Nettómótið í körfuknattleik fór fram í Reykjanesbæ um síðustu helgi. Mótið að þessu sinni var hið fjölmennasta frá upphafi en 25 félög sendu 206 lið  á aldrinu 6-11 ára.  Keppendur voru  1255 og spiluðu þeir 488 leiki á 31 klukkustund.  Óhætt er að segja 2-3 hafi fylgt hverjum keppanda og því hafi yfir þrjú þúsund gestir heimsótt Reykjanesbæ þessa helgi.
Gist var  í öllum skólum bæjarins og ýmislegt var í boði, bæði fyrir keppendur og fylgdarfólk í bæjarfélaginu. Þar má m.a. nefna, Skessuhellir, Víkingaheima, Vatnaveröld,  bíósýningar, Ungmennagarðinn og leiksvæði í Reykjaneshöll. Kvöldvaka var á laugardagskvöldinu og mótsslit um miðjan dag á sunnudaginn.

Það eru Körfuknattleiksdeildirnar í Keflavík og Njarðvík sem sameiginlega standa að Nettómótinu.