Þriðjudaginn 7. mars er Bókasafn Reykjanesbæjar 65 ára og þar með elsta stofnun bæjarins.

Bæjar- og héraðsbókasafn Keflavíkur var formlega opnað 7. mars 1958 á efri hæð íþróttahúss barnaskólans og byggir á gömlu lestararfélögunum.

Bókasafn Reykjanesbæjar varð svo til árið 1994 í kjölfar sameiningar Hafna, Keflavíkur og Njarðvíkur í eitt sveitarfélag þegar almenningsbókasöfn þeirra voru sameinuð í eitt safn. Á þessum tíma hefur starfsemi Bókasafn Reykjanesbæjar þróast í takt við samfélagið á hverjum tíma.

Bókasöfn 21. aldar eru að þróast í öflug menntunar- og menningarsetur. Söfnin eru ekki lengur bara fyrir bækur heldur eru þau hlutlausir staðir fyrir samskipti fólks og þekkingaröflun í sinni fjölbreyttustu mynd. Þau eru lifandi menningarstofnanir sem eru að þróast í takt við breyttar þarfir íbúa og bókasöfn eru staðir þar sem hjartað slær í samfélögum.