Ljósin tendruð og Bókakonfekt

Ljósin á jólatrénu eru heillandi.
Ljósin á jólatrénu eru heillandi.

Ljósin tendruð

Ljósin verða tendruð á vinabæjarjólatrénu frá Kristiansand í Noregi á Tjarnargötutorgi laugardaginn 1. desember kl. 17:00.

Stutt dagskrá verður af því tilefni með tónlist og söng frá nemendum Tónlistarskóla Reykjanesbæjar og kór 4. bekkjar í Holtaskóla. Sendiherra Noregs á Íslandi mun afhenda jólatréð og fulltrúi bæjarins veita því viðtöku. Þá mun Alísa Rún Andrésdóttir nemandi í 6. bekk Akurskóla hljóta þann heiður að tendra ljósin á trénu sem munu lýsa okkur í mesta skammdeginu. Jólahljómsveit Tónlistarskóla Reykjanesbæjar stígur því næst á stokk og slær upp léttu jólaballi og stýrir dansi í kringum jólatréð ásamt góðum gestum úr fjöllunum. Á meðan á dagskrá stendur verður viðstöddum boðið að ylja sér á heitu kakói og piparkökum.

Bókakonfekt

Boðið verður upp á hið árlega og „ljúffenga“ Bókakonfekt sunnudaginn 2. desember kl. 14:00 í listasal Duushúsa.

Höfundar sem lesa upp úr nýjum bókum eru: Auður Ava Ólafsdóttir, Gerður Kristný, Marta Eiríksdóttir og Steinunn Sigurðardóttir. Bækur höfundanna verða seldar á staðnum
og hægt að fá þær áritaðar.

Kvennasveitin Jólaseríurnar flytur tónlist milli upplestra. Heitt verður á könnunni og boðið upp á konfekt í hléi.

Bæjarbúar eru hvattir til þátttöku í þessum ómissandi viðburðum í aðdraganda jóla hér í bænum okkar.