Daglegt líf okkar tekur tímabundnum breytingum á meðan Covid-19 gengur yfir. Við höldum áfram að leggja okkur fram um að veita góða þjónustu þó hún þurfi að vera með breyttu sniði í einhvern tíma. Gott dæmi um þetta eru foreldrafærninámskeið sem fræðslusvið Reykjanesbæjar býður uppá sem miða að því að styrkja foreldra í uppeldishlutverki sínu og aðstoða börnin við að takast á við tiltekinn vanda. Ólík námskeið eru í boði og eru þau sérsniðin að ólíkum aldri og þörfum barnanna.

Á vorönn 2020 voru skipulögð þrjú námskeið fyrir foreldra sem hófust í janúar og febrúar. Með tilkomu samkomubanns var ljóst að ekki var mögulegt að ljúka tveimur af námskeiðunum með hefðbundnum hætti. Því var hafist handa við að undirbúa að færa foreldrafærninámskeiðin í fjarkennsluform. Sá undirbúningur gekk hratt og vel fyrir sig. Foreldrar munu því geta lokið námskeiðunum með aðstoð tækninnar. Þessi lausn hefur mælst vel fyrir hjá foreldrum sem sitja námskeiðin.