Andrea Gylfadóttir og Þórir Baldursson á Erlingskvöldi

Konur verða í forgrunni á árlegu Erlingskvöldi Bókasafns Reykjanesbæjar vegna 100 ára afmælis kosningaréttar kvenna. Menningarkvöldið er í ár unnið í samstarfi við Byggðasafn Reykjanesbæjar og fer fram í Bíósal Duus safnahúsa fimmtudagskvöldið 26. mars. Dagskrá hefst kl. 20:00.

Erla Hulda Halldórsdóttir sérfræðingur hjá Sagnfræðistofnun Háskóla Íslands mun flytja erindið „Konur, saga og kvenfrelsi“ og Sigrún Ásta Jónsdóttir forstöðumaður Byggðasafns mun fjalla um viðburði á vegum Reykjanesbæjar sem tengjast 100 ára afmælinu. Gestum mun gefast kostur á að líta á þrjár af sýningum Duus safnahúsa, 15/15 - Konur og myndlist, Gestastofu Reykjanes jarðvangs og úrval verka Erlings Jónssonar, sem Erlingskvöld er kennt við.

Rúsínan í pylsuendann er tónlistarflutningur Andreu Gylfadóttur og Þóris Baldurssonar. Andrea mun syngja texta eftir konur við undirleik Þóris. 

Enginn aðgangseyrir og allir velkomnir.