Hafragrautur alla morgna í heilsuleikskólanum Heiðarseli

Þann 8.október 2004 varð Heiðarsel heilsuleikskóli og fór að vinna eftir heilsustefnu Unnar Stefánsdóttur. Markmið skólans er að auka gleði og vellíðan barnanna með áherslu á leik, hreyfingu, næringu og listsköpun í leik og starfi.

Heilsuleikskólinn Heiðarsel hefur tekið þátt í þróun heilsustefnunnar og fylgt nýjum straumum sem henni fylgja. Það nýjasta hjá okkur er breyting á matseðlum skólans. Samtök heilsuleikskóla keyptu matseðla og uppskriftir frá Skólum ehf. Eins og við vitum flest er matarræði stór þáttur í heilsu, þroska, vexti og líðan barna og leggjum við ríka áherslu á að börnin fái hollan og næringarríkan mat úr sem flestum fæðuflokkum. Matseðlarnir sem við fylgjum eru fjölbreyttir og er mjög þægilegt fyrir matráða að vinna eftir þeim.

Á morgnana er alltaf hafragrautur en það sem gerir hann fjölbreyttan er meðlætið með honum ferskir ávaxtabitar, kakóduft, kanill/kókosmjölblanda rúsínur o.fl. 

Á heimasíðu leikskólans sem og í fataklefa geta foreldrar séð matseðil vikunnar, á honum kemur fram morgunmatur, hádegismatur og síðdegishressing fyrir alla dagana.

Tekið hefur verið vel í nýju matseðlana, en eins og með allt annað þarf að gefa öllum breytingum tíma þar sem að oft á tíðum erum við bæði fullorðnir og börn ekkert nema vaninn.

Börnin í heilsuleikskólanum Heiðarseli eru dugleg að smakka allt sem er í boði og læra þannig að bæta nýjum fæðutegundum í safnið sem á ef til vill eftir að nýjast þeim vel í framtíðinni, því eins og máltakið segir: „þú ert það sem þú borðar“.

Svava Ósk Stefánsdóttir aðstoðarleikskólastjóri

Sigríður Hrönn Guðmundsdóttir matartæknir

Hafragrautnum ausið á disk í heilsuleikskólanum Heiðarseli.