718. fundur bæjarstjórnar Reykjanesbæjar, haldinn að Grænásbraut 910, 5. maí 2026, kl. 17:00

Viðstaddir: Alexander Ragnarsson, Díana Hilmarsdóttir, Guðbergur Reynisson, Guðný Birna Guðmundsdóttir, Halldóra Fríða Þorvaldsdóttir, Helga María Finnbjörnsdóttir, Hjörtur Magnús Guðbjartsson, Margrét A. Sanders, Margrét Þórarinsdóttir, Róbert Jóhann Guðmundsson og Sigurrós Antonsdóttir. Í forsæti var Guðný Birna Guðmundsdóttir.

Að auki sátu fundinn Kjartan Már Kjartansson bæjarstjóri og Hrefna Gunnarsdóttir ritari.

1. Fundargerðir bæjarráðs 22. og 30. apríl 2026 (2026010008)

Forseti gaf orðið laust um fundargerðirnar.

Fundargerðirnar samþykktar án umræðu 10-0.

Fylgigögn:

Fundargerð 1561. fundar bæjarráðs 22. apríl 2026
Fundargerð 1562. fundar bæjarráðs 30. apríl 2026

2. Fundargerð stjórnar eignasjóðs 16. apríl 2026 (2026010015)

Forseti gaf orðið laust um fundargerðina. Til máls tók Halldóra Fríða Þorvaldsdóttir.

Fundargerðin samþykkt 10-0.

Fylgigögn:

Fundargerð 28. fundar stjórnar eignasjóðs 16. apríl 2026

Margrét Þórarinsdóttir mætti inn á fundinn kl. 17:10.

3. Fundargerð lýðheilsuráðs 21. apríl 2026 (2026010011)

Forseti gaf orðið laust um fundargerðina. Til máls tók Sigurrós Antonsdóttir.

Fundargerðin samþykkt 11-0.

Fylgigögn:

Fundargerð 67. fundar lýðheilsuráðs 21. apríl 2026

4. Fundargerð íþrótta- og tómstundaráðs 21. apríl 2026 (2026010010)

Forseti gaf orðið laust um fundargerðina.

Fundargerðin samþykkt 11-0 án umræðu.

Fylgigögn:

Fundargerð 204. fundar íþrótta- og tómstundaráðs 21. apríl 2026

5. Fundargerð menningar- og þjónusturáðs 24. apríl 2026 (2026010012)

Forseti gaf orðið laust um fundargerðina. Til máls tóku Sigurrós Antonsdóttir og Guðný Birna Guðmundsdóttir.

Fundargerðin samþykkt 11-0.

Fylgigögn:

Fundargerð 75. fundar menningar- og þjónusturáðs 24. apríl 2026

6. Akademíureitur - svar við fyrirspurn (2025010481)

Guðný Birna Guðmundsdóttir fór yfir svör við fyrirspurn sem bæjarfulltrúar Sjálfstæðisflokks lögðu fram á 715. fundi bæjarstjórnar 17. mars sl.

7. Sveitarstjórnarkosningar 16. maí 2026 - kosning undirkjörstjórnar (2026010121)

Tilnefningar yfirkjörstjórnar um starfsfólk í undirkjörstjórn skv. 17. gr. kosningalaga nr. 112/2021.

Til máls tóku Margrét A. Sanders og Guðný Birna Guðmundsdóttir.

Tilnefningar samþykktar 11-0.

Fylgigögn:

Tilnefnd til undirkjörstjórnar

8. Ársreikningur Reykjanesbæjar 2025 – síðari umræða (2026040150)

Ársreikningur Reykjanesbæjar 2025 tekinn til síðari umræðu. Forseti gaf Kjartani Má Kjartanssyni bæjarstjóra orðið. Fór hann yfir helstu stærðir í ársreikningnum.

Til máls tók Guðný Birna Guðmundsdóttir (S) og lagði fram eftirfarandi bókun bæjarfulltrúa Framsóknar, Samfylkingar og Beinnar leiðar:

„Meirihluti bæjarstjórnar fagnar þeirri sterku og jákvæðu rekstrarniðurstöðu sem fram kemur í ársreikningi Reykjanesbæjar fyrir árið 2025.

Niðurstaðan er umtalsvert betri en áætlanir gerðu ráð fyrir. Rekstrarniðurstaða bæjarsjóðs var jákvæð um 440 milljónir króna, samanborið við áætlaðar 186 milljónir króna. Í samanteknum reikningi A og B hluta nam jákvæð niðurstaða 2.254 milljónum króna, en áætlun gerði ráð fyrir 1.357 milljónum króna.

Þessi árangur skýrist fyrst og fremst af sterkari tekjugrunni en gert var ráð fyrir, sérstaklega vegna aukinna útsvarstekna sem endurspegla bæði jákvæða íbúaþróun og öflugt atvinnulíf. Heildartekjur samstæðunnar námu 42,4 milljörðum króna á móti rekstrargjöldum upp á 34,4 milljarða króna sem skilaði 8 milljarða króna rekstrarafgangi fyrir afskriftir og fjármagnsliði.

Meirihlutinn leggur áherslu á að aukið veltufé frá rekstri hafi verið nýtt með ábyrgum hætti til nauðsynlegrar uppbyggingar innviða og viðhalds, ekki síst vegna mikillar fólksfjölgunar og brýnna verkefna í skólahúsnæði og öðrum eignum sveitarfélagsins. Fjárfestingar voru umfangsmiklar á árinu, samtals 4.566 milljónir króna í bæjarsjóði og 7.925 milljónir króna í samstæðu, sem undirstrikar framtíðarsýn og uppbyggingu til lengri tíma.

Efnahagur sveitarfélagsins er sterkur, með heildareignir samstæðunnar upp á 108 milljarða króna og traust sjóðstreymi, þar sem hreint veltufé frá rekstri nam 7,7 milljörðum króna. Þá hefur tekjuþróun á hvern íbúa verið jákvæð, þar sem skatttekjur og framlög jukust í 1.033 þúsund krónur á íbúa, samanborið við 954 þúsund árið áður.

Skuldaviðmið bæjarsjóðs er 104,85% og samstæðunnar 107,55%.

Meirihlutinn telur að þessi niðurstaða staðfesti ábyrga fjármálastjórn, hóflega tekjuáætlun og markvissa forgangsröðun í þágu íbúa. Sveitarfélagið stendur vel undir skuldbindingum sínum þrátt fyrir áframhaldandi uppbyggingu og krefjandi rekstrarumhverfi.

Meirihlutinn lítur því með bjartsýni til áframhaldandi uppbyggingar og þjónustu við íbúa Reykjanesbæjar enda erum við stolt af ábyrgum rekstri bæjarins.“

Díana Hilmarsdóttir, Halldóra Fríða Þorvaldsdóttir og Róbert Jóhann Guðmundsson Framsóknarflokki, Guðný Birna Guðmundsdóttir, Hjörtur Magnús Guðbjartsson og Sigurrós Antonsdóttir Samfylkingu og Helga María Finnbjörnsdóttir Beinni leið.

Til máls tók Margrét A. Sanders (D) og lagði fram eftirfarandi bókun bæjarfulltrúa Sjálfstæðisflokks:

„Hækkandi skuldsetning og rekstrarkostnaður

Sjálfstæðisflokkurinn hefur verulegar áhyggjur af rekstrarhæfi Reykjanesbæjar. Heildarskuldir sveitarfélagsins hækka á milli ára um 14,7% eða um rétt tæplega 5 milljarða króna. Á sama tíma og tekjur hækka um 2,5% milli ára eru rekstrargjöld að hækka um 5,1%. Með lækkandi framlegð milli ára uppá rúmlega 20% getur sveitarfélagið átt á hættu að lenda í erfiðleikum við að standa við fjárhagslegar skuldbindingar sínar án þess að þurfa treysta á sölu eigna eða frekari lántökur.

Öflug áætlunargerð og eftirlit með framkvæmdum spila lykilhlutverk í rekstri sveitarfélags og leggur Sjálfstæðisflokkurinn til að áætlunargerð og kostnaðareftirlit verði eflt til muna.

Sjálfstæðisflokkurinn gerir ekki athugasemd við lánveitingar sem eru skipulagðar fyrirfram sem og vel undirbúnar fjárfestingar en framkvæmdir og lánveitingar hafa verið of tilviljanakenndar og þar af leiðandi mun dýrari en ef alvöru áætlanir væru til staðar. Auk þess hefur rekstrarkostnaður hækkað, og tekjur ekki fylgt með.

Í endurskoðunarskýrslu PWC segir: „Veltufjárhlutfall reiknast sem hlutfall veltufjármuna og skammtímaskulda og sýnir hversu líklegt er að sveitarfélagið standi undir skuldum sem þurfa að greiðast á komandi ári. Venjulega þykir eðlilegt að gera kröfu til þess að hlutfall þetta sé hærra en einn.”

Nú er veltufjárhlutfall bæjarsjóðs Reykjanesbæjar í árslok 2025 0,53 og hefur verið undir 1 síðustu 5 ár, sem bendir til þess að Reykjanesbær hefur þurft og þurfi áfram að grípa til kostnaðarsamra ráðstafana í rekstri sínum til að standa undir skammtímaskuldbindingum eins og endurskoðandinn bendir réttilega á.

Þegar horft er á rekstrarniðurstöðu A hluta Reykjanesbæjar að frádregnum greiddum fjármagnsgjöldum og afborgunum langtímaskulda er hún aðeins tæplega 171 milljón króna. Reykjanesbær getur samkvæmt þessu ekki staðið undir neinum öðrum skuldbindingum nema greiðslu vaxta og afborgana langtímalána ef ekki verður breyting á rekstri sveitarfélagsins.“

Alexander Ragnarsson, Guðbergur Reynisson, Margrét A. Sanders og Margrét Þórarinsdóttir Sjálfstæðisflokki.

Til máls tóku Guðný Birna Guðmundsdóttir, Halldóra Fríða Þorvaldsdóttir og Margrét A. Sanders.

Ársreikningur Reykjanesbæjar 2025 samþykktur 11-0.

Fleira ekki gert og fundi slitið kl. 18:05.