Í gærkvöldi voru íslensku myndlistarverðlaunin 2020 veitt fyrir fullu húsi í Iðnó í Reykjavík. Að þessu sinni féllu þau í skaut Guðjóni Ketilssyni fyrir sýninguna Teikn sem opnuð var í Listasafni Reykjanesbæjar janúar 2019. Sýningarstjóri sýningarinnar var Aðalsteinn Ingólfsson listfræðingur, sem hefur verið einn helsti sérfræðingur og ráðgjafi safnsins frá upphafi.

Þessi verðlaun eru mikilvæg viðurkenning á því metnaðarfulla og faglega starfi sem unnið hefur verið í safninu frá stofnun þess árið 2003. Ein birtingarmynd þess er sú að myndlistarmenn á borð við Guðjón, sem nú hefur hlotið þessa helstu viðurkenningu íslenskra myndlistarmanna, líta til safnsins sem vettvangs fyrir listsköpun sína og jafnframt að litið er til safnsins við val á sýningum ársins.

Guðjón er einn af fremstu myndlistarmönnum þjóðarinnar og hefur haldið yfir þrjátíu einkasýningar á rúmlega fjörutíu ára ferli sínum. Verk hans eru í eigu allra helstu listasafna á Íslandi auk nokkurra erlendis. Sýning Guðjóns í Listasafni Reykjanesbæjar vakti mikla athygli og hrifningu gesta. Hún var samsett úr átta verkum sem öll fjölluðu með einum eða öðrum hætti um tákn, táknmerkingu og „lestur,“ í víðum skilningi.