Það var líflegt um að litast í Reykjanesbæ í gær þegar búningaklædd börn þeystust um bæinn syngjandi í verslunum og fyrirtækjum á svæðinu í von um góðgæti í pokana sína að launum. 

Neðan úr bæ lá leið þeirra í Reykjaneshöllina þar sem köttur var sleginn úr tunnum og börnin hoppuðu og skoppuðu í gegnum þar til gerða kastala, auk þess sem boðið var upp á keppni í limbói, andlitsmálningu o.fl. 

Það var Tónlistarskóli Reykjanesbæjar sem sá um vel heppnuð hátíðahöldin í Reykjaneshöllinni og naut þar dyggrar aðstoðar starfsmanna úr Þjónustumiðstöðinni og kunnum við þeim bestu þakkir fyrir flotta skemmtun.