Hver hlýtur Súluna á laugardaginn?

Brátt kemur í ljós hver hlýtur Súluna, menningarverðlaun Reykjanesbæjar, en hún er veitt árlega einstaklingi eða fyrirtæki sem unnið hefur vel að menningarmálum í bæjarfélaginu. Það er menningar- og atvinnuráð Reykjanesbæjar sem tekur ákvörðun um verðlaunahafann að undangenginni auglýsingu þar sem óskað er eftir tillögum frá bæjarbúum.

Verðlaunin verða afhent við hátíðlega athöfn í Duus Safnahúsum n.k. laugardag kl. 14:00. Við sama tilefni verða tvær nýjar sýningar opnaðar í Listasafni Reykjanesbæjar. Annars vegar er það sýningin Línur, flækjur og alls konar, einkasýning Guðrúnar Gunnarsdóttur og hins vegar sýning Vena Naskręcka og Michael Richardt, You are here / Du er her / Þú ert hér.

Allir velunnarar menningarlífs í Reykjanesbæ eru boðnir hjartanlega velkomnir til að gleðjast yfir blómlegu menningarlífi í Reykjanesbæ.