15 verkefni fengu styrk úr Nýsköpunar- og þróunarsjóði

05.06.2025 Fréttir

Matsnefnd Nýsköpunar- og þróunarsjóðs skrifstofu menntasviðs hefur lokið við úthlutun styrkja fyrir skólaárið 2025–2026. Alls bárust umsóknir um styrki til 24 verkefna upp á rúmar 28 milljónir króna, en 15 verkefni hlutu styrk að heildarupphæð 11.400.000 króna í ár.

Sjóðurinn var auglýstur 11. febrúar 2025 og er markmiðið með honum að styðja við nýsköpun, framþróun og öflugt innra starf leik- og grunnskólum í Reykjanesbæ. Áhersluatriði fyrir þessa úthlutun voru: Inngildandi menntun, við og jörðin, læsi (lestur, lesskilningur, ritun og tjáning), og gervigreind í skólastarfi. Skilyrði var að verkefnin tengdust menntastefnu Reykjanesbæjar: Með opnum hug og gleði í hjarta.

Hugmyndaauðgi, frumkvæði og gleði leika lykilhlutverk í öllum þeim verkefnum sem hlutu styrk að þessu sinni. Þau endurspegla metnað og eldmóð starfsfólks í leik- og grunnskólum í Reykjanesbæ til að efla menntun, vellíðan og framtíðarsýn barna og ungmenna. Það er sannarlega tilhlökkunarefni að fylgjast með þessum spennandi verkefnum verða að veruleika á næsta skólaári. Við óskum þeim sem hlutu styrk hjartanlega til hamingju!

Verkefni sem hlutu styrk:

  • Grunnskólar – Fagmennska í forgrunni: Gervigreind í grunnskólum Reykjanesbæjar: 2.450.000 kr.

  • Holtaskóli – Öll með – Skýrari sýn, skýrari markmið: 1.800.000 kr.

  • Njarðvíkurskóli – Læsi með tilgang: 800.000 kr.

  • Stapaskóli – Fjármál til framtíðar: 800.000 kr.

  • Njarðvíkurskóli – Óhefðbundin tjáskipti: 750.000 kr.

  • Stapaskóli – Gervigreind í skólastarfi: 600.000 kr.

  • Stapaskóli – Vinnustofa gegn fordómum: 600.000 kr.

  • Háaleitisskóli – Sumarlestur 2025 í Háaleitisskóla: 600.000 kr.

  • Njarðvíkurskóli – Ertu gíraffinn sem prófar eða ljónið sem lærir af mistökunum?: 600.000 kr.

  • Holt – Börn náttúrunnar: 500.000 kr.

  • Akurskóli – Þróun gervigreindar í skólastarfi með FabLab smiðju í Akurskóla: 400.000 kr.

  • Heiðarsel – Orðakast: 400.000 kr.

  • Tjarnarsel – Grænn námsgarður við nýja deild: 400.000 kr.

  • Heiðarskóli – Í átt að betri líðan – ritun: 400.000 kr.

  • Holtaskóli – Valáfangar á unglingastigi með áherslu á sjálfbærni: 300.000 kr.

Til baka