Veðurstofa Íslands hefur gefið út gult viðvörunarstig vegna mikillar ölduhæðar og áhlaðanda sem spáð er í Faxaflóa í dag, miðvikudag. Viðvörunin nær til höfuðborgarsvæðisins og allrar suðurstrandarinnar og verður í gildi frá hádegi í dag og fram yfir hádegi á fimmtudag.

Á vef Veðurstofunnar kemur fram að þar sem stórstreymt er geti sjór gengið á land og valdið staðbundnu tjóni. Íbúar eru því hvattir til að tryggja alla lausamuni utandyra til að koma í veg fyrir foktjón.

Reykjanesbær hvetur íbúa til að fylgjast vel með veðurspám og viðvörunum á vef Veðurstofu Íslands og fara varlega í dag.