 1. september 2026 kl. 17:00

Viðstaddir:

Aðalheiður Hilmarsdóttir, Alexander Ragnarsson, Birgir Már Bragason, Guðbergur Reynisson, Gunnlaugur Kárason, Halldóra Fríða Þorvaldsdóttir, Hjörtur Magnús Guðbjartsson, Kristján Pétur Kristjánsson, Margrét Þórarinsdóttir, Róbert Jóhann Guðmundsson og Vilhjálmur Árnason bæjarstjóri. Í forsæti var Margrét Þórarinsdóttir.

Að auki sat fundinn Aðalheiður Ósk Gunnarsdóttir ritari.

Díana Hilmarsdóttir boðaði forföll og sat Birgir Már Bragason fundinn í hennar stað.
Guðný Birna Guðmundsdóttir boðaði forföll og sat Aðalheiður Hilmarsdóttir fundinn í hennar stað.

1. Fundargerðir bæjarráðs 20. og 27. ágúst 2026 (2026010008)

Forseti setti fundinn og fól fyrsta varaforseta, Guðbergi Reynissyni, stjórn fundarins við afgreiðslu fundargerðar bæjarráðs frá 20. ágúst 2026.

Forseti gaf orðið laust um fundargerð bæjarráðs frá 20. ágúst 2026.

Til máls tók Margrét Þórarinsdóttir (D) og lagði fram eftirfarandi bókun:

Mál 3 frá fundargerð bæjarráðs 20. ágúst 2026 - Úttektir á fjármálum og stjórnsýslu Reykjanesbæjar (2026070070)

„Á 1421. fundi bæjarráðs þann 1. júní 2023 var málið Hækkun þingfararkaups tekið sérstaklega fyrir.

Þar kom fram að samkvæmt samningum ættu laun bæjarfulltrúa Reykjanesbæjar að hækka í samræmi við þingfararkaup. Bæjarráð tók síðan sérstaka og samhljóða ákvörðun um að falla frá fyrirhuguðum launahækkunum samfara hækkun þingfararkaups.

Þarna kemur tvennt skýrt fram. Annars vegar að laun bæjarfulltrúa fylgdu samkvæmt fyrirliggjandi fyrirkomulagi þingfararkaupi. Hins vegar að bæjarráð tók sérstaka ákvörðun um að víkja frá því fyrirkomulagi og taka hækkunina ekki inn.

Í þeirri samþykkt er hvorki minnst á „heiðursmannasamkomulag“ né kemur þar fram að laun kjörinna fulltrúa skuli fryst um óákveðinn tíma.

Málið kom síðan aftur til formlegrar afgreiðslu á 1521. fundi bæjarráðs þann 26. júní 2025. Þar var samþykkt með fimm atkvæðum gegn engu að kjörnir fulltrúar fengju ekki hækkun samkvæmt þingfararkaupi fyrir árin 2024 og 2025.

Sú afgreiðsla skiptir máli. Þar var aftur tekin sérstök og afmörkuð ákvörðun, þar sem árin 2024 og 2025 voru sérstaklega tilgreind. Í þeirri samþykkt, líkt og samþykktinni frá 2023, er ekki kveðið á um ótímabundna frystingu launa.

Í bókun minni fyrir hönd Umbótar á 1522. fundi bæjarráðs þann 3. júlí 2025 sagði ég meðal annars:

„Kjörnir fulltrúar hafa ekki hækkað laun sín frá 2023 og hafa ekki fengið lögbundna hækkun þingfararkaups fyrir 2024 og 2025, en hafa þannig lagt sitt af mörkum til að bæta reksturinn.“

Ég stend að sjálfsögðu við hvert orð í þeirri bókun.

En hún verður að vera sett í rétt samhengi. Bókunin var lögð fram aðeins viku eftir að bæjarráð hafði sérstaklega samþykkt að kjörnir fulltrúar fengju ekki hækkun samkvæmt þingfararkaupi fyrir árin 2024 og 2025.

Ég var því að lýsa þeirri stöðu sem þá var uppi og þeirri staðreynd að kjörnir fulltrúar hefðu ekki tekið þessar hækkanir og hefðu þannig lagt sitt af mörkum við þær fjárhagslegu aðstæður sem þá voru uppi.

Í bókun minni stendur hins vegar ekkert um „heiðursmannasamkomulag“, ekkert um ótímabundna frystingu og ekkert um að slíkt fyrirkomulag ætti að halda áfram þar til sérstök ákvörðun yrði tekin um að aflétta því.

Það er því ekki rétt að nota bókun mína sem staðfestingu á því að slíkt ótímabundið samkomulag hafi verið gert.

Mér þykir alvarlegt þegar bókun kjörins fulltrúa er notuð með þeim hætti að henni er gefin önnur merking en efni hennar og samhengi gefa tilefni til.

Það hlýtur jafnframt að vera eðlileg krafa í pólitískri umræðu að fullyrðingar um ákvarðanir og samkomulag kjörinna fulltrúa séu studdar gögnum.

Í umræðunni hefur jafnframt verið gengið út frá því að núverandi meirihluti hafi tekið sérstaka pólitíska ákvörðun um að hækka laun kjörinna fulltrúa. Það er ekki sú mynd sem fyrirliggjandi gögn gefa.

Launakjör kjörinna fulltrúa hafa verið tengd þingfararkaupi. Þegar bæjarráð hefur viljað víkja frá því fyrirkomulagi hefur verið tekin sérstök ákvörðun um að taka hækkunina ekki inn.

Engin sérstök ákvörðun var því tekin af núverandi meirihluta um að aflétta frystingu. Ef halda átti áfram að víkja frá gildandi fyrirkomulagi þurfti sérstaka ákvörðun um slíkt frávik.

Þá verður jafnframt að horfa til þess að núverandi meirihluti hefur fækkað nefndum og dregið úr umfangi nefndakerfis Reykjanesbæjar, og þannig dregið úr umfangi nefndastarfs, launakostnaði og öðrum kostnaði sem því fylgir.

Það er því mikilvægt að umræða um launakjör kjörinna fulltrúa sé sett í samhengi við heildarumfang nefndakerfisins og heildarkostnað vegna starfa kjörinna fulltrúa.

Í bókun fulltrúa Framsóknar og Samfylkingar, sem lögð var fram á fundi bæjarráðs þann 20. ágúst 2026, segir meðal annars:

„Á síðasta kjörtímabili var gert heiðursmannasamkomulag í bæjarráði eins og áður hafði verið gert um að frysta laun kjörinna fulltrúa um óákveðinn tíma og taka ekki inn árlega hækkun sem tengist hlutfalli af þingfararkaupi.“

Þar segir jafnframt:

„Pólitísk ákvörðun meiri- og minnihluta var því tekin árið 2023 og hefur staðið síðan.”

Ég hef farið yfir þær opinberu fundargerðir og gögn Reykjanesbæjar sem varða þessar ákvarðanir og hef ekki fundið þar heimild fyrir þeirri lýsingu.

Því spyr ég einfaldlega fulltrúa minnihlutans : Hvar er þetta heiðursmannasamkomulag skráð?

Á hvaða fundi var ákveðið að frystingin skyldi gilda um óákveðinn tíma og hvar kemur fram að ákvörðunin frá 2023 skyldi halda gildi sínu þar til sérstök ákvörðun yrði tekin um að aflétta henni?

Ef til er samþykkt, bókun eða önnur heimild sem sýnir fram á þetta, er einfalt að leggja þá heimild fram.

Ég óska því eftir að fulltrúar Framsóknar og Samfylkingar leggi fram þau gögn sem þessar fullyrðingar byggja á.

Þangað til tel ég rétt að styðjast við það sem raunverulega kemur fram í opinberum gögnum Reykjanesbæjar.

Pólitísk umræða má vera ákveðin og skoðanir okkar ólíkar. En við eigum öll að geta verið sammála um að þegar vitnað er í fyrri ákvarðanir og bókanir kjörinna fulltrúa, verði þær að vera settar fram í réttu samhengi.

Staðreyndir skipta máli. Rétt skal vera rétt.”

Margrét Þórarinsdóttir bæjarfulltrúi Sjálfstæðisflokks.

Til máls tóku Halldóra Fríða Þorvaldsdóttir, Vilhjálmur Árnason og Margrét Þórarinsdóttir.

Forseti, Margrét Þórarinsdóttir, tók við fundarstjórn.

Forseti gaf orðið laust um fundargerð bæjarráðs frá 27. ágúst 2026. Til máls tóku Halldóra Fríða Þorvaldsdóttir, Vilhjálmur Árnason og Guðbergur Reynisson.

Til máls tók Róbert Jóhann Guðmundsson (B) og lagði fram eftirfarandi bókun Framsóknar og Samfylkingar:

Mál 13 frá fundargerð bæjarráðs 27. ágúst 2026 - Innviðagjöld - breyting á gjaldskrá (2024010545)

„Undirrituð telja að áður en endanleg ákvörðun um að fella innviðagjald úr gjaldskrá Reykjanesbæjar verði tekin þurfi málið að fá mun ítarlegri umfjöllun í bæjarráði. Um er að ræða gjald sem hefur bein fjárhagsleg áhrif á sveitarfélagið og getu þess til að standa undir þeirri uppbyggingu grunninnviða sem ráðast þarf í á næstu árum, m.a. á grundvelli áætlana um íbúaþróun og fyrirhugaða uppbyggingu íbúðarhúsnæðis.

Áður en ákvörðun er tekin þarf því að liggja fyrir mat á fjárhagslegum áhrifum niðurfellingar gjaldsins, bæði til skemmri og lengri tíma, ásamt greiningu á því hvernig mæta eigi kostnaði við nauðsynlega uppbyggingu innviða.

Jafnframt þarf að hafa í huga tilgang innviðagjaldsins sem er að tryggja sveitarfélaginu sanngjarna hlutdeild í þeim verðmætum sem skapast við uppbyggingu og til að mæta að hluta þeim kostnaði sem uppbygging nýrra innviða hefur í för með sér. Stór hluti lands innan sveitarfélagsins er í eigu ríkisins eða annarra landeigenda sem innheimta gjöld og njóta verðmæta af landinu án þess að leggja nokkuð til upp í kostnað við uppbyggingu þeirra innviða sem sveitarfélagið þarf að ráðast í.

Innviðagjaldið er því einnig sanngirnismál gagnvart núverandi íbúum og fasteignaeigendum. Gæta þarf þess að kostnaður vegna uppbyggingar og nauðsynlegra innviða falli ekki óeðlilega á þá heldur taki þeir sem njóta verðmætanna sem skapast við uppbygginguna eðlilegan þátt í kostnaðinum.

Þá er ekki sjálfgefið að niðurfelling innviðagjalds skili sér að fullu í lægra fasteignaverði. Verðmæti lóða og fasteigna ráðast meðal annars af markaðsaðstæðum og uppbyggingaraðilar leitast við að hámarka bæði hagkvæmni og arðsemi verkefna sinna.

Af þessum ástæðum leggjum við til að málið verði ekki afgreitt að svo stöddu heldur vísað aftur til bæjarráðs til frekari greiningar, þar sem m.a. verði lagt mat á langtíma fjárhagsleg áhrif niðurfellingarinnar og hvernig sveitarfélagið hyggst mæta kostnaði við þá grunninnviði sem ráðast þarf í á næstu misserum.“

Birgir Már Bragason, Halldóra Fríða Þorvaldsdóttir og Róbert Jóhann Guðmundsson bæjarfulltrúar Framsóknar, Aðalheiður Hilmarsdóttir og Hjörtur M. Guðbjartsson bæjarfulltrúar Samfylkingar.

Til máls tóku Kristján Pétur Kristjánsson og Hjörtur Magnús Guðbjartsson.

Til máls tók Vilhjálmur Árnason (D) og lagði fram eftirfarandi bókun Sjálfstæðisflokks og Miðflokks:

Mál 13 frá fundargerð bæjarráðs 27. ágúst 2026 - Innviðagjöld - breyting á gjaldskrá (2024010545)

„Meirihlutinn tekur undir bókun skipulagsráðs Reykjanesbæjar sem sýnir vel þann vandaða undirbúning sem málið hefur fengið og rökstyður vel þá fjölmörgu kosti sem lækkun innviðagjalda niður í 0 kr. hefur í för með sér.

„Meirihluti Sjálfstæðisflokks og Miðflokks leggur til að gjaldskrá samkvæmt 3. gr. samþykktar um innviðagjald verði breytt þannig að byggingarréttargjald verði 0 kr./m² í öllum flokkum; íbúðabyggð, iðnaðarbyggð, verslun og þjónustu og á athafnasvæðum.

Byggingarréttargjöld sveitarfélagsins ná til uppbyggingar á landi í eigu sveitarfélagsins og væntir meirihlutinn þess að aðrir landeigendur í Reykjanesbæ fylgi fordæmi sveitarfélagsins.

Með þessari ákvörðun tekur Reykjanesbær stórt og mikilvægt skref í þá átt að lækka álögur á uppbyggingu, ryðja úr vegi hindrunum og skapa skýrari hvata til fjárfestingar og framkvæmda í sveitarfélaginu. Ákvörðunin endurspeglar jafnframt skýra séreignarstefnu meirihlutans. Við viljum að sem flestir hafi raunhæft tækifæri til þess að eignast eigið heimili og byggja upp eign fyrir sig og fjölskyldu sína.

Þessi lækkun byggingarréttargjalda niður í 0 krónur er ein umfangsmesta skattalækkun vegna uppbyggingar á sveitarstjórnarstiginu síðustu árin.

Á undanförnum árum hefur gjaldtaka vegna uppbyggingar aukist víða og gatnagerðar- og byggingarréttargjöld orðið sífellt stærri kostnaðarliður við nýbyggingar. Það skýtur skökku við í ljósi allrar umræðunnar um mikilvægi þess að tryggja nægt framboð af hagkvæmu húsnæði. Við getum ekki gert húsnæði hagkvæmara með því að gera það dýrara að byggja það.

Byggingarréttargjald vegna íbúðarhúsnæðis hefur numið 35.000 krónum á hvern fermetra í Reykjanesbæ síðan samþykkt um innviðagjöld tók gildi 4. júní 2024. Fyrir 150 fermetra íbúðarhúsnæði nemur gjaldið því 5.250.000 krónum. Með breytingunni fellur sá kostnaður niður.

Sífellt aukin gjaldtaka hins opinbera á húsnæðisuppbyggingu um land allt hefur átt stóran þátt í að hækka byggingarkostnað og þar með fasteignaverð. Hækkandi fasteignaverð hefur síðan ýtt undir verðbólgu, sem aftur hefur kallað á hærri vexti og gert bæði uppbyggingu og húsnæðiskaup enn dýrari. Þannig hefur myndast vítahringur sem bitnar fyrst og fremst á heimilum landsins.

Reykjanesbær ætlar að gera það sem í hans valdi stendur til að rjúfa þennan vítahring og sýna gott fordæmi með því að lækka álögur verulega á uppbyggingu í stað þess að hækka þær.

Ákvörðunin skapar jafnframt ný tækifæri til atvinnuuppbyggingar. Byggingarréttargjöld vegna iðnaðarbyggðar, verslunar og þjónustu og athafnasvæða lækka úr 6.000 krónum á fermetra í 0 krónur. Lægri álögur styrkja samkeppnisstöðu Reykjanesbæjar þegar kemur að því að laða að ný fyrirtæki og skapa fyrirtækjum í örum vexti betri skilyrði til að byggja hér upp. Með lækkuninni fækkum við aðgangshindrunum og leggjum grunn að fjölgun starfa, fjölbreyttari atvinnutækifærum og aukinni verðmætasköpun í sveitarfélaginu.

Sanngjörn samkeppni

Ekki má líta fram hjá því hvernig þessi skattalækkun gjörbreytir leiknum fyrir minni uppbyggingaraðila og fjölskyldur. Þegar milljónir króna þarf að greiða áður en framkvæmdir eru komnar almennilega af stað eykst fjármagnsþörf verkefna og aðgangur að uppbyggingu verður erfiðari. Stór fyrirtæki með sterka fjárhagslega bakhjarla eiga auðveldara með að mæta slíkum kostnaði en minni aðilar.

Við viljum ekki samfélag þar sem aðeins stærstu verktakarnir hafa bolmagn til að taka þátt í nýrri uppbyggingu. Við viljum að minni verktakar geti byggt, að iðnaðarmenn geti ráðist í eigin verkefni, að fjölskyldur geti byggt sér hús og að fleiri geti tekið þátt í verðmætasköpun innan sveitarfélagsins.

Afnám byggingarréttargjaldsins er því einnig aðgerð til að fækka aðgangshindrunum og búa til sanngjarnt samkeppnisumhverfi.

Innviðir eru sameiginlegt verkefni samfélagsins

Því hefur verið haldið fram að byggingarréttargjöld við nýbyggingar séu nauðsynleg til að standa undir uppbyggingu innviða. Meirihlutinn telur eðlilegt að þeirri röksemd sé svarað.

Reykjanesbær hefur vaxið ört á undanförnum árum og því hefur verið haldið fram að byggingarréttargjöld séu nauðsynleg til að mæta kostnaði sem fylgir slíkum vexti. Meirihlutinn tekur undir að vöxtur sveitarfélagsins hafi verið óhóflega hraður, en þar hefur sú uppbyggingarstefna sem rekin hefur verið undanfarin ár, með mikilli áherslu á fjölbýlishús, haft veruleg áhrif. Sérbýlisstefna meirihlutans, með aukinni áherslu á einbýlishús, parhús, raðhús og tvíbýli, mun stuðla að hóflegri og sjálfbærari vexti Reykjanesbæjar til framtíðar.

Reykjanesbær, líkt og önnur sveitarfélög, hefur þegar fjölmarga tekjustofna sem standa undir lögbundinni þjónustu og uppbyggingu sveitarfélagsins. Þar má meðal annars nefna útsvar, fasteignaskatta, lóðarleigu, gatnagerðargjöld og framlög úr Jöfnunarsjóði sveitarfélaga.

Innviðir sveitarfélags eru sameiginleg verðmæti. Skólar, leikskólar, götur, íþróttamannvirki og önnur þjónusta nýtast samfélaginu í heild og til langs tíma.

Meirihlutinn telur ekki sanngjarnt að kostnaður við almenna innviði sveitarfélagsins sé færður sérstaklega yfir á þá sem eru að byggja ný heimili eða atvinnuhúsnæði.

Slík gjaldtaka getur orðið sjálfstæð hindrun gegn þeirri uppbyggingu sem sveitarfélagið þarf á að halda og þeirri verðmætasköpun og framtíðartekjum sem nýjum íbúum og fyrirtækjum fylgja.

Meirihlutinn telur að sveitarfélög eigi frekar að skapa skilyrði fyrir uppbyggingu heldur en að líta á hana sem sérstakan skattstofn. Sveitarfélag sem vill vaxa með heilbrigðum hætti þarf því að hugsa lengra en til þeirra tekna sem hægt er að innheimta við úthlutun lóðar.

Það mun alltaf reynast hinu opinbera auðvelt að finna ný verkefni sem kalla á aukin útgjöld og nýjar leiðir til gjaldtöku. Erfiðara er að taka meðvitaða ákvörðun um að forgangsraða, gæta aðhalds og láta almenning og atvinnulíf halda eftir stærri hluta þeirra verðmæta sem þau skapa.

Meirihluti Sjálfstæðisflokks og Miðflokks velur síðari leiðina.

Rétti tíminn til að stíga skrefið

Ákvörðunin er tekin að vel ígrunduðu máli. Ekki er gert ráð fyrir tekjum af byggingarréttargjöldum á yfirstandandi ári og hefur breytingin því ekki áhrif á fyrirliggjandi rekstraráætlun sveitarfélagsins vegna ársins.

Þessi breyting stendur ekki ein og sér. Hún er hluti af stærri stefnu meirihlutans um að gera Reykjanesbæ að eftirsóknarverðasta sveitarfélagi landsins til uppbyggingar.

Sú stefna byggist á því að nægt framboð sé af lóðum, að skipulag sé skýrt, stjórnsýslan sé skilvirk, álögur hóflegar og að einstaklingar og fyrirtæki viti að þeim sé tekið fagnandi þegar þeir vilja skapa verðmæti og byggja upp í sveitarfélaginu.

Með þessu skrefi leggjum við grunninn að nýju uppbyggingarskeiði í Reykjanesbæ.““

Vilhjálmur Árnason, Margrét Þórarinsdóttir, Kristján Pétur Kristjánsson, Alexander Ragnarsson og Guðbergur Reynisson, bæjarfulltrúar Sjálfstæðisflokks og Gunnlaugur Kárason bæjarfulltrúi Miðflokks.

Forseti bar tillögu minnihluta um að vísa 13. máli frá fundargerð bæjarráðs 27. ágúst 2026, Innviðagjöld - breyting á gjaldskrá (2024010545), aftur til bæjarráðs til frekari greiningar upp til atkvæða og var hún felld með 6 atkvæðum meirihluta Sjálfstæðisflokks og Miðflokks gegn 5 atkvæðum minnihluta Framsóknarflokks og Samfylkingar.

Fundargerðirnar samþykktar 11-0.

Fylgigögn:

Fundargerð 1575. fundar bæjarráðs 20. ágúst 2026
Fundargerð 1576. fundar bæjarráðs 27. ágúst 2026

2. Fundargerð skipulagsráðs 21. ágúst 2026 (2026010016)

Forseti gaf orðið laust um eftirfarandi mál fundargerðarinnar frá 21. ágúst til sérstakrar samþykktar:

Sjötta mál fundargerðarinnar, Iðavellir 14b og Vatnsholt 2 - nýtt deiliskipulag (2025030582), samþykkt 11-0 án umræðu.

Tíunda mál fundargerðarinnar, Hjallalaut 1 - útisvæði (2026080089), samþykkt 11-0 án umræðu.

Ellefta mál fundargerðarinnar, Fitjabakki 3 og Fitjabraut 32 - sameining lóða (2026080115), samþykkt 11-0 án umræðu.

Tólfta mál fundargerðarinnar, Skólavegur 26 - breytt aðkoma (2026080097), samþykkt 11-0 án umræðu.

Þrettánda mál fundargerðarinnar, Garðavegur 7 - bílskúr (2026070241), samþykkt 11-0 án umræðu.

Forseti gaf orðið laust um fundargerðina. Til máls tóku Róbert Jóhann Guðmundsson, Vilhjálmur Árnason, Guðbergur Reynisson, Halldóra Fríða Þorvaldsdóttir, Hjörtur Magnús Guðbjartsson og Margrét Þórarinsdóttir.

Fundargerðin samþykkt að öðru leyti 11-0.

Fylgigögn:

Fundargerð 394. fundar skipulagsráðs 21. ágúst 2026

3. Fundargerð atvinnu- og hafnarráðs 20. ágúst 2026 (2026010009)

Forseti gaf orðið laust um fundargerðina. Til máls tóku Alexander Ragnarsson, Hjörtur Magnús Guðbjartsson og Vilhjálmur Árnason.

Fundargerðin samþykkt 11-0.

Fylgigögn:

Fundargerð 310. fundar atvinnu- og hafnarráðs 20. ágúst 2026

4. Fundargerð menntaráðs 21. ágúst 2026 (2026010013)

Forseti gaf orðið laust um fundargerðina. Til máls tóku Vilhjálmur Árnason, Halldóra Fríða Þorvaldsdóttir og Margrét Þórarinsdóttir.

Fundargerðin samþykkt 11-0.

Fylgigögn:

Fundargerð 398. fundar menntaráðs 21. ágúst 2026

5. Fundargerð íþrótta-, tómstunda- og menningarráðs 24. ágúst 2026 (2026010010)

Forseti gaf orðið laust um fundargerðina. Til máls tóku Birgir Már Bragason, Vilhjálmur Árnason, Halldóra Fríða Þorvaldsdóttir og Margrét Þórarinsdóttir.

Fundargerðin samþykkt 11-0.

Fylgigögn:

Fundargerð 207. fundar íþrótta-, tómstunda- og menningarráðs 24. ágúst 2026

6. Fundargerð leikskólaráðs 28. ágúst 2026 (2026060312)

Forseti gaf orðið laust um fundargerðina.

Til máls tók Halldóra Fríða Þorvaldsdóttir og lagði fram eftirfarandi bókun:

Mál 4 frá fundargerð leikskólaráðs 28. ágúst 2026 - Leikskólar og dagforeldrar í Reykjanesbæ haustið 2026 (2026080342)

„Bæjarfulltrúar Framsóknar fagna þeirri jákvæðu þróun sem orðið hefur í leikskólamálum í Reykjanesbæ. Sérstaklega er ánægjulegt að sjá að elsta barn á biðlista eftir leikskóladvöl er 16 mánaða. Þar með hefur það markmið sem sett var á síðasta kjörtímabili náðst og rúmlega það. Það er ánægjuleg staðfesting á því að þær ákvarðanir sem teknar voru og fjárfestingar sem ráðist var í séu að skila árangri.

Við viljum þakka stjórnendum, leikskólakennurum og öðru starfsfólki leikskólanna fyrir þeirra mikilvægu störf og þann metnað sem þau leggja í að skapa börnum góðar aðstæður.

Þó að þessi árangur sé ánægjulegur megum við ekki slaka á. Mikilvægt er að halda áfram að bæta starfsumhverfi og tryggja að starfsfólk fái áfram góð tækifæri til náms, símenntunar og starfsþróunar. Með því styrkjum við fagmennsku, eflum leikskólastarfið og tryggjum enn betri þjónustu við börn og fjölskyldur í Reykjanesbæ.“

Birgir Már Bragason, Halldóra Fríða Þorvaldsdóttir og Róbert Jóhann Guðmundsson, bæjarfulltrúar Framsóknar.

Til máls tók Vilhjálmur Árnason, Hjörtur Magnús Guðbjartsson og Margrét Þórarinsdóttir.

Fundargerðin samþykkt 11-0.

Fylgigögn:

Fundargerð 2. fundar leikskólaráðs 28. ágúst 2026

7. Málefni flóttafólks – fyrirspurn (2024100122)

Svar við fyrirspurn Samfylkingar sem lögð var fram í bæjarstjórn 18. ágúst undir fundargerð velferðarráðs frá 13. ágúst 2026, þriðja máli - Málefni flóttafólks – svar við fyrirspurn (2024100122)

1. Nær sú yfirlýsing Sjálfstæðisflokks og Miðflokks um að gera ekki fleiri samninga við ríkið bæði til samnings um samræmda móttöku flóttafólks og samnings um þjónustu við umsækjendur um alþjóðlega vernd?

Já.

2. Hefur verið tekin formleg ákvörðun um að Reykjanesbær geri ekki nýjan samning um samræmda móttöku?

Með samþykkt málefnasáttmála Sjálfstæðisflokks og Miðflokks sem lagður hefur verið fram í bæjarstjórn var sú ákvörðun formlega tekin.

3. Hafa viðræður farið fram við ríkið frá sveitarstjórnarkosningum varðandi nýjan samning?

Samskipti hafa átt sér stað við félagsmálaráðuneytið um viðræður varðandi uppgjör á kostnaði sveitarfélagsins við að veita þeim þjónustu sem komnir voru í þjónustu áður en samningarnir féllu úr gildi. Fyrirhugaður er fundur með félagsmálaráðherra.

4. Er afstaða meirihlutans sú að enginn nýr samningur komi til greina, óháð efni hans og þeim skilyrðum sem ríkið kynni að fallast á?

Það kemur vel til greina að gera samninga sem fela í sér samstarf ríkis og sveitarfélags til að draga úr opnum úrræðum umsækjanda um alþjóðlega vernd í sveitarfélaginu.

5. Á hvaða heildstæða fjárhags- og þjónustumati byggist afstaða meirihlutans? Í svari stjórnsýslunnar kemur fram að rekstrarniðurstaða þeirrar deildar velferðarsviðs sem sinnti umsækjendum um alþjóðlega vernd var jákvæð öll árin 2004–2025 að undanskildu árinu 2021. Samningur Reykjanesbæjar við Vinnumálastofnun um þá þjónustu var aðskilinn samningnum um samræmda móttöku.

Það hefur verið upplýst innan stjórnsýslunnar að álag, kostnaður og óbein áhrif dreifast um stjórnsýsluna og hefur ekki tekist að halda utan um það. Bein fjárhagsleg áhrif samnings á afmarkaðan hluta starfsemi Reykjanesbæjar segir ekki nema hluta af fjárhags- og þjónustustöðunni. Það liggur því fyrir að óbeinn kostnaður og áhrif eru víða innan stjórnsýslunnar sem hefur ekki verið metið heildstætt.

6. Í svarinu kemur jafnframt fram að 145 umsækjendur um alþjóðlega vernd hafi verið í tveimur úrræðum Vinnumálastofnunar í Reykjanesbæ 17. júlí 2026, þótt þjónustusamningi Reykjanesbæjar og Vinnumálastofnunar hafi lokið 31. júlí 2025. Hvaða áhrif telur meirihlutinn að sú stefna að gera ekki samninga hafi á raunverulegan fjölda fólks í úrræðum innan sveitarfélagsins? Hvaða breytingar hefur samningsleysið haft á greiðslum ríkisins til bæjarins, samráði við sveitarfélagið og möguleikum Reykjanesbæjar til að hafa áhrif á staðsetningu úrræða og framkvæmd þjónustunnar?

Það að gera ekki samninga dregur úr fýsileika úrræðisins hér á svæðinu og ætti því að hvetja til þess að einstaklingum í úrræðinu fækki jafnt og þétt. Samningsleysið hefur orðið til þess að sveitarfélagið fær bara fjárhagsaðstoðina greidda til baka en ekki þjónustukostnaðinn og því er stefnt á að gera uppgjörssamkomulag við félagsmálayfirvöld. Samráð og samtal Reykjanesbæjar, Vinnumálastofnunar og félagsmálaráðuneytisins er gott sem tryggir að sjónarmið allra aðila komist á framfæri og þar með góð áhrif á framkvæmd mála.

7. Verði ekki gerður nýr samningur, hvaða fyrirkomulag á þá að taka við til að tryggja reglubundið samráð við ríkið, kostnaðarþátttöku þess og hagsmuni Reykjanesbæjar í málaflokknum?

Góð og regluleg samskipti við stjórnvöld og undirstofnanir þeirra tryggja gott samstarf, samráð og áhrif Reykjanesbæjar í þessum málum sem öðrum.

Forseti gaf orðið laust. Til máls tók Aðalheiður Hilmarsdóttir.

8. Ásahverfi, umferðaröryggi - fyrirspurn (2026050289)

Svar við fyrirspurn Samfylkingar sem lögð var fram í bæjarstjórn 18. ágúst undir fundargerð umhverfis- og framkvæmdaráðs frá 14. ágúst 2026.

1. Hver er staðan á þessum verkefnum sem búið var að samþykkja og setja fjármagn í, þ.e. hvenær verður hafist handa við umræddar framkvæmdir á árinu 2026?

Rétt er að geta þess að það er rangt þegar rætt er um að það hafi verið sett fjármagn í þessar framkvæmdir, en þessar framkvæmdir voru settar á fjárfestingaráætlun 2026. Fyrrverandi meirihluta er tíðrætt um að 1850 milljónum hafi verið varið í fjárfestingar fyrir árið 2026. Eins og núverandi meirihluti hefur bent á þá dugði þetta fjármagn ekki til framkvæmda út árið heldur var meiningin að stöðva framkvæmdir í lok ágúst. Þessar gatnaframkvæmdir voru sem sagt ekki með fjármagn innan þessara 1850 milljóna heldur var þetta fjármagn háð tekjum í formi gatnagerðargjalda sem ekki hafa borist á árinu. Hafist verður handa um leið og hægt verður að tryggja fjármagn, ekki hafði verið gert ráð fyrir því.

2. Hefur núverandi meirihluti ákveðið að hætta við umræddar framkvæmdir?

Starfsmenn umhverfis- og framkvæmdasviðs eru á fullu í undirbúningi þessara verkefna og verða klárir til framkvæmda þegar fjármagn fæst.

3. Ef svo er, hvaða aðrar framkvæmdir hefur umrætt fjármagn farið í?

Þetta fjármagn var ekki og er ekki til staðar eins og fyrrverandi meirihluta ætti að vera kunnugt um.

4. Að lokum, hvað er átt við með bráðabirgðahringtorgi?

Bráðabirgðahringtorg er mögulega rangyrði en þarna er átt við að þetta hringtorg verður minna í sniðum en hringtorgið á gatnamótum Njarðargötu og Fitjabakka. Það verður s.s. ekki framkvæmt sem tvöfalt hringtorg. Í skýrslu frá Eflu var lagt til að þessi gatnamót yrðu aflögð í framtíðinni en það var tekin ákvörðun um að taka ekki mið af þeim sjónarmiðum/ráðgjöf.

Forseti gaf orðið laust. Til máls tóku Hjörtur Magnús Guðbjartsson, Halldóra Fríða Þorvaldsdóttir og Vilhjálmur Árnason.

9. Fjárfestingaverkefni 2027 - fyrirspurn (2026080103)

Svar við fyrirspurn Samfylkingar sem lögð var fram í bæjarstjórn 18. ágúst undir fundargerð umhverfis- og framkvæmdaráðs frá 14. ágúst 2026.

1. Af hverju er verkefnið um leikskóla Stapaskóla ekki á listanum yfir verkefni sem þarf að fara að huga að?

Stapaskóli er verkefni sem er sannarlega á fjárhagsáætlun enda nánast tilbúið til útboðs. Á skjali sem farið var yfir á fundinum er Stapaskóli III í háum forgangi og beðið ákvörðunar um að fara í þá framkvæmd.

Verkefnin sem kynnt voru sem „þarf að fara huga að” eru verkefni sem ekki eru á þessum lista og starfsfólk USK vill minna á.

2. Stendur til að flytja bókasafnið úr Hljómahöll?

Spurningarmerkið við Hljómahöll í kynningunni var einungis til marks um að þessu verkefni er ekki lokið. Enn stendur til að bæta geymsluaðstöðu, koma upp útdraganlegri stúku í Bergi og annar frágangur er ókláraður.

Það skal þó vera öllum ljóst að núverandi meirihluti var mótfallinn flutningi bókasafnsins í Hljómahöll á sínum tíma. Okkur þykir miður að þessi vanhugsaða staðsetning hafi leitt til þess að verulegu skattfé hefur verið varið í breytingar og framkvæmdir sem enn sér ekki fyrir endann á.

Þá hafa komið upp ýmis vandamál vegna staðsetningarinnar. Meirihlutinn telur því eðlilegt að staldra við og leggja mat á hvort Hljómahöll sé í raun framtíðarhúsnæði Bókasafns Reykjanesbæjar eða hvort aðrir og betri kostir séu í stöðunni til lengri tíma. Sú skoðun er í fullu samræmi við það sem bæði Sjálfstæðisflokkurinn og Miðflokkurinn boðuðu fyrir kosningar.

Forseti gaf orðið laust. Til máls tóku Hjörtur Magnús Guðbjartsson og Vilhjálmur Árnason.

Fleira ekki gert og fundi slitið kl. 20:27.