Þrír meðal fjögurra efstu í stærðfræði í 4. bekk

Þegar niðurstöður samræmdra könnunarprófa 2012 eru skoðaðar kemur í ljós að þrír af grunnskólum Reykjanesbæjar eru meðal fjögurra efstu í stærðfræði í 4. bekk, á landsvísu. Heiðarskóli er efstur, Holtaskóli í þriðja sæti og Myllubakkaskóli í því fjórða, auk þess sem Njarðvíkurskóli er yfir landsmeðaltali á prófinu.  Miklar framfarir hafa einnig orðið í stærðfræði 4. bekkjar í Grunnskólanum í Sandgerði, sem er á þjónustusvæði Fræðsluskrifstofu Reykjanesbæjar, og er sá skóli í ellefta sæti yfir landið.

Þessi ánægjulegu tíðindi styrkja skólana í því að halda áfram því metnaðarfulla starfi sem unnið hefur verið í anda framtíðarsýnar Fræðslusviðs Reykjanesbæjar.  Niðurstöðurnar hvetja skólana líka til að læra hver af öðrum og tileinka sér vinnubrögð sem skila árangri.