Þessari spurningu hefur starfsfólk í Ráðhúsi Reykjanesbæjar verið að velta fyrir sér að undanförnu, auk þess sem nokkur fjöldi fólks á Facebook hefur tjáð sig um þetta. Þar virðist sitt sýnast hverjum og af ýmsum ástæðum. Því var ákveðið að leita svara hjá Vísindavefnum og nú er svarið komið.

Í svarinu kemur m.a. fram að áður fyrr hafi verið gerður skýr munur á Reykjanesi og Suðurnesjum. Í ritinu Landið þitt-Ísland kemur fram að nafnið Suðurnes sé upphaflega komið frá vermönnum, helst Norðlendingum og hafi verið notað um Rosmhvalanes, Álftanes og Seltjarnarnes til aðgreiningar frá Akranesi og Kjalarnesi. Í ritinu kemur einnig fram að talið er að Þorvaldur Thoroddsen hafi fyrstur nefnt svæðið suðvestan Hafnarfjarðar Reykjanesskaga.

Á fyrri hluta 20. aldar taldist nafnið Suðurnes ná frá Vatnsleysuströnd að Garðskaga og þaðan alla leið til Krísuvíkur. Síðan hefur þessi notkun fest sig í sessi.
Það má því segja að fyrr á tímum hafi verið gerður skýr greinarmunur á Reykjanesi og Suðurnesjum þar sem það fyrrnefnda var „hællinn“ á skaganum en það síðarnefnda „táin", en í dag sé nokkurn veginn um sama svæði að ræða.

Niðurstaðan er sem sagt sú að í tímans rás hafa bæði þessi nöfn náð fótfestu á svipuðu svæði, en af ólíkum sögulegum ástæðum.

Við Reyknesingar í ráðhúsi Reykjanesbæjar þökkum Vísindavefnum fyrir greinargóð svör.