713. fundur bæjarstjórnar Reykjanesbæjar, haldinn að Grænásbraut 910, 17. febrúar 2026, kl. 17:00

Viðstaddir: Alexander Ragnarsson, Birgitta Rún Birgisdóttir, Díana Hilmarsdóttir, Guðbergur Reynisson, Guðný Birna Guðmundsdóttir, Halldóra Fríða Þorvaldsdóttir, Helga María Finnbjörnsdóttir, Hjörtur Magnús Guðbjartsson, Margrét Þórarinsdóttir, Róbert Jóhann Guðmundsson og Sigurrós Antonsdóttir. Í forsæti var Guðný Birna Guðmundsdóttir.

Að auki sat fundinn Hrefna Gunnarsdóttir ritari.

Margrét A. Sanders boðaði forföll, Birgitta Rún Birgisdóttir sat fyrir hana.

1. Fundargerðir bæjarráðs 5. og 12. febrúar 2026 (2026010008)

Forseti gaf orðið laust um fundargerðirnar.

Fundargerðirnar samþykktar 11-0 án umræðu.

Fylgigögn:

Fundargerð 1550. fundar bæjarráðs 5. febrúar 2026
Fundargerð 1551. fundar bæjarráðs 12. febrúar 2026

2. Fundargerð umhverfis- og skipulagsráðs 6. febrúar 2026 (2026010016)

Forseti gaf orðið laust um eftirfarandi mál fundargerðarinnar frá 6. febrúar til sérstakrar samþykktar:

Áttunda mál fundargerðarinnar Grenndarstöðvar í Reykjanesbæ (2025050211) samþykkt 11-0 án umræðu.
Tíunda mál fundargerðarinnar Flugvallarbraut 734 - Ósk um breytta nýtingu fasteigna (2026020021) samþykkt 11-0 án umræðu.
Ellefta mál fundargerðarinnar Hafnarbakki 10 (2021050189) samþykkt 11-0 án umræðu.
Tólfta mál fundargerðarinnar Kirkjuvegur 37 (2025120346) samþykkt 11-0 án umræðu.
Fjórtánda mál fundargerðarinnar Fjarskiptastaur að Klettatröð 3 (2026010478) samþykkt 11-0 án umræðu.

Forseti gaf orðið laust.

Til máls tók Guðbergur Reynisson (D) og lagði fram eftirfarandi bókun:

Mál 3 frá fundargerð umhverfis- og skipulagsráðs frá 6. febrúar 2026 - Fitjabraut og Fitjabakki – gangandi og
hjólandi umferð (2025090263)

„Þarf í alvöru alvarlegt slys eða jafnvel banaslys til þess að vekja þennan meirihluta.

Fund eftir fund eftir fund er verið að ræða og rífast um umferðaöryggisumbætur sem á ekki að fara í, starfsfólk Reykjanesbæjar bannað að eyða krónu í verkefnið og tíma okkar fulltrúanna í umhverfis- og skipulagsráði hlýtur nú að vera betur varið en að sitja og bíða eftir endalausum loforðum sem á svo ekki að efna.

Við leggjum til að meiri orka og fjármunir verði sett í umferðaöryggi fyrir börnin okkar strax en ekki frestað út í hið óendanlega, teknar verði alvöru ákvarðanir sem móta umferðamenninguna til framtíðar en ekki endalausir plástrar sem mega helst ekki kosta neitt.

Svona virðist samt vinnubrögð meirihluta Samfylkingar, Framsóknar og Beinna leiðar vera í öllum málaflokkum.

Hættið að tala og farið að framkvæma.“

Guðbergur Reynisson, Alexander Ragnarsson og Birgitta Rún Birgisdóttir Sjálfstæðisflokki og Margrét Þórarinsdóttir Umbót.

Forseti gaf orðið laust. Til máls tóku Róbert Jóhann Guðmundsson, Halldóra Fríða Þorvaldsdóttir, Hjörtur Magnús Guðbjartsson, Helga María Finnbjörnsdóttir, Guðný Birna Guðmundsdóttir, Margrét Þórarinsdóttir og Alexander Ragnarsson.

Fundargerðin samþykkt að öðru leyti 11-0.

Fylgigögn:

Fundargerð 382. fundar umhverfis- og skipulagsráðs 6. febrúar 2026

3. Fundargerð stjórnar eignasjóðs 29. janúar 2026 (2026010015)

Forseti gaf orðið laust um fundargerðina. Til máls tók Halldóra Fríða Þorvaldsdóttir.

Fundargerðin samþykkt 11-0.

Fylgigögn:

Fundargerð 25. fundar stjórnar eignasjóðs 29. janúar 2026

4. Fundargerð menntaráðs 6. febrúar 2026 (2026010013)

Forseti gaf orðið laust um fundargerðina.

Til máls tók Birgitta Rún Birgisdóttir (D) og lagði fram eftirfarandi bókun:

Mál 4 frá fundargerð menntaráðs 6. febrúar 2026 – Staða leikskólamála (2026010486)

„Fulltrúi Sjálfstæðisflokks telur að þessari vinnu sé mjög ábótavant og kallar eftir heildstæðri greiningu. Ljóst má vera að biðlistar Reykjanesbæjar eru mun lengri en annarra sveitarfélaga. Einnig virðist vera að Reykjanesbær standi afar illa að vígi þegar kemur að því að taka börn inn í leikskóla við 18 mánaða aldur sem hefur verið lofað síðustu tvö kjörtímabil. Staðan í þessum málaflokki virðist vera langverst í Reykjanesbæ miðað við önnur sambærileg sveitarfélög á landinu. Skortur er á gögnum, sannreyndum tölum og samanburðargreiningu til þess að gera gangskör í þessum efnum. Slæm staða í leikskólamálum kemur niður á samkeppnishæfni sveitarfélagsins.“

Birgitta Rún Birgisdóttir, Guðbergur Reynisson og Alexander Ragnarsson Sjálfstæðisflokki og Margrét Þórarinsdóttir Umbót.

Forseti gaf orðið laust. Til máls tók Halldóra Fríða Þorvaldsdóttir.

Til máls tók Guðný Birna Guðmundsdóttir (S) og lagði fram eftirfarandi bókun:

Mál 4 frá fundargerð menntaráðs 6. febrúar 2026 – Staða leikskólamála (2026010486)

„Meirihluti bæjarstjórnar fagnar þeim jákvæðu niðurstöðum sem fram koma í greiningu á stöðu leikskólamála í Reykjanesbæ þar sem kemur fram að heildarfjöldi leikskólaplássa í sveitarfélaginu verður 1.190 í vor þegar Drekadalur verður fullbyggður fyrir 120 börn en fjöldi barna 18 mánaða og eldri eru alls 1.066. Nú þegar hafa 42 börn sem fædd eru á árinu 2024 hafið dvöl í leikskólunum okkar og er óhætt að fullyrða að öll 18 mánaða börn í Reykjanesbæ muni frá leikskólapláss þegar nýtt skólaár hefst í ágúst á þessu ári.

Þegar litið er til fjölda leikskólabarna voru þau 898 árið 2015 en í dag eru þau 1.099. Á 11 árum hefur leikskólabörnum í sveitarfélaginu fjölgað um 18% sem jafngildir fjölgun um tæpa tvo leikskóla.

Þetta er stór áfangi fyrir fjölskyldur í Reykjanesbæ og skýrt merki um markvissa uppbyggingu, ábyrga áætlanagerð og sterka stöðu leikskóla sveitarfélagsins. Meirihlutinn leggur jafnframt áherslu á að standa áfram vörð um faglegt starf leikskólanna og góða mönnun, enda eru gæði þjónustunnar lykilatriði samhliða auknu aðgengi. Það er mjög gleðilegt fyrir samfélagið okkar að við erum að ná þessum árangri.

Samhliða mun Reykjanesbær halda áfram uppbyggingu leikskóla. Áformað er að byggja nýjan leikskóla í stað Garðasels, fyrstu skref í byggingu þriðja hluta Stapaskóla eru að fara af stað og jafnframt er verið að rýna möguleika á stækkun annarra leikskóla.“

Guðný Birna Guðmundsdóttir, Sigurrós Antonsdóttir og Hjörtur Magnús Guðbjartsson Samfylkingu, Díana Hilmarsdóttir, Halldóra Fríða Þorvaldsdóttir og Róbert Jóhann Guðmundsson Framsókn og Helga María Finnbjörnsdóttir Beinni leið.

Forseti gaf orðið laust. Til máls tóku Róbert Jóhann Guðmundsson, Hjörtur Magnús Guðbjartsson, Birgitta Rún Birgisdóttir, Helga María Finnbjörnsdóttir, Margrét Þórarinsdóttir og Alexander Ragnarsson.

Fundargerðin samþykkt 11-0.

Fylgigögn:

Fundargerð 393. fundar menntaráðs 6. febrúar 2026

5. Fundargerð íþrótta- og tómstundaráðs 11. febrúar 2026 (2026010010)

Forseti gaf orðið laust um fundargerðina. Til máls tóku Sigurrós Antonsdóttir og Guðný Birna Guðmundsdóttir.

Fundargerðin samþykkt 11-0.

Fylgigögn:

Fundargerð 202. fundar íþrótta- og tómstundaráðs 11. febrúar 2026

6. Fundargerð velferðarráðs 12. febrúar 2026 (2026010017)

Forseti gaf orðið laust um fundargerðina. Til máls tók Sigurrós Antonsdóttir

Fundargerðin samþykkt 11-0.

Fylgigögn:

Fundargerð 451. fundar velferðarráðs 12. febrúar 2026

7. Fundargerð lýðheilsuráðs 12. febrúar 2026 (2026010011)

Forseti gaf orðið laust um fundargerðina.

Til máls tók Guðný Birna Guðmundsdóttir (S) og lagði fram eftirfarandi bókun:

Mál 3 frá fundargerð lýðheilsuráðs 12. febrúar 2026 – Uppgjör frístundastyrks árið 2025 (2025120199)

„Meirihluti bæjarstjórnar fagnar þeim jákvæðu niðurstöðum sem fram koma um nýtingu frístundastyrks Reykjanesbæjar. Þátttaka barna á aldrinum 4–18 ára hefur aukist jafnt og þétt, úr 57,9% árið 2022 í 64,1% árið 2025. Sérstaklega er ánægjulegt að sjá verulega aukningu í þátttöku erlendra barna, sem hefur farið úr 28,4% árið 2022 í 43,2% árið 2025.

Þessi þróun er afar jákvæð og sýnir að frístundastyrkurinn er að skila tilætluðum árangri. Markmið sveitarfélagsins er að sem flest börn taki þátt í skipulögðu íþrótta- og/eða frístundastarfi enda er slíkt starf öflug forvörn, stuðlar að betri líðan, félagsfærni og virkri þátttöku barna í samfélaginu.

Meirihlutinn mun áfram styðja við aðgerðir sem auka aðgengi allra barna að fjölbreyttu og uppbyggilegu frístundastarfi í Reykjanesbæ.“

Guðný Birna Guðmundsdóttir, Sigurrós Antonsdóttir og Hjörtur Magnús Guðbjartsson Samfylkingu, Díana Hilmarsdóttir, Halldóra Fríða Þorvaldsdóttir og Róbert Jóhann Guðmundsson Framsókn og Helga María Finnbjörnsdóttir Beinni leið.

Fundargerðin samþykkt 11-0.

Fylgigögn:

Fundargerð 65. fundar lýðheilsuráðs 12. febrúar 2025

8. Fjárfestingaverkefni 2025 – svar við fyrirspurn vegna framkvæmda og kostnaðar (2024090522)

Forseti fór yfir svör vegna fyrirspurnar sem Sjálfstæðisflokkur og Umbót lögðu fram á bæjarstjórnarfundi 6. janúar 2026 undir dagskrárlið fundargerð stjórnar Eignasjóðs frá 18. desember 2025.

Forseti gaf orðið laust.

Til máls tók Margrét Þórarinsdóttir (U) og lagði fram eftirfarandi bókun:

„Fulltrúar Umbótar og Sjálfstæðisflokks leggja fram eftirfarandi bókun vegna fjárfestingarverkefna bæjarins.
Þann 7. ágúst 2025 bókuðum við ósk um heildstætt og rekjanlegt uppgjör fjárfestingarverkefna bæjarins.

Þann 18. desember 2025 ítrekuðum við þá beiðni og lögðum jafnframt sérstaka áherslu á að fram kæmi upphafleg fjárhagsáætlun hvers verkefnis fyrir sig. Hvenær og hvar verkefnið var samþykkt og ef samþykktar hefðu verið viðbætur eða breytingar að fram kæmi upphæð þeirra og dagsetning samþykktar.

Sex mánuðir eru nú liðnir frá upphaflegri beiðni.

Á þeim tíma hefur ekki verið lagt fram skýrt og ótvírætt yfirlit sem sýnir hvar og hvenær samþykkt var að fara fram úr upphaflegum fjárheimildum. Framlögð gögn veita ekki þann rekjanleika sem óskað var eftir og ekki hefur verið vísað með afdráttarlausum hætti í bókun sem heimilar umframútgjöld.

Málið er einfalt. Ef farið er fram úr samþykktri fjárheimild þarf nýja, formlega og bókaða samþykkt.
Samkvæmt sveitarstjórnarlögum má ekki stofna til útgjalda nema fyrir liggi samþykkt fjárheimild. Það er lagaskylda og grundvallarregla í meðferð skattfjár.

Þegar sex mánuðir líða án þess að hægt sé að sýna fram á skýra og bókaða heimild vekur það alvarlegar spurningar um fjármálastjórn og gagnsæi.

Meirihlutinn, Samfylkingin, Framsóknarflokkur og Bein leið, fer með stjórnun bæjarins og ber ábyrgð á þeirri stöðu sem hér er uppi. Sú ábyrgð felur í sér að tryggja gagnsæi, rekjanleika og skýrar heimildir fyrir ráðstöfun skattfjár.

Ef ekki verður tafarlaust lagt fram skýrt og sannanlegt svar um að umframútgjöld hafi verið samþykkt með formlegum hætti, munum við fara fram á óháða úttekt á málinu.

Bæjarbúar eiga rétt á skýrum svörum. Þeir eiga rétt á ábyrgð.

Og þeir eiga rétt á því að farið sé vel með skattfé þeirra.“

Margrét Þórarinsdóttir Umbót, Guðbergur Reynisson, Alexander Ragnarsson og Birgitta Rún Birgisdóttir Sjálfstæðisflokki.

Forseti gaf orðið laust. Til máls tóku Halldóra Fríða Þorvaldsdóttir, Alexander Ragnarsson, Guðbergur Reynisson, Margrét Þórarinsdóttir og Hjörtur Magnús Guðbjartsson.

Til máls tók Guðný Birna Guðmundsdóttir (S) og lagði fram eftirfarandi bókun:

„Meirihluti bæjarstjórnar ítrekar bókun meirihluta bæjarráðs og þakkar fyrir samantektina sem sýnir svo ekki verður um villst að vel er haldið utan um það fjármagn sem fer í framkvæmdir í Reykjanesbæ. Lykiltölur framkvæmda sýna að uppreiknaður heildarkostnaður á hvern fermetra er vel undir samanburðarviðmiðum bæði í leik- og grunnskólum. Þau frávik sem koma fram snúa að framkvæmdum þar sem enn er óvíst með uppgjör vegna samninga og/eða málaferla. Sem dæmi má nefna að lengi hefur því verið haldið fram að Stapaskóli sé dýrasti grunnskóli landsins en hér sést svart á hvítu að það er rangt þar sem uppreiknað fermetraverð er um 860 þúsund krónur sem er í samræmi við viðmið Lánasjóðs sveitarfélaga. Það er því ljóst að Reykjanesbær hefur gætt aðhalds þegar kemur að byggingu skólans og kostnaðaráætlanir eru innan vikmarka. Það hefur verið gert á sama tíma og aðstaða og aðbúnaður innan skólans er til fyrirmyndar bæði fyrir nemendur og starfsfólk. Það er því ekki skrýtið að önnur sveitarfélög líti til Reykjanesbæjar sem jákvæðrar fyrirmyndar.

Rétt er að taka fram að yfir verkefnum voru ýmist bæjarráð sem byggingarnefnd, stjórn Eignasjóðs eða verkefnastjórn. Allar fundargerðir þessara ráða og stjórna og þar með ákvarðanir voru samþykktar af bæjarstjórn. Í því samhengi er einnig mikilvægt að taka fram að allir flokkar eiga fulltrúa í bæjarráði og í stjórn Eignasjóðs.

Meirihluti bæjarstjórnar stendur stoltur á bak við þau verkefni sem við höfum fjárfest í á undanförnum árum. Með þeim tryggjum við að nemendur okkar, starfsfólk og íbúar búi við fyrirmyndaraðstæður. Með stofnun stjórnar Eignasjóðs og styrkingu á eignaumsýslunni hefur verið stutt við faglega nálgun, gott eftirlit ásamt því að ferlar hafa verið styrktir sem skilar sér í enn betra verklagi og nýtingu fjármagns til framtíðar.“

Guðný Birna Guðmundsdóttir, Sigurrós Antonsdóttir og Hjörtur Magnús Guðbjartsson Samfylkingu, Díana Hilmarsdóttir, Halldóra Fríða Þorvaldsdóttir og Róbert Jóhann Guðmundsson Framsókn og Helga María Finnbjörnsdóttir Beinni leið.

9. Erindisbréf fyrir samráðshóp um málefni fatlaðs fólks (2019120096)

Erindisbréf fyrir samráðshóp um málefni fatlaðs fólks tekið til seinni umræðu.

Til máls tók Guðný Birna Guðmundsdóttir og fór yfir helstu atriði erindisbréfsins.

Erindisbréfið samþykkt 11-0.

Fleira ekki gert og fundi slitið kl. 19:55