Leikskólinn Holt fékk góðan styrk frá Erasmus+ til að vinna samstarfsverkefni með skólum í þremur löndum í Póllandi, Slóveníu og á Spáni. Verkefnið ber heitið „Through democracy to literacy“ og mun standa yfir næstu tvö árin.

Holt er stýriskóli verkefnisins og heldur utan um skýrslur og verkefnið í heild. Styrkurinn gerir skólanum kleift að ferðast til þessara landa, skoða og kynnast starfi samstarfsskólanna.

Eins og nafnið ber með sér þá ætlar starfsfólk að rýna í lýðræði og læsi og skoða hvernig það stendur að þessum þáttum í skólastarfinu. Markmiðið er að bæta vinnubrögðin og læra nýja hluti. 

Að sögn Kristínar Helgadóttur leikskólastjóra er þetta bæði spennandi og áhugavert verkefni og er starfsmannahópurinn fullur tilhlökkunar að takast á við það.