Þrír íbúar Reykjanesbæjar gróðursettu þrjú íslensk birkitré í Paradís neðan Grænáss í morgun. Gróðursetningin var liður í hátíðardagskrá vegna þeirra tímamóta að 35 ár eru liðin síðan Frú Vigdís Finnbogadóttir var kjörin forseti Íslands, fyrsta konan í heiminum til að vera þjóðkjörin forseti.

Eftir að Sólveig Þórðardóttir ljósmóðir og fyrrverandi forseti bæjarstjórnar Njarðvíkur og Anna Lóa Ólafsdóttir forseti bæjarstjórnar Reykjanesbæjar höfðu flutt ávarp í tilefni dagsins gróðursetti Ólöf Rós Davíðsdóttir 5 ára tré fyrir stúlkur, Ágúst Fannar Ástþórsson 4 ára fyrir pilta og Sara Ross Bjarnadóttir barnshafandi fyrir komandi kynslóðir. Þórólfur Þorsteinsson harmonikkuleikari lék við athöfnina.

Vigdís er verndari Landverndar og lagði í forsetatíð sinni mikla áherslu á landgræðslu og náttúruvernd. Hún gróðursetti bæði í Barnalundi og við Rósaselsvötn í forsetatíð sinni og er Paradís því þriðju staðurinn í Reykjanesbæ sem nýtur góðs af landgræðsluátaki Vigdísar. 

Mikil uppbygging er áætluð í Paradís á komandi misserum og mun lautin því standa undir nafni, að sögn Berglindar Ásgeirsdóttur garðyrkjufræðings Reykjanesbæjar.

Myndirnar sem fylgja fréttinni eru frá Víkurfréttum.