Nemendur í 5.–7. bekk í öllum grunnskólum Reykjanesbæjar fengu skemmtilega tilbreytingu frá skólastarfinu í dag, 23. apríl, þegar þeir sáu leiksýninguna Orri óstöðvandi í Hljómahöll. Sýningin var í boði Þjóðleikhússins og byggð á vinsælum bókum Bjarna Fritzson um Orra og vinkonu hans Möggu Messi.

Verkið fangar hugarheim barna með húmor, líflegum sögum og hugrökkum hetjudáðum. Orri umbreytist í ofurhetjuna Orra óstöðvandi þegar hann þarf á hugrekki og sjálfstrausti að halda – og ásamt Möggu lenda þau í alls konar ævintýrum, hversdagslegum jafnt sem ótrúlegum, og eru uppátækjum þeirra engin takmörk sett.

Tónlistin í sýningunni er eftir vinsæla tónlistartvíeykið JóaPé og Króla og setti skemmtilegan svip á verkið. Sýningin ferðast nú um landið á vormisseri og er sýnd fyrir miðstig grunnskóla víða um land.