Kosningu í lýðræðisverkefninu Betri Reykjanesbær er lokið. Alls bárust 3.484 atkvæði í þau 27 verkefni sem kosið var um og ánægjulegt hversu margir tóku þátt.

30 milljónir í framkvæmdir

Á kjörskrá voru um 16.200 einstaklingar en það voru íbúar 15 ára og eldri í Reykjanesbæ sem gátu tekið þátt í kosningunni. Framtíðarnefnd Reykjanesbæjar vann úr öllum innsendum hugmyndum og alls var kosið um 27 hugmyndir.
Þær hugmyndir sem voru hlutskarpastar og munu núna fara í endanlegt kostnaðarmat:

• Ævintýralegt leiksvæði í Skrúðgarði - (372 atkvæði)
• Vatnsholt Rekjanesbæ (Trúðaskógur) – (327 atkvæði)
• Strandsvæði í Seylu - (225 atkvæði)
• Ærslabelgur og leiktæki í Inni Njarðvík - (218 atkvæði)
• Úti-vísindaleiktæki fyrir börn - (154 atkvæði)
• Fótboltagolfvöllur – Sumarvöllur - (152 atkvæði)

Farið verður í framkvæmdir upp að 30 milljónum en verkefni sem ekki ná inn í þann kostnaðarramma þurfa að bíða betri tíma. Nánari upplýsingar verða gefnar þegar endanlegt kostnaðarmat liggur fyrir og við sjáum hve margar hugmyndir rúmast innan rammans.