Eldgos hófst rétt fyrir kl. 4 í nótt milli Hagafells og Stóra-Skógfells. Sprungan hefur lengst til norðausturs og er nú nærri tveggja kílómetra löng. Þrátt fyrir að gosið sé á tiltölulega heppilegum stað m.t.t. innviða, veldur það verulegri gasmengun eins og stendur.

Mengun mælist í morgun mjög mikil í Innri Njarðvík og fór styrkur brennisteinsdíoxíðs í yfir 5000 µg/m³ – langt yfir heilsuverndarmörkum.

Tekin hefur verið ákvörðun að loka vinnuskólanum í dag vegna mengunar og nornahára, lítilla glerflísa sem fjúka yfir bæinn. 

Þá hefur útisvæði í Vatnaveröld einnig verið lokað vegna nornaháranna sem geta stungist upp í fætur á gestum. Innisvæðið er áfram opið. 

Fólk er hvatt til að:

• Loka gluggum og dyrum
• Halda sig innandyra ef þung mengun er á svæðinu
• Fylgjast með loftgæðum á loftgaedi.is og á vef Veðurstofu Íslands

Við hvetjum ykkur til að fylgjast vel með spám og tilkynningum næstu daga.