Barnavernd Reykjanesbæjar óskar eftir samstarfi við fjölskyldur sem eru reiðubúnar að taka reglubundið börn til dvalar á heimili sínu. Algengast er að barn dvelji hjá stuðningsfjölskyldu eina til tvær helgar í mánuði. Um er að ræða börn sem búa við erfiðar félagslegar aðstæður og hafa gagn og gaman af að kynnast annarri fjölskyldu og taka þátt í lífi heimilismanna.
Leitað er eftir fólki sem er fært um að skapa öruggar aðstæður með hlýju og nærgætni en skýrum mörkum. Barnaverndarnefnd Reykjanesbæjar veitir stuðningsfjölskyldum leyfi að undangenginni úttekt á heimilishögum. Skila þarf læknis- og sakavottorði.

Þeir sem hafa áhuga vinsamlegast hafi samband við Maríu Gunnarsdóttur, forstöðumann barnaverndar, í síma 421-6700 eða á netfangið maria.gunnarsdottir@reykjanesbaer.is