03.01.2012 Fréttir

Sameiginleg uppskeruhátíð ÍRB og Reykjanesbæjar fór fram í Ljónagryfjunni kl. 13:00 síðasta dag ársins 2011 þar sem útnefndir voru íþróttamenn allra sérgreina innan ÍRB ásamt því að Íþrótta- og tómstundaráð Reykjanesbær heiðraði alla þá 214 íþróttamenn sem urðu Íslandsmeistarar á árinu.

Í ræðu Jóhanns B. Magnússonar formanns ÍRB kom m.a. fram að alls eru stundaðar 17 íþróttagreinar innan bandalagsins og að þetta var í 16 sinn sem útnefning íþróttamanns Reykjanesbæjar fer fram. Jóhann vakti einnig athygli á því að ÍSÍ kynnti nýlega margvíslega athyglisverða tölfræði um þátttöku og umfang íþróttastarfsins.  Þar kom m.a. fram að 96,3% 11 ára barna á Íslandi hafa einhvertíma stundað íþróttir hjá íþróttafélögum innan ÍSÍ.  

Árni Sigfússon bæjarstjóri flutti ávarp og gat þess m.a. að árið 2011 var Ár sjálfboðaliðans. Hann vildi nota þetta tækifæri og þakka öllum þeim fjölda stjórnarmanna, þjálfara og foreldra sem leggja á sig gríðarlegt sjálfboðastarf innan allra íþróttadeilda til að sjá til þess að rekstur þeirra gangi sem allra best. Hann bað viðstadda að gefa öllu þessu frábæra fólki gott lófaklapp. Það væri m.a. þessu góða fólki að þakka að árangur afreksfólksins er svo góður sem raun ber vitni. Árni lagði einnig áherslu á að það væri hverju bæjarfélagi mjög góð auglýsing að eiga afreksfólk. Bæjaryfirvöld hafi í gegnum árin stutt við bakið á íþróttunum með markvissri uppbyggingu góðra íþróttamannvirkja ,ásamt fjárstuðningi m.a. í formi þjálfaralauna og það væri stefnan að halda áfram á þeirri braut.

Hér að neðan eru nöfn þeirra sem kosnir voru íþróttamenn sérgreina 2011. Úr þessum hópi er svo íþróttamaður Reykjanesbæjar valinn:

  • Akstursíþróttamaður Reykjanesbæjar 2011 - Júlíus Ævarsson
  • Júdómaður Reykjanesbæjar 2011 –Björn Lúkas Haraldsson
  • Badmintonmaður Reykjanesbæjar 2011 - Ísabella Kjartansdóttir. 
  • Fimleikamaður Reykjanesbæjar  2011 - Heiðrún Rós Þórðardóttir
  • Handboltamaður Reykjanesbæjar 2011 - Arnþór Ingi Ingvason
  • Hestaíþróttamaður Reykjanesbæjar 2011 - Jóhanna Margrét Snorradóttir
  • Íþróttamaður fatlaðra í Reykjanesbæ 2011 – Arnar Már Ingibjörnsson
  • Knattspyrnumaður Reykjanesbæjar 2011 – Ómar Jóhannsson
  • Kylfingur Reykjanesbæjar 2011 - Karen Guðnadóttir
  • Körfuknattleiksmaður Reykjanesbæjar 2011 - Pálína María Gunnlaugsdóttir
  • Lyftingamaður Reykjanesbæjar 2011 - Steinar Freyr Hafsteinsson
  • Skotmaður Reykjanesbæjar 2011 - Jens Magnússon
  • Sundmaður Reykjanesbæjar 2011 – Erla Dögg Haraldsdóttir
  • Taekwondomaður Reykjanesbæjar 2011 - Jón Steinar Brynjarsson
  • Þríþrautarmaður Reykjanesbæjar 2011 – Klemenz Sæmundsson

Íþróttamaður Reykjanesbæjar 2011 er körfuknattleikskonan Pálína María Gunnlaugsdóttir

Til hamingju Pálína !

Til baka