Söngurinn ómaði um allan bæ

Ingólfur Þórarinsson, Ingó veðurguð, söng inn Ljósanótt með þátttöku allra grunnskólabarna og elstu leikskólabarna í Reykjanesbæ. Þegar söngkeppni hófst á milli kynja mátti heyra sönginn óma um allan bæ. Þannig verður ljósanótt, enda fjöldi tónlistarviðburða víða um bæinn allt til miðnættis á sunnudag auk ýmissa listviðburða, keppna og afþreyingar.

Að venju fór setningarathöfnin fram við Myllubakkaskóla. Svæðið var skreytt stórum ljósanæturblöðrum og hver skóli bar sinn einkennisfána og -lit. Samkór nemenda úr grunnskólum Reykjanesbæjar leiddi söng ljósanæturlagsins, Velkomin á Ljósanótt, og Meistari Jakob var sunginn á þremur tungumálum. Eftir mikið fjör, hopp, klapp og fagnaðarlæti var stóri ljósanæturfáninn dreginn að húni í skrúðgarði af fulltrúum allra grunnskólanna í Reykjanesbæ. Fáninn stækkar á hverju ári þegar við bætist einkennislitur skóla og stefnt er að því að fáninn verði sá stærsti á landinu. Aldrei hafa eins mörg börn tekið þátt í setningarathöfn Ljósanæturhátíðar og nú, enda hefur íbúum fjölgað mikið að undanförnu. Grunnskólanemar eru nú tæplega 2400 af um 17.500 íbúum. Af heildarfjölda er um 19% af erlendu bergi brotnir.

Hver viðburður rekur annan í dag. Púttmót verður við Mánagötu, Meistaraflokkur Keflavíkur og Nes ætla að takast á í knattspyrnu á Nettóvellinum og Skotdeild Keflavíkur býður upp á opinn dag. Ungmennin ætla bæði að skemmta sér á ljósanæturdiskói og í sundlaugarpartýi og sýningar verða opnar víða um bæinn. Kvöldinu lýkur með hjólbörutónleikum í Keflavíkurkirkju. Alla dagskrá má nálgast á http://ljosanott.is.