Jólin í Duus.
Jólin í Duus.

Finnið jólasveinana í skemmtilegum ratleik

Í aðdraganda jóla er gott að geta dregið sig út úr jólastressinu og átt notalega fjölskyldustund með smáfólkinu. Í Duus Safnahúsum hafa jólasveinarnir og þeirra nánasta fjölskylda falið sig vítt og breytt í Bryggjuhúsinu og nú er þörf á hjálp barnanna við að finna þá í tæka tíð fyrir jólin svo þeir komist nú með gjafirnar í skóinn. Til að finna þá þarf að leysa þrautir í skemmtilegum fjölskylduratleik.

Skessan í hellinum tekur á móti óskalistum

Í Stofunni, einum sala Duus Safnahúsa, geta börnin skrifað og skreytt óskalista til jólasveinanna.   Skessan í hellinum, sem er frænka jólasveinanna, tekur á móti þeim í póstkassann sinn og hefur lofað að færa jólasveinunum óskalistana tímanlega. Hún er komin í mikið jólaskap og ætlar að skreyta hellinn sinn í byrjun desember og hlakkar mikið til að fá heimsóknir frá kátum krökkum.

Heitt kakó og piparkökur fyrir börnin

Eftir ratleik og gönguferð í Skessuhelli er tilvalið að koma við á Kaffi Duus þar sem börnum, í fylgd fullorðinna, er boðið upp á kakóbolla og piparköku í verðlaun fyrir þátttöku í ratleiknum.

Jóladagskrá fjölskyldunnar hófst laugardaginn 28. nóvember og stendur til 6. janúar.

Börnin á Vesturbergi aðstoðuðu Skessuna við að skreyta hellinn sinn fyrir jólin.