Frá tannviðgerð skessunnar.
Frá tannviðgerð skessunnar.

Í  upphafi vikunnar sást til hafnarstarfsmanns gera við framtönn á þekktum innflytjanda til Reykjanesbæjar og veita henni talþjálfun. Við eftirgrennslan kom í ljós að starfsmaðurinn hafði hvorki tannlæknaréttindi né tréttindi talmeinafræðings.
Nú er málið til meðferðar hjá hafnarstjóra.

Aðdragandi þessa máls er að Skessan í Fjallinu,  þekkt aðalpersóna í sögum Herdísar Egilsdóttur, "Sigga og Skessan í Fjallinu" flutti til Reykjanesbæjar fyrir fjórum árum og fékk félagslegt húsnæði við smábátahöfnina í Keflavík.
Hún hefur unað sér þar vel og haft yndi af heimsóknum barna á öllum aldri, sem hafa fengið að líta inn í hennar stóra helli, með tilheyrandi skessuborðbúnaði, hlusta á hana sofa og senda henni ýmsar gjafir. Mjög vinsælt er t.d. að börnin skilji snuð sín eftir á sérstöku tré, Þegar þau ákveða að láta snuðtímabilinu lokið.

Á mánudagsmorgun þegar hafnarstarfsmenn sem gæta Skessunnar í Hellinum komu að opna hellinn hennar gestum til ánægju og yndisauka urðu þeir varir við að  óprúttnir aðilar höfðu brotist inn í hellinn hennar um helgina og slegið tennurnar úr henni og stolið hátölurunum sem gefa henni hljóð.

En fyrir lok vinnudags höfðu hafnarstarfsmenn tekið að sér tannlækningar og komið tönnunum tveimur á réttan stað í skessuna. Þá settu hafnarstarfmennirnir sig í hlutverk talmeinafræðinga og færðu henni hátalara þannig að skessan fékk rödd sína aftur.

Segið svo að hafnarstarfsmenn séu ekki fjölhæfir! Hafnarstjóri mun ekki gera frekari athguasemdir við réttindaleysið í þessu tilviki.