717. fundur bæjarstjórnar Reykjanesbæjar var haldinn að Grænásbraut 910 þann 21. apríl 2026 kl. 17:00

Viðstaddir: Alexander Ragnarsson, Díana Hilmarsdóttir, Guðbergur Reynisson, Guðný Birna Guðmundsdóttir, Halldóra Fríða Þorvaldsdóttir, Helga María Finnbjörnsdóttir, Hjörtur Magnús Guðbjartsson, Margrét A. Sanders, Margrét Þórarinsdóttir, Róbert Jóhann Guðmundsson og Sigurrós Antonsdóttir. Í forsæti var Guðný Birna Guðmundsdóttir.

Að auki sátu fundinn Kjartan Már Kjartansson bæjarstjóri og Aðalheiður Ósk Gunnarsdóttir ritari.

1. Fundargerðir bæjarráðs 9. og 16. apríl 2026 (2026010008)

Forseti gaf orðið laust um fundargerðirnar. Til máls tóku Margrét A. Sanders, Halldóra Fríða Þorvaldsdóttir, Hjörtur Magnús Guðbjartsson og Margrét Þórarinsdóttir.

Forseti gerði fundarhlé kl. 17:12.
Fundur settur aftur kl. 17:32.

Til máls tók Guðný Birna Guðmundsdóttir (S) og lagði fram eftirfarandi bókun bæjarfulltrúa Reykjanesbæjar:

„Bæjarstjórn lýsir yfir áhyggjum af þeim fréttum sem bárust af uppsögn skólameistara Fjölbrautaskóla Suðurnesja og óskar eftir að málið verði tekið á dagskrá bæjarráðs miðvikudaginn 22. apríl næstkomandi.“

Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu, Díana Hilmarsdóttir, Halldóra Fríða Þorvaldsdóttir og Róbert Jóhann Guðmundsson Framsókn, Helga María Finnbjörnsdóttir Beinni leið, Alexander Ragnarsson, Guðbergur Reynisson, Margrét Sanders og Margrét Þórarinsdóttir Sjálfstæðisflokki.

Fundargerðirnar samþykktar 11-0.

Fylgigögn:

Fundargerð 1559. fundar bæjarráðs 9. apríl 2026
Fundargerð 1560. fundar bæjarráðs 16. apríl 2026

2. Fundargerð umhverfis- og skipulagsráðs 10. og 17. apríl 2026 (2026010016)

Forseti gaf orðið laust um eftirfarandi mál fundargerðarinnar frá 17. apríl til sérstakrar samþykktar:

Annað mál fundargerðarinnar, Helguvíkurhöfn - breyting á deiliskipulagi (2025120206), samþykkt 11-0 án umræðu.
Fimmta mál fundargerðarinnar, Stapabraut 21 (2025110042), samþykkt 11-0 án umræðu.
Sjötta mál fundargerðarinnar, Seylubraut 1 - auglýsingaskilti (2026020413), samþykkt 11-0 án umræðu.
Áttunda mál fundargerðarinnar, Heiðarbrún 15 (2026030477), samþykkt 11-0 án umræðu.
Níunda mál fundargerðarinnar, Sjávargata 33A (2026020027), samþykkt 11-0 án umræðu.
Tíunda mál fundargerðarinnar, Þórustígur 22 (2026040109), samþykkt 11-0 án umræðu.
Ellefta mál fundargerðarinnar, Njarðvíkurheiði - urðunarstaður fyrir óvirkan úrgang - framkvæmdaleyfi (2026030325), samþykkt 11-0 án umræðu.
Tólfta mál fundargerðarinnar, Ægisgata, lagnir - framkvæmdaleyfi (2026040165), samþykkt 11-0 án umræðu.

Forseti gaf orðið laust um fundargerðirnar.

Til máls tók Róbert Jóhann Guðmundsson (S) og las upp bókun meirihluta umhverfis- og skipulagsráðs í máli 2 í fundargerð umhverfis- og skipulagsráðs 10. apríl 2026, Njarðarbraut milli Norður- og Suður-Fitja - deiliskipulag (2025110452):

„Meirihluti umhverfis- og skipulagsráðs fagnar því að unnið sé deiliskipulag fyrir þennan annasama vegkafla í heild sinni.

Yfirlit matsþátta og einkunnir eru lýsandi og gott er að fá skýra niðurstöðu sérfræðinga um úrlausnir á götunni.

Þá er einnig í lok skýrslunnar tiltekin tímaröð/forgangsröð framkvæmda þar sem horft er til heildarsamhengis og áfangaskiptingu sem taka mið af framtíðaruppbyggingu kerfisins í heild sinni.

Meirihluti umhverfis- og skipulagsráðs er sammála Eflu í greiningu sinni um að rétt sé og skynsamlegt að gera hringtorg við Víknaveg, við Vallarás, við Bergás og við Grænás og sammála hægri inn/út beygju við Bolafót/Sjávargötu. Að sama skapi er meirihlutinn sammála um skipulag gönguleiða- og þverana um Njarðarbraut en telur brýnt að kannaðir séu möguleikar þess að gera gönguleið á Fitjabakka einnig.

Meirihlutinn vill þó breyta forgangsröð framkvæmda á þennan hátt:

1. Hringtorg á Njarðarbraut við Bergás og gönguleið austan Njarðarbrautar frá Fitjum að Fitjabakka og örugga þverun gangandi á Njarðarbraut.
2. Hringtorg við Njarðarbraut við Grænásveg.
3. Hringtorg við Njarðarbraut við Víknaveg.
4. Hringtorg við Njarðarbraut við Vallarás.
5. Hægri inn/hægri út við Njarðarbraut við Bolafót/Sjávargötu.

Meirihlutinn telur mikilvægt að bæta aðgengi Ásahverfis að Njarðarbrautinni og tryggja örugga þverun gangandi yfir Njarðarbrautina með gerð hringtorgs við Bergás. Grænás hringtorgið fer síðan næst af stað ásamt undirgöngum í Grænásbrekku fyrir gangandi og hjólandi umferð. Með þessu fyrirkomulagi er meirihlutinn að beina sjónum sínum að því að greiða fyrir umferð inn og út úr Ásahverfinu og samhliða því að leysa umferðaröryggismál fyrir hverfið.

Telur meirihlutinn þessa forgangsröðun vera skynsamlega en þegar hefur verið samþykkt í bæjarstjórn að byggja hringtorg við Bergás.

Meirihluti umhverfis- og skipulagsráðs vill á sama tíma beina því til bæjarráðs að rýna í kostnað við að setja upp, í það minnsta til bráðabirgða, hraðahindrun á Grænásvegi við Njarðarbraut til að efla öryggi gangandi og hjólandi vegfarenda um gatnamótin. Lausn til framtíðar verða undirgöng undir Grænásbrekku en hægt er að bregðast við til skemmri tíma með hraðahindrun til að hægt sé að komast örugglega yfir þessi fjölförnu gatnamót.

Róbert J. Guðmundsson (B), Eysteinn Eyjólfsson (S) og Helga María Finnbjörnsdóttir (Y).“

Til máls tók Guðbergur Reynisson (D) og las upp bókun minnihluta umhverfis- og skipulagsráðs í máli 2 í fundargerð umhverfis- og skipulagsráðs 10. apríl 2026, Njarðarbraut milli Norður- og Suður-Fitja - deiliskipulag (2025110452):

„Sjálfstæðisflokkur situr hjá en er þó sammála mikilvægi þess að Njarðarbraut verði deiliskipulögð og í meginatriðum sammála tillögum Eflu.

Sjálfstæðisflokki finnst mikilvægt að leggja aðaláherslu fyrst á hringtorg við Grænás/ Njarðarbraut og hanna í framhaldi tillögur að umferðaröryggi gangandi og hjólandi vegfarenda bæði við Grænás og Fitjabakka og ætti sá hluti því að vera í forgangi.

Guðbergur Reynisson (D) og Gunnar Felix Rúnarsson (D).“

Til máls tók Guðbergur Reynisson (D) og lagði fram eftirfarandi bókun:

Mál 2 í fundargerð umhverfis- og skipulagsráðs 10. apríl 2026, Njarðarbraut milli Norður- og Suður-Fitja - deiliskipulag (2025110452).

„Sjálfstæðisflokkur er sammála um mikilvægi þess að Njarðarbraut verði deiliskipulögð og í meginatriðum sammála tillögum sérfræðinga Eflu. Þeir sérfræðingar setja í 1. forgang hringtorg við Grænás/ Njarðarbraut og segja að það myndi leysa afkastagetu og öryggi á meginás. Sjálfstæðisflokkurinn situr hjá þar sem tillaga meirihlutans snýr að því að breyta forgangsröðun sérfræðinganna.

Sjálfstæðisflokkurinn fagnar því að í framhaldi verði hannaðar tillögur að umferðaröryggi gangandi og hjólandi vegfarenda bæði við Grænás og Fitjabakka og telur mikilvægt að hraða þeirri vinnu.

Búið var að samþykkja að hefjast ætti handa við undirgöng undir Grænásbrekku fyrir gangandi vegfarendur eins og kom fram á bæjarstjórnarfundi fyrir tæpu ári síðan eða 3. júní 2025 en þar segir í bókun meirihlutans „Auk þess mun meirihlutinn halda áfram forgangsröðun sinni til að bæta umferðina um Grænás en það verkefni er í hönnun nú þegar og mun fara af stað strax á næsta ári. Samhliða því er stefna meirihlutans að setja undirgöng undir Grænás til að tryggja öryggi gangandi og hjólandi vegfarenda."

Nú í fundargerð umhverfis- og skipulagsráðs frá 10. apríl sl. segir: „...til framtíðar verða undirgöng undir Grænásbrekku“.

Við spyrjum því, hversu lengi eiga íbúar í Ásahverfi að bíða eftir undirgöngum undir Grænásbrekku?“

Guðbergur Reynisson, Margrét Sanders, Alexander Ragnarsson og Margrét Þórarinsdóttir Sjálfstæðisflokki.

Til máls tóku Helga María Finnbjörnsdóttir, Halldóra Fríða Þorvaldsdóttir, Margrét A. Sanders, Guðbergur Reynisson og Hjörtur Magnús Guðbjartsson.

Til máls tók Guðný Birna Guðmundsdóttir (S) og lagði fram eftirfarandi bókun:

Mál 2 í fundargerð umhverfis- og skipulagsráðs 10. apríl 2026, Njarðarbraut milli Norður- og Suður-Fitja - deiliskipulag (2025110452).

„Þetta mál er fagnaðarefni. Mikið hefur verið rætt um umferðarflæði og umferðaröryggi á þessum kafla Njarðarbrautarinnar og nú liggur fyrir ákvörðun um forsendur deiliskipulags ásamt forgangsröðun framkvæmda. Það má með sanni segja að málið hafi verið unnið faglega, búið er að rýna ákveðna hluta götunnar, rýna kosti ofanbyggðarvegs, rýna öll gatnamót vegkaflans með sérfræðingum Eflu í umferðargreiningum en auk þess var sérstaklega horft til umferðarflæðis og öryggis gangandi og hjólandi vegfarenda.

Með þessum forsendum er einnig ákveðið að byrjað skuli á hringtorgi við gatnamót Bergáss ásamt því að byrja á gönguleið austan Njarðarbrautar frá Fitjum að Fitjabakka og skapa þannig örugga þverun fyrir gangandi yfir Njarðarbraut. Þessi framkvæmd ein og sér stórbætir öryggi gangandi og hjólandi vegfarenda um Njarðarbrautina ásamt því að bæta aðgengi akandi umferðar um Ásahverfi.

Þá var einnig lögð áhersla á að setja upp hraðahindrun fyrir botni Grænásbrekku til að tryggja öryggi íbúa Ásahverfis og annarra í göngu sinni yfir götuna.

Þetta er gott mál, þetta er ábyrgt mál og þetta er skynsamlegt mál fyrir Ásahverfið og fyrir öryggi íbúa yfir þennan fjölfarna veg.

Að loknum fyrsta fasa verður farið í fasa tvö sem er hringtorg við Grænásbrekku, því næst hringtorg við Víknaveg, síðan við Vallarás og að lokum verða tekin fyrir gatnamót Njarðarbrautar við Bolafót/Sjávargötu.

Umhverfis- og skipulagsráð hefur tekið fyrir málefni Njarðarbrautar á fjölda funda. Nú er kominn tími til aðgerða. Í dag liggur fyrir fundi bæjarstjórnar tillaga meirihluta umhverfis- og skipulagsráðs um forgangsröðun framkvæmda og er forgangsröðunin skynsamleg og ábyrg.

Það vekur mikla furðu að fulltrúar Sjálfstæðisflokksins gátu ekki samþykkt tillögu sem felur í sér að framkvæmdir geta hafist nú í sumar við hringtorg við Bergás, um gönguleið frá Fitjum að Fitjabakka og örugga þverun á Njarðarbraut sem eðlilegt forgangsmál þessarar bæjarstjórnar. Hvar liggur umhyggjan fyrir Ásahverfi nú þegar kemur að því að hefja raunverulegar framkvæmdir? Hvar liggur umhyggjan fyrir öryggi gangandi og hjólandi vegfarenda um einn fjölfarnasta veg sveitarfélagsins, ef ekki hér? Ef ekki núna?

Að sjálfsögðu er mikilvægt að hefjast handa við Grænás sem allra fyrst en aðgengi íbúa Ásahverfis og öryggi gangandi og hjólandi ætti eðlilega að fá forgang og síðan Grænás þar strax á eftir. Það er stærri framkvæmd og tekur lengri tíma en hér getum við brugðist við fljótlega, skuldum við ekki Ásahverfinu það?“

Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu, Halldóra Fríða Þorvaldsdóttir, Róbert Jóhann Guðmundsson og Díana Hilmarsdóttir Framsókn og Helga María Finnbjörnsdóttir Beinni leið.

Bæjarfulltrúar Sjálfstæðisflokks, Margrét A. Sanders, Alexander Ragnarsson, Guðbergur Reynisson og Margrét Þórarinsdóttir sitja hjá í öðru máli fundargerðar umhverfis- og skipulagsráðs 10. apríl 2026, Njarðarbraut milli Norður- og Suður-Fitja - deiliskipulag (2025110452).

Fundargerðirnar samþykktar að öðru leyti 11-0.

Fylgigögn:

Fundargerð 386. fundar umhverfis- og skipulagsráðs 10. apríl 2026
Fundargerð 387. fundar umhverfis- og skipulagsráðs 17. apríl 2026

3. Fundargerð velferðarráðs 9. apríl 2026 (2026010017)

Forseti gaf orðið laust um fundargerðina. Til máls tók Sigurrós Antonsdóttir.

Fundargerðin samþykkt 11-0.

Fylgigögn:

Fundargerð 453. fundar velferðarráðs 9. apríl 2026

4. Fundargerð menntaráðs 10. apríl 2026 (2026010013)

Forseti gaf orðið laust um fundargerðina. Til máls tóku Guðný Birna Guðmundsdóttir, Margrét A. Sanders, Halldóra Fríða Þorvaldsdóttir, Sigurrós Antonsdóttir og Margrét A. Sanders.

Til máls tók Guðný Birna Guðmundsdóttir (S) og lagði fram eftirfarandi bókun:

Mál 5 í fundargerð menntaráðs 10. apríl 2026, Innritun í leikskóla (2026020073).

„Meirihluti bæjarstjórnar Reykjanesbæjar fagnar þeim góða árangri sem náðst hefur í fjölgun leikskólaplássa á kjörtímabilinu. Fjölgað hefur verið um þrjá leikskóla í sveitarfélaginu, leikskólana Asparlaut, Drekadal og Tjarnarlund.

Ánægjufréttirnar eru þær að öll börn fædd árið 2024 hafa fengið úthlutað leikskólaplássum í sveitarfélaginu. Nú er verið að greina stöðu plássa til að bjóða næst börnum sem fædd eru á árinu 2025. Meirihluti bæjarstjórnar hefur forgangsraðað fjárfestingum og uppbyggingu í sveitarfélaginu fyrst og fremst í þágu barna og ungmenna. Það er því mjög ánægjulegt að sveitarfélagið er að uppskera fjölbreytni í uppbyggingu á faglegum leikskólum. Það er börnum í hag að komast á leikskóla fyrir félagsþroska þeirra, það er foreldrum í hag að komast á vinnumarkaðinn og það er fyrirtækjum í hag að Reykjanesbær sé öflugt sveitarfélag með góða grunnþjónustu.

Það verður að segjast að það er dapurlegt að fulltrúar Sjálfstæðisflokksins geti ekki fagnað þessum merka áfanga í hag fjölskyldna í Reykjanesbæ. Meirihluti bæjarstjórnar Reykjanesbæjar sem samanstendur af stjórnmálaflokkunum Samfylkingu, Framsókn og Beinni leið standa vörð um hagsmuni barna og fjölskyldna þeirra. Við erum stolt af uppbyggingu leikskóla og fjölgun plássa og fögnum því að 18 mánaða börn og yngri fái úthlutað leikskólaplássum á árinu.“

Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu, Halldóra Fríða Þorvaldsdóttir, Róbert Jóhann Guðmundsson og Díana Hilmarsdóttir Framsókn og Helga María Finnbjörnsdóttir Beinni leið.

Fundargerðin samþykkt 11-0.

Fylgigögn:

Fundargerð 395. fundar menntaráðs 10. apríl 2026

5. Fundargerð atvinnu- og hafnarráðs 16. apríl 2026 (2026010009)

Forseti gaf orðið laust um fundargerðina. Til máls tóku Hjörtur Magnús Guðbjartsson og Alexander Ragnarsson.

Fundargerðin samþykkt 11-0.

Fylgigögn:

Fundargerð 307. fundar atvinnu- og hafnarráðs 16. apríl 2026

6. Myllubakkaskóli – stækkun á íþróttamannvirki (2021050174)

Forseti fór yfir svör við fyrirspurn Sjálfstæðisflokks frá bæjarstjórnarfundi 7. apríl 2026.

Forseti gaf orðið laust.

Margrét A. Sanders (D) tók til máls og lagði fram eftirfarandi bókun:

„Sjálfstæðisflokkurinn þakkar fyrir svör við fyrirspurn flokksins þar sem við spurðum hver væri helsta ástæða þess að ekki verði kostnaðarauki við stækkun á íþróttahúsi um 64 m2 og viðbótargeymslu 74 m2.

Í svari Reykjanesbæjar kemur m.a. fram eftirfarandi:

1. Við hönnun hússins er gert ráð fyrir að fara í hagkvæmari byggingarlausnir án þess að slaka á kröfum og er sú vinna í gangi.
2. Farið verður í frekari hagræðingar í innkaupum á burðarvirki.
3. Farið verður í hagræðingar í innkaupum á búnaði.
4. Leitað verður áfram leiða til ráðdeildar og aukinnar framlegðar bæði frá verktökum og birgjum.

Sjálfstæðisflokkurinn fagnar því að verið sé að hagræða og leita hagkvæmustu leiða þannig að sparnaður verði á heildarverkefninu þrátt fyrir að erfitt sé að sjá þennan mikla sparnað. Endurbætur við skólann voru upphaflega rúmlega 4 milljarðar en eru nú áætlaðar í heild sinni 6,3 milljarðar.“

Margrét Sanders, Guðbergur Reynisson, Alexander Ragnarsson og Margrét Þórarinsdóttir Sjálfstæðisflokki.

Til máls tóku Guðný Birna Guðmundsdóttir og Margrét A. Sanders.

Forseti gerði fundarhlé kl. 19:07.
Fundur settur aftur kl. 19:32.

Til máls tók Guðný Birna Guðmundsdóttir (S) og lagði fram eftirfarandi bókun:

„Meirihluti bæjarstjórnar fagnar því að búið er að taka ákvörðun um stærð íþróttahússins við Myllubakkaskóla. Með því að stækka húsið lítillega frá fyrstu tillögu er hægt að nýta húsnæðið með fjölbreyttari hætti og það án þess að hækka framkvæmdakostnað. Ástæða þess að stækkunin rúmast innan heildarkostnaðaráætlunar skv. deildarstjóra eignaumsýslu er sú að rými sem er verið að stækka eru ekki eins kostnaðarsöm eins og væri verið að byggja hefðbundna fermetra og hönnun miðast við að byggja stækkunina á sem hagkvæmastan hátt án þess að slaka á gæðum. Það er því ekki verið skera niður eða slaka á kröfum í verkefninu en þegar horft er til heildarfjárheimilda verkefnisins þá hefur frá upphafi verið leitast við að reka verkið á sem hagkvæmastan hátt og leita leiða til ráðdeildar og aukinnar framlegðar bæði frá verktökum og birgjum.

-

Líkt og farið hefur verið yfir með fulltrúum Sjálfstæðisflokksins tvisvar áður í bæjarstjórn, var upphafleg framkvæmdaáætlun Myllubakkaskóla, fyrir mannvirkið eingöngu, alls 4,372 milljarðar.

Þegar litið er til heildarkostnaðar verkefnisins með mannvirki, lóð, búnaði, hönnun og verkefnastýringu þá er áætlaður heildarkostnaður 6,321 milljarðar. Verkinu er ólokið og er enn innan fjárheimilda.

Það er algjört lágmark að bæjarfulltrúar vitni í réttar upplýsingar.“

Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu, Halldóra Fríða Þorvaldsdóttir, Róbert Jóhann Guðmundsson og Díana Hilmarsdóttir Framsókn og Helga María Finnbjörnsdóttir Beinni leið.

Til máls tóku Margrét A. Sanders og Guðný Birna Guðmundsdóttir.

Forseti gerði fundarhlé kl. 19:41.
Fundur settur aftur kl. 19:56.

Til máls tók Margrét A. Sanders (D) og lagði fram eftirfarandi bókun:

„Sjálfstæðisflokkurinn undrast það að meirihluti bæjarstjórnar Samfylkingar, Framsóknar og Beinnar leiðar skuli draga í efa útreikning flokksins um að verkefnið hafi farið fram úr áætlun. Ef allt verkefni Myllubakkaskóla með íþróttahúsinu meðtöldu var áætlað á sínum tíma 4 milljarðar án lóðar en síðar kom fram að það væri án hönnunarkostnaðar, sem þó kom ekki fram í upphafi. Með framreikningi byggingarvísitölu er heildarkostnaðurinn 4,7 milljarðar ef allt er vísitöluuppreiknað sem er ekki rétt að gera.

Ef dreginn er frá núverandi 6,3 milljörðum hönnunarkostnaður og lóð þá er uppreiknaður kostnaður 5,4 milljarðar. Mismunurinn er því rúmlega 700 milljónir.“

Margrét Sanders, Guðbergur Reynisson, Alexander Ragnarsson og Margrét Þórarinsdóttir Sjálfstæðisflokki.

Til máls tók Guðný Birna Guðmundsdóttir (S) og lagði fram eftirfarandi bókun:

„Meirihlutinn ítrekar að þegar gerð er kostnaðaráætlun fyrir fjögurra ára verkefni, þá er ekki gert ráð fyrir vísitöluhækkun í upphaflegri kostnaðaráætlun þar sem ekki er hægt að spá fram í tímann. Til þess að vera með raunkostnað hvers tíma, þarf að reikna sig til baka því byggingarvísitala hækkar árlega. Auk þess var sérstaklega tekið fram þegar farið var yfir forsendur verkefnisins, tvisvar í bæjarstjórn, að efniskostnaður hefur hækkað umtalsvert eftir að stríðið hófst í Úkraínu og vegna Covid faraldursins.

Það verður að teljast sérstakt að bæjarfulltrúar Sjálfstæðisflokksins treysti ekki sveitarfélaginu, hagdeild þess, stjórn eignasjóðs og starfsfólki eignaumsýslu til að setja fram réttar upplýsingar um framkvæmdakostnað innan sveitarfélagsins. Meirihluti bæjarstjórnar minnir Sjálfstæðisflokkinn enn og aftur á að flokkurinn er með þrjá fulltrúa í stjórn eignasjóðs.“

Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu, Halldóra Fríða Þorvaldsdóttir, Róbert Jóhann Guðmundsson og Díana Hilmarsdóttir Framsókn og Helga María Finnbjörnsdóttir Beinni leið.

7. Ársreikningur Reykjanesbæjar 2025 – fyrri umræða (2026040150)

Kjartan Már Kjartansson bæjarstjóri fylgdi ársreikningi Reykjanesbæjar 2025 úr hlaði.

Forseti gaf orðið laust.

Til máls tók Guðný Birna Guðmundsdóttir.

Ársreikningi Reykjanesbæjar 2025 vísað til síðari umræðu 5. maí 2026.

Fleira ekki gert og fundi slitið kl. 20:17.